Titos 3 - Dakota Wowapi Wakan Kin

¹ He kiksuyewicaya wo, taku itancanpi qa wicowaśake kin hena ihukun iyeic̣iyapi kta, wicaśtayatapi kin anawicagoptanpi kta, qa wicoḣan waśte owasin econpi kta, on wiyeya yukanpi kta.

² Tuwedan yaśicapi kte śni, qa wicakizapi kte śni, tuka waḣbayedan unpi, qa wicaśta owasin on wacin tankapi kta.

³ Ehanna unkiś eya wacin untonpi śni, qa waanaungoptanpi śni, unhnayanpi, qa cantiheyapi śica ota, qa iyokipiic̣iyapi kin en wowidake unyakonpi, wocanniye, icekinpi ko en unnipi, waḣte śni unyakonpi, qa otoiyohi śiceunkicidakapi.

⁴ Tuka hehan Wakantanka Wanikiya unkitawapi kin he towaśte, qa wacantkiye cin wicaśta kin en yutaninpi qehan;

⁵ Wicoḣan owotanna econkupi kin eciyatanhan śni, tuka iye towaonśida kin eciyatanhan niunyanpi; teca wicatonpi woyujaja kin on, qa Woniya Wakan wicayuteca kin heon etanhan;

⁶ He Jesus Messiya Wanikiya unkitawapi kin eciyatanhan iyakic̣uya unkakaśtanpi kin.

⁷ Hecen iye towaonśida kin on etanhan unyaowotanpidan kinhan, wiconi owihanke wanica unkapepi kin eciyatanhan, taku iye tawa kin he tawaunyanpi kta.

⁸ Iapi kin he wowicake; qa heon hena taku kin ohinniyan yasutaya iyae kta wacin; tona Wakantanka wicadapi kin hena wicoḣan waśte wacin ksamya opapi kta. Hena taku waśte, qa wicaśta kin en wawokihi.

⁹ Tuka witkoya wiwangapi, qa wicoicage oyakapi, qa wawakipajinpi, qa woope akinicapi kin hena okamnayan ya wo; hena takudan okihi śni qa ecinśniyan un.

¹⁰ Wicaśta waakinica un kin he wancadan, qa inonpa iyopeyapi kin, ihakamya ḣeyata iyeya wo.

¹¹ Tuwe heceoe cinhan, he wanna yuptanyanpi, qa woaḣtani econ, qa iye atayedan ihdaco kin he sdonyaya.

¹² Tohan niye ekta Artemas, qa iś Tucikos ye waśi kinhan, kohanna Nikopolis ekta en mahi kte ḣinca wo; hen waniyetu waun kta mic̣iconza.

¹³ Zenas woope aie kiyapi kin he, qa Apollos icimani ipi kinhan, takudan icakije śni tanyan iyoopteya yewicakiya wo.

¹⁴ Qa tona unkicicapi kin hena wicoḣan waśte aic̣iciya econpi kta, wicakijapi kin owicakiyapi kta, qa hecen waskuyeca icaḣye śni yukanpi kte śni.

¹⁵ Tona micicapi kin hena owasin nape niyuzapi. Tona wacinyanpi kin eciyatanhan waśteundakapi kin hena nape wicayuza wo. Wowaonśida niyepi owasin en nicipi un nunwe. Amen.