Wayuotanin 14 - Dakota Wowapi Wakan Kin

¹ Hehan wanmdake c̣a, iho, Amnos wan Zion Paha kin akan najin, qa kektopawinge opawinge sanpa kektopawinge wikcemna topa sam kektopawinge topa kici najinpi, iye Atkuku caje kin itepi kin en owapi qon.

² Unkan maḣpiya kin eciyatanhan wicaho wan nawaḣon, mini ota iḣaḣa kin iyececa, qa wakinyan tanka hoton kin iyececa. Qa dowankiyapi sa candowankiyapi on dowanpi wicahotanin nawaḣon.

³ Qa oiyotanke kin itokam, qa taku ni un topa kin, qa hunkawicayapi kin wicitokam odowan teca se ahiyayapi. Odowan kin he tuwedan onspe kta okihi śni, tuka kektopawinge opawinge sam kektopawinge wikcemna topa sam kektopawinge topa maka kin etanhan opewicatonpi qon hena.

⁴ Winoḣinca on aśamwicayapi śni kin hena eepi, tanśna unpi nakaeś. Tona Amnos kin tokiya ye cinhan iyahna yapi kin hena eepi. Wicaśta kin etanhan Wakantanka qa Amnos kin ekta opewicatonpi tokaheya kin hena eepi

⁵ Qa hena ipi kin en wohnaye takudan iyeyapi śni; qa Wakantanka oiyotanke kin itokam takudan iyaonpepica śni unpi.

⁶ Hehan maḣpiya ohnihde tokeca wan maḣpiya cokaya kinyan iyaye cin he wanmdaka, wotanin waśte owihanke wanin un kin, tona maka akan unpi kin, wicaśta kin, qa wicowazi, qa iapi, qa oyate hiyeye cin owasin ieyanpaha owicakiyake kta yuha iyaya.

⁷ Qa hotankakiya heya, Wakantanka kinihanpi qa wowitan qu po; woyaco anpetu kin wanna hi ce; qa tuwe maḣpiya, maka, miniwanca, qa wakoniya kin kage cin he itokam canpeśka makehde inajin po.

⁸ Unkan maḣpiya ohnihde icinonpa kin he ihakam ye c̣a heya, Hinḣpaya ce, Babulon otonwe tanka kin he hinḣpaya; wawiciḣaḣapi wocantiyahde mini śa tawa kin etanhan oyate hiyeye cin owasin yatke wicakiye cin he dee.

⁹ Unkan maḣpiya ohnihde iciyamni kin he hena wicihakam ye c̣a hotankakiya heya, Tuwe wamanica, qa iyacinpi kin ohoda, qa wowapetogton tawa kin ite, qa iś nape kin en yuhe cinhan;

¹⁰ He Wakantanka wocantiyahde miniśa tawa kin wocanteptanye miniyatke tawa kin en okaśtan kin hetanhan yatke kta, qa maḣpiya ohnihde owotanna un kin hena wicitokam, qa Amnos kin itokam, peta, caḣdi ko en kakiśyapi kta.

¹¹ Qa kakiświcayapi śota kin owihanke wanin wankan iyaya ece; qa tona wamanica iye iyacinpi ko ohodapi, qa tuwe he caje wapetogtonpi yuhe cin hena anpetu hanyetu ko oziyapi wanin unpi.

¹² Wicaśta owotanna apepi kin he de en un, qa tona Wakantanka tawoahope opapi qa Jesus wacinyanpi kin hena.

¹³ Hehan maḣpiya kin eciyatanhan wicaho wan nawaḣon, hecen emakiya, Wowapi ecen kaga wo; Detanhan wicaṭe cin tona Itancan kin en ṭapi kin hena wicayawaśtepi ece. Han, Woniya kin eya, Wicoḣtani kin ayuśtanpi kta, qa wicoḣan kin wiciyahna iyaya ece.

¹⁴ Hehan wanmdake c̣a, iho, maḣpiya ska wan, qa waḣji Wicaśta Cinhintku kin iyececa akan iyotanka, he mazaskazi wapaha wan wapaha kiye c̣a, nape etapa kin on isan śkopa pe ḣinca yuha.

¹⁵ Unkan maḣpiya ohnihde tokeca wan tipi wakan kin etanhan u, qa tuwe maḣpiya ska kin akan iyotanke cin he panyanhan heciya; Isan śkopa nitawa kin en iyekiye c̣a aguyapi baksa wo. Mnayanpi kte cin wanna iyehantu; maka woksapi kin wanna śeca ce.

¹⁶ Unkan maḣpiya ska akan iyotanke cin he isan śkopa tawa kin maka ekta yekiya, unkan maka kin baśdapi.

¹⁷ Hehan maḣpiya ohnihde wan tokeca tipi wakan maḣpiya kin ekta he cin hetanhan u, he nakun isan śkopa pe ḣinca yuha.

¹⁸ Unkan maḣpiya ohnihde tokeca wan wahna wośnapi kin etanhan u, he peta on wowaśake yuha. Qa he tuwe isan śkopa pe ḣinca yuhe cin he panyanhan hoyekiye c̣a heya, Isan śkopa pe ḣinca nitawa kin ekta yekiye c̣a make hastanhanka kin mnayan wo; hastanhanka iyage kin wanna sapa ce.

¹⁹ Unkan maḣpiya ohnihde kin he isan śkopa tawa kin maka ekta yekiye c̣a, maka hastanhanka iyuwi kin mnaye c̣a, Wakantanka wocantiyahde miniśa iyuśkice tawa tanka kin he en iyoḣpeya.

²⁰ Unkan otonwe kin itankan mini śa iyuśkice kin napanpi, qa mini śa iyuśkice kin etanhan we hiyu, śuktanka i iyuwi kin hehanyan, stadiya kektopawinge sam opawinge śakpe hehanyan.