Wayuotanin 1 - Dakota Wowapi Wakan Kin

¹ Jesus Messiya wayuotanin tawa, taku ecadan u kta e he tawowidake kin sdonyewicakiye kta Wakantanka qu qon he dee; unkan taohnihde wan u śi, qa tawowidake Johannes he okiyaka:

² He Wakantanka oie kin, qa Jesus Messiya wohdake cin, taku tona wanyake cin hena yaotanin.

³ Tuwe wokcan oie kin de yawa, qa tona naḣonpi, qa taku en kagapi kin anagoptanpi kin, hena wowaśte yuhapi. Wanna kiyadan ihan.

⁴ Johannes, Asia ekta okodakiciye śakowinpi kin wowapi wicakicaga. Wowaonśida, wookiye ko, tuwe un, qa un qon, ukte cin hetanhan niyepi en nicipi un nunwe; qa Woniya śakowinpi oiyotanke tawa kin itokam unpi kin hena eciyatanhan;

⁵ Qa Jesus Messiya etanhan, he waayatanin wicaka, wiconṭe etanhan tokaheya tonpi, qa maka wicaśtayatapi kin Itancan kin hee. Tuwe waśte unkidapi, qa waunḣtanipi kin etanhan iye we kin en unyujajapi,

⁶ Qa Atkuku Wakantanka ekta wicaśtayatapi, wośna kagapi ko unkagapi kin hee, wowitan, wowaśake ko owihanke wanin tawa nunwe. Amen.

⁷ Wanyaka po, maḣpiya śapa kin akan u; unkan wiciśta owasin wanyakapi kta, qa tona he capapi qon hena nakan, qa iye on oyate maka ohnaka kin owasin aic̣ipapi kta. Hecetu nunwe. Amen.

⁸ Alpha qa Omega, otokahe qa owihanke kin he miye ce; Itancan un, qa un qon, u kta, iyotan waśake cin he hena hecen eya.

⁹ Johannes hunkawanjinyayapi, wokakije, qa wokiconze, wowaḣbadan ko, Jesus Messiya tawa kin en, tawaśi yayapi kin he miye; Wakantanka oie qa Jesus Messiya wohdake cin on etanhan, wita wan, Patmos eciyapi, hen waun.

¹⁰ Itancan taanpetu kin en Woniya kin kici waun; unkan mihektapa tanhan wicaho wan tanka, maza yahotonpi tanka wan iyececa, nawaḣon;

¹¹ He kaken eya, Alpha qa Omega, tokaheya qa ehake kin he miye ce. Taku wandake cin wowapi ecen kage c̣a, Asia ekta okodakiciye kin iwahowicaya wo; Ephesos, qa Smurna, qa Pergamos, qa Thuatira, qa Sardis, qa Philadelphia, qa Laodikia.

¹² Unkan wicaho omakiye cin he wanmdake kta e ekta mihdamna. Unkan mihdamna qehan mazaskazi petijanjan ihupa śakowin wanmdaka.

¹³ Qa petijanjan ihupa śakowin kin cokaya Wanji Wicaśta Cinhintku kin iyececa, tawokoyake kin siha kin ekta iyahdeya, qa maku kin opta mazaskazi ihduskita.

¹⁴ Qa pa kin paha ko ska, taḣinca wanuyanpi hin kin iyecen ska, qa wa iyececa, qa iśta kin peta ide kin iyececa;

¹⁵ Qa siha kin iś mazazi ecedan iyececa, peta tanka en itkonyahe seca; qa ho kin he mini ota iḣaḣa kin iyececa.

¹⁶ Qa nape etapa kin ohna wicanḣpi śakowin hduhe c̣a, i kin eciyatanhan maza sagye anog ope kin heca wan hiyu, qa itohnake kin he anpetu wi nina iyege cin iyececa.

¹⁷ He wanmdaka, unkan ṭa wanke cin iyecen siha hde kin en mahinḣpaya. Hehan iye nape etapa kin on omayutan qa, Ihnuhan koyakipe cin, emakiya; Tokaheya qa ehake kin ho miye;

¹⁸ Tuwe ṭe c̣a ake kini, qa ito owihanke wanin ni waun; Amen; qa Wakanśica ti kin wiconṭe ko tiyopa iyuḣdoke kin yuha manka ce.

¹⁹ Taku wandake cin he wowapi ecen kaga wo, taku nakaha un qa dena iyohakam taku u kte cin hena.

²⁰ Wicanḣpi śakowin minape etapa kin ohna wandake ciqon wowiyukcan kin hee, qa mazaskazi petijanjan ihupa kin hena nakun. Wicanḣpi śakowin qon okodakiciye śakowinpi ohnihde yuhapi kin hena eepi; qa petijanjan ihupa śakowin wandake cin okodakiciye śakowinpi kin hena eepi.