Roma 6 - Dakota Wowapi Wakan Kin

¹ Hecen taku unkeyapi kta he. Wowaonśida yuotapi kte cin heon wooḣtani en unkitanpi kta he.

² Hiya hecetu śni. Tona woaḣtani ekta unṭapi kin, token he en nakun unnipi kta he.

³ Tona Jesus Messiya en baptem wicaqupi kin hena iye ṭe cin en baptem wicaqupi kin he sdonyayapi śni he.

⁴ Heon etanhan baptem eciyatanhan he kici unhnakapi, wiconṭe kin en, hecen iye Atkuku towitan kin Messiya wicaṭe cin etanhan ekicetu ye ciqon he iyecen unkiś eya wiconi teca kin en maunnipi kta.

⁵ Qa iye ṭe cin iyacinpi kin en kici huunhdepi hecinhan, nakun he piya ikicage cin en iyecen unyakonpi kta.

⁶ Qa wicaśta tanina unhapi kin he iye kici icipaweḣ okatanpi kin he sdonunkiyapi, hecen woaḣtani tancan kin he ihangyapi kta, qa hetanhan woaḣtani wowidag unyanpi kte śni.

⁷ Tuwe ṭe cinhan, he wanna woaḣtani etanhan kiyuśkapi.

⁸ Hecen Messiya kici unṭapi hecinhan, kici unnipi kta e wacinunyanpi.

⁹ Qa Messiya wicaṭe cin etanhan ekicetuyapi qon he ake icimana ṭe kte śni e sdonunyanpi; tokata wiconṭe tohinni yuha okihi kte śni.

¹⁰ He ṭe ciqon wancadan woaḣtani on ta; qa he kini kin Wakantanka on ni un.

¹¹ He iyecen niś eya woaḣtani on ṭo nihdawapi, tuka Wakantanka ekta ni yannpi, Jesus Messiya Itancan unkiyapi kin eciyatanhan.

¹² Heon nitancan ṭe kte cin en woaḣtani ounye śni nunwe, hecen wocantiheye śice cin anayagoptanpi kte śni.

¹³ Qa nihuhapi kin hena wicoḣan śica en woaḣtani wowinyunye, kta e qupi śni po, tuka wicaṭe cin etanhan ni un kin iyecen Wakantanka ic̣ic̣u po, qa nihuhapi kin wicoowotanna en Wakantanka wowinyunye kiya po.

¹⁴ Woaḣtani icimana inidakapi kte śni. Woope kin ihukuya yaunpi śni tuka wowaonśida kin ihukuya.

¹⁵ Hecen tokeca kta; woope kin ihukuya unyakonpi śni, tuka wowaonśida ihukuya unyakonpi kin heon etanhan waunḣtanipi kta he. Hiya hecetu śni.

¹⁶ Tuwe anayagoptanpi kta inidake nic̣iyapi kin he anayagoptanpi kin on wowidake niyanpi kin he sdonyayapi śni he; he woaḣtani wiconṭe aiyahdeye cin hee, qa iś waanagoptanpi kin on wicoowotanna kta.

¹⁷ Tuka Wakantanka wopida kiciun nunwe, woaḣtani inidnkapi tuka qon; tuka woonspe ecedan en yeniyanpi qon he cante eciyatanhan oyapapi.

¹⁸ Qa woaḣtani etanhan enihdakupi kin, heon Wicoowotanna wowidake niyan yaunpi.

¹⁹ Wicaśta akantu kin iyecen iwaa ce, niceḣpipi waśake śni kin heon etanhan. Wicośice en nihuhapi kin aśapapi qa woaḣtani wowinyunniyanpi kta e iyowinyakiyapi qon, he iyecen nakaha wicayuecedan kin en nihuhapi kin wicoowotanna inidakapi kta e iyowinkiya po.

²⁰ Woaḣtani wowidake niyanpi qehan, wicoowotanna inidakapi śni.

²¹ Hehan taku nakaha on iniśtecapi kin hena en taku waskueca duhapi qon he tukte e he; ena e ihanke kin he wiconṭe ee.

²² Tuka nakaha woaḣtani etanhan enihdakupi, qa Wakantanka wowidake niyanpi, heon wicayuecedan on waskuyeca duhapi, qa he ihanke kin owihanke wanin wiconi kin hee.

²³ Woaḣtani wokajuju kin he wiconṭe ee; tuka Wakantanka taku ituwicakiḣan kin he, Jesus Messiya Itancan unkiyapi kin eciyatanhan, owiḣanke wanin wiconi kin hee.