Wayuotanin 13 - Dakota Wowapi Wakan Kin

¹ Unkan hehan miniwanca kahda wiyaka kin en nawajin. Qa miniwanca kin etanhan wamanica wan hiyu wanmdaka, pa śakowin, qa he wikcemna yuha, qa he kin akan wacinhe wikcemna, qa pa kin akan waośtehdapi caje kin.

² Unkan wamanica wanmdake cin he inmu tanka iyececa, qa siha kin hena waḣanksica siha kin iyececa, qa i kin mnaja i kin iyececa. Unkan wamduśka qon towaśake kin he qu, qa oiyotanke tawa kin, qa wicookihi tanka.

³ Unkan wanmdake c̣a, ito pa kin wanji kiuniyanpi, on ṭe kta tuka; unkan kiuniyanpi kin on ṭe kte cin he okizi, qa wicaśta kin owasin wamanica kin on yuśinyayapi.

⁴ Qa wamduśka kin towaśake kin wamanica qu qon he ohodapi, qa wamanica kin he nakun ohodapi, qa heyapi, Tuwe wamanica kin iyececa he, qa tuwe he kici kicize kta okihi he.

⁵ Unkan i wan qupi, he on taku tanka, qa iapi śice cin eye kta, qa wowaśake qupi, wi wikcemna topa sanpa nonpa hehanyan, ozuye econ kte cin heon.

⁶ Unkan i hdukawa qa Wakantanka yaśica, caje, qa wakeya tawa kin, qa tona ntaḣpiya kin ekta etipi kin hena taku awicakicaga.

⁷ Qa tona owotanna un kin hena azuwicaye c̣a wicaktedan kta e qupi, qa wicowazi, qa iapi kin, qa oyate kin owasin wicayuhe kta e wowaśake qupi.

⁸ Unkan tona maka akan unpi cajepi kin wiconi wowapi Amnos, maka kagapi kin hehantanhan wośnapi qon, he tawa kin en ewapi śni kin hena owasin wamanica kin ohodapi.

⁹ Tuwe noge yukan hecinhan, he naḣon kta.

¹⁰ Tuwe wayaka awicahdi kinhan he wayaka ayapi kta, qa tuwe maza sagye en wicakte kin he maza sagye on ktepi kta ce. He en wicaśta owotanna apepi qa wacinyanpi kin tanin.

¹¹ Unkan wamanica wan tokeca maka kin etanhan hiyu kin he wanmdaka; he he nom yuha taḣin wanuyanpi cincadan iyececa, qa wamduśka iyecen ia.

¹² Unkan wamanica tokaheya kin he towaśake kin ocowasin yuha, qa maka kin, tona akan un kin hena ko wamanica tokaheya kin kiuniyanpi, qa on ṭe kta, tuka okizi kin he ohodawicakiya.

¹³ Qa wowapetokeca tanka econ, wicaśta wicitokam maḣpiya kin eciyatanhan peta maka kin ahinḣpaye ya.

¹⁴ Qa tona maka akan unpi kin wicahnayan, wowapetokeca wamanica kin itokam econ kta e qupi qon hena on. Qa tona maka akan unpi kin wamanica maza sagye on capapi tuka kini qon he iyacinpi wan kagapi kta e iwahokonwicakiya.

¹⁵ Qa wamanica iyacinpi kin he oniya qu okihi, hecen on wamanica iyacinpi kin ie kta, qa tona iyacinpi kin ohodapi śni kin hena wicakte kta okihi.

¹⁶ Unkan owasin, cistinpidan tankinkinyanpi ko, wijicapi qa waḣpanicapi, tona ihduhapi, wowidake unpi kin hena ko, nape etapa kin en, qa iś itepi kin en wowapetogton tawa kin yuhe wicakiya.

¹⁷ Unkan tuwedan wopeton kte śni, tuka tona wamanica towapetogton, caje kin, qa caje ihdawa kin he wanji tukte e yuhe cin henana.

¹⁸ De en woksape yukan. Tuwe ksape cin he wamanica tona ihdawa kin he yawa kta. He wicaśta iyawapi kin hee, ihdawa kin he opawinge śakpe sanpa wikcemna śakpe sanpa śakpe.