Wayuotanin 11 - Dakota Wowapi Wakan Kin

¹ Unkan cedi wan cansakadan iyececa he maqupi; unkan maḣpiya ohnihde kin najinhan najin qa heya; Najin, qa tipi wakan Wakantanka tawa kin iyuta wo, qa wahna wośnapi, qa tona en cekiyapi ece kin hena nakun.

² Tuka hocoka kin, tipi wakan itankan, he tankan iyeye c̣a iyute śni wo; he Ikcewicaśta kin wicaqupi; unkan otonwe wakan kin amanipi kta, wi wikcemna topa sam nonpa hehanyan.

³ Unkan waayataninpi nom mitawa kin wahinske ojuha oihdugepi waayatapi kta e wicawaqu kta, anpetu kektopawinge sanpa opawinge nonpa sanpa wikcemna śakpe hehanyan.

⁴ Hena e Oliwe can nonpa qa petijanjan nom, Wakantanka maka yuhe cin itokam he cin hena eepi.

⁵ Unkan tuwe hena kiuniwicaye kta cin kinhan, ipi kin etanhan peta hiyu, qa toka wicayapi kin ihang wicaye kta: Tuwe kiuniwicaya cin kinhan he hecen ktepi kta.

⁶ Hena e maḣpiya kin onataka okihipi, hecen magaju kte śni, waayatapi anpetu kin icunhan, qa mini kin we icaḣyapi kta okihipi, qa tohan cinpi eca wokakije owasin on maka kin kakiśyapi ece.

⁷ Unkan taku yaotaninpi kin wanna yuśtanpi kta hehan, wośbe kin etanhan wamanica wan wankantkiya hiyu, qa hena azuwicaye kta, qa ohiwicaye c̣a wicakte kta.

⁸ Unkan hena tancan ṭapi kin otonwe tanka canku kin ohna wanke kta, he iapi wakan kin eciyatanhan Sodom qa Egupta eciyapi, qa tukten Itancan unkitawapi kin icipaweḣ okatanpi qon.

⁹ Unkan wicaśta kin, qa wicowazi kin, qa iapi kin, qa oyate kin, hena tancan ṭapi kin wanwicayakapi kta, anpetu yamni qa wanji hanke hehanyan, qa tancan ṭapi kin maka mahen wicaḣapi kte cin iyowinwicakiyapi kte śni.

¹⁰ Unkan hena on etanhan tona makoce kin en ounyanpi kin magagaic̣iyapi, qa wiyuśkinpi kta, qa taku kicic̣upi kta, waayatapi nom tona maka akan ni un kin kakiświcayapi qon hena on etanhan.

¹¹ Unkan anpetu yamni qa wanji hanke iyohakam, wiconi oniya kin Wakantanka eciyatanhan hena mahen iwicayaya; qa siha on najinpi, unkan tona wanwicayakapi kin nina yuśinyayapi.

¹² Unkan hena wicaho wan tanka naḣonpi, maḣpiya kin eciyatanhan hewicakiya; Deciya wankan u po, eya. Unkan maḣpiya śapa wan akan maḣpiya kin ekta iyayapi, qa tona toka wicayapi qon hena wanwicayakapi.

¹³ Unkan wihiyayedan ape cin he icunhan maka śkanśkan wan tanka, qa otonwe kin hankedan iwikcemnamna kin hinḣpaya, qa maka śkanśkan kin on tona ṭapi kin hena wicaśta kektopawinge śakowin. Qa unmapi kin yuśinyayapi qa maḣpiya Wakantanka kin wowitan qupi.

¹⁴ Wicokakije inonpa kin wanna henakeca, qa ito wicokakije iyamni kin kohanna u kta ce.

¹⁵ Hehan maḣpiya ohnihde iciśakowin kin yahoton, qa maḣpiya kin ekta wicaho tanka hotaninpi, qa heyapi, Itancan unkitawapi qa Messiya tawa kin, maka wokiconze kin tawaye c̣a, ohinniyan en wicaśtayatapi un kta ce.

¹⁶ Hehan hunkawicayapi wikcemna nonpa sanpa topa, Wakantanka itokam oiyotanke kin akan kiyotankapi kin, hena makata eḣpeic̣iyapi, qa Wakantanka ohodapi;

¹⁷ Qa heyapi, Itancan Wakantanka Iyotan waśake cin, tuwe un, qa un qon, u kte cin he niye ce, pidaunyayapi, nitowaśake tanka kin iyekcu, qa wicayeconza ce.

¹⁸ Qa oyate kin śinhdapi, qa wocantiyahde nitawa kin wanna hi; qa tohan wicaṭe cin wicayacopi kta, qa ookiye wicayaye cin wicaśta wokcan, qa owotanna, qa tona nicaje kin kokipapi, cistinpidan tankinkinyan ko, taku wicayaqu kta, qa tona maka napiśtanyanpi kin hena napiśtanwicayaye kte cin.

¹⁹ Hehan maḣpiya kin ekta tipi wakan Wakantanka tawa kin yuḣdokapi, qa tipi wakan kin en wicotakuye can koka kin wanyakapi. Unkan ito wakanhdi, qa wicaho, qa wakinyan hotonpi, qa maka śkanśkan, qa wasu tanka.