Titos 1 - Dakota Wowapi Wakan Kin

¹ Palos Wakantanka taokiye, qa Jesus Messiya yeśi qon, tona Wakantanka wicakaḣniga, wacinyanpi kte cin heon, qa wowicake wicoḣan waśte en un kin sdonyapi kte cin heon;

² Qa owihanke wanin wiconi opapi kte cin, Wakantanka itonśni okitpani, in aka kagapi kin itokam iwahounyanpi qon he on;

³ Tuka wanna iyehantu qehan, eyanpahapi kin on oie kin hdaotanin, he miye maqupi, Wakantanka Wanikiya unkitawapi kin he eciyatanhan;

⁴ Titos, witaya wacinyanpi kin he eciyatanhan cinkśiwaye cin; Wowaśte, wowaonśida, wookiye ko, Wakantanka Ateyapi kin etanhan, qa Jesus Messiya Itancan Wanikiya unhapi kin eciyatanhan kiciun nunwe.

⁵ He etanhan Krete en yanke ciśi, taku tona yuśtanpi śni kin hena wiyeya eyahnake kta, qa otonwe otoiyohi en hunkayapi wicayakage kta e on; token econ ciśi qon iyececa.

⁶ Tuwe iyaonpepica śni kinhan, wicaśta tawicu wanjidan, qa cinca wacinyanpi wicahduhe cin, wicakis unpi ewicakiyapi qa wanaḣonpi śni kin hececapi śni:

⁷ Waawanhdake cin he takudan iyaonpepica śni un kta, he Wakantanka taokiye kin ee; iśnana wacin en ihduze śni, wacinko śni, miniśa en iyeic̣iye śni, ohitiic̣ida śni, qa mazaska nina akite kte śni;

⁸ Tuka oicimani kin onśiwicada kta, qa taku waśte kin waśtedake kta, wacin ksapa un kta, qa owotanna, wacantkiya, qa iyatahdeic̣iye śni un kta;

⁹ Qa token onspekiyapi qon he iyecen wicoie oyakapi kin sutaya hduhe kta, hecen woonspe ecedan kin on wahokonwicakiya okthi kta, qa tona kipajinic̣iyapi kin hena iyopewicaye kta.

¹⁰ Wicaśta wicaśtapi śni, qa witkoya iapi, qa wicahnayanpi kin heca ota, tona bakiḣdayapi etanhanpi kin hena iyotanpi.

¹¹ Hena iohmus wicayapi kta iyececa; hena e qe tiyohnaka ocowasin yaptanyan iyewicayapi, qa mazaska waḣteśni kin on taku iyecetu śni kin onspewicakiyapi ece.

¹² Iyepi kin etanhan waayate wan heye ciqon; Krete oyate kin ohinniyan itonpiśni, wamanica ocinśice cin, qa wicatezi kuja kin hecapi ce.

¹³ Wayaotanin kin he wowicake. He etanhan nina iyopewicaya wo, hecen wacinyanpi kin en ecedan unpi kta:

¹⁴ Qa hecen Juda oyate hitunkakanpi yuhapi kin, qa wicaśta akantu woope kagapi kin wowicake kaśeye cin hena awacinpi kte śni.

¹⁵ Tona ecedan unpi kin hena taku owasin ecedan yuhapi, qa tona aśapapi qa wicadapi śni kim hena taka ecedan kin takudan yuhapi śni, tuka tawacinpi nagipi ko hena ee kaeś aśapapi.

¹⁶ Hena iś Wakantanka sdonyapi keyapi, tuka wicoḣan on aktapi śni, waḣtepi śni, wanaḣonpi śni, qa wicoḣan waśte owasin en wacintonpi śni.