Wayuotanin 10 - Dakota Wowapi Wakan Kin

¹ Unkan hehan maḣpiya ohnihde wan tokeca waśake ḣinca maḣpiya kin eciyatanhan kuntkiya u, maḣpiya śapa hdowin kin he wanmdaka; wihmunke wan wapaha kiye c̣a, ite kin he anpetu wi kin iyececa, qa siha kin peta wankantkiya ide kin iyececa.

² Qa nape kin on wowapi wan cistinna yumdayeya yuha. Qa siha etapa kin miniwanca ahekiye c̣a, sicatka kin iś maka kin akan.

³ Qa hotankakiya hotanin, mnaja wan hoton kin iyececa. Unkan hotanin hehan wakinyan śakowin hotonpi.

⁴ Unkan wakinyan śakowin kin hotonpi hehan wowapi wakage kta, tuka wicaho wan nawaḣon, maḣpiya kin eciyatanhan hemakiya, Taku wakinyan śakowin eyapi kin he sutaya apuspa wo, qa wowapi en kage śni wo.

⁵ Unkan maḣpiya ohnihde miniwanca maka ko akan najin wanmdake ciqon he nape kin maḣpiya kin ekta hdugate;

⁶ Qa tuwe ohinniyan ni un, qa maḣpiya kage c̣a, taku ohnaka ko, maka qa taku ohnaka ko, miniwanca qa taku ohnaka ko kage cin hee on konza, Anpetu kin wanna henakeca kta;

⁷ Tuka maḣpiya ohnihde iciśakowin yahoton kinhan, anpetu kin hena en Wakantanka tawowiyukcan henakeca kte cin hehanyan, iye taokiye, wicaśta wokcan kin owicakiyake ciqon he iyecetu ce.

⁸ Unkan wicaho maḣpiya kin eciyatanhan tanin qon he ako hoyemakiye c̣a heya, Maḣpiya ohnihde miniwanca maka ko akan najin kin he ekta ye c̣a, wowapi cistinna yumdayapi kin nape en un kin he icu wo.

⁹ Hehan maḣpiya ohnihde kin he en wai qa hewakiya, Wowapi cistinna kin he maqu wo. Unkan, Icu qa yuta wo, tezi kin pa niye kta, tuka nii kin ohna tuḣmaga canhanpi kin iyecen skuye kta ce, emakiya.

¹⁰ Unkan wowapi cistinna kin maḣpiya ohnihde nape kin etanhan iwacu, qa temwaya; qa mii kin en tuḣmaga canhanpi kin iyecen skuya, tuka nawapca hehan tezi kin pa mayan.

¹¹ Hehan, Oyate, qa Ikcewicaśta, qa iapi kin, qa wicaśtayatapi ota en wicayakidukcan kta ce, emakiya.