Titos 2 - Dakota Wowapi Wakan Kin

¹ Tuka niye qe taku woonspe ecedan en iyokipi kin hena ecen oie ya wo.

² Wicaśta tankapi kin hena waktaya unpi kta, mdesahan wacin ksamya unpi kta, wacin rawacantkiyapi, wacintano en ecedan unpi kta.

³ Qa winoḣinca tankapi kin iś eya winoḣinca waśte iyecen oḣanyanpi kta, waaiapi kte śni, miniśa ota en iyeic̣iyapi kte śni, qa taku waśte onspe wicakiyapi kta:

⁴ Hecen wikośka kin ksamwicayapi kta, wicaśta yuhapi cinca ko waśte wicakidapi kta;

⁵ Wacin ksapapi kta, ecepidan, tipi awanhdakapi kta, waśteya unpi kta, hihnakupi kin anawicakigoptanpi kta; hecen Wakantanka oie kin yaśicapi kte śni.

⁶ Kośka kin iś nakun wacin ksapapi kte cin iwahokonwicakiya wo.

⁷ Qa taku owasin on wicoḣan waśte kin en waonspekiya nihdutanin kta; woonspe kin en wayuśice śni, wacinksapa, owotanna;

⁸ Qa iapi ecedan qa iyaonpepica śni Kin he nun kta; hecen tuwe itkopatanhan un kinhan, he iśtece kta, taku śica takudan aniie kta okihi śni kin heon.

⁹ Tona wowidake un kin hena itancan wicayuhapi kin anawicakigoptanpi kta, qa taku owasin wakinicapi wanin iyokipi wicayapi kta;

¹⁰ Takudan naḣmana icupi śni, qa wacinyanpi waśte ocowasin en ihdutaninpi kta. Hecen taku owasin on, Wakantanka Wanikiya unhapi kin tawoonspe kin he tanyan yuhapi kta.

¹¹ Wakantanka towaorśida wicaśta owasin wiconi wicakahi kin he wanna tanin;

¹² Wakantanka aktapi śni, qa wicoicage cantiheyapi kin hena eḣpeunyanpi kta, qa nakaha wiconi kin en, wacinksamya, owotanna, wakanyan unnipi kta e onspeunkiyapi.

¹³ Qa wacinyanpi waśte ape unyakonpi kta, Wakantanka iyotan tanka, qa Jesus Messiya Wanikiya unhapi kin he wowitan hduna taniniciye kte cin hee.

¹⁴ He unkiyepi on ic̣ic̣u, woaḣtani owasin etanhan opeunkitonpi kta, qa oyate tawawicaye kte cin wicoḣan waśte nina ḣin akitapi kte cin hena wicahduska kta e heon.

¹⁵ Hena wicoie kin hecen oie ye c̣a, wahokonwicakiye c̣a iyopewicaya wo. Ihnuhan tuwe śicenidake cinhan.