Roma 5 - Dakota Wowapi Wakan Kin

¹ Hecen wacinyanpi on owotanna unyawapi kin, heon etanhan Wakantanka ekta wookiye unhapi, Jesus Messiya Itancan unkiyapi kin eciyatanhan.

² Qa he iye eciyatanhan en unhiyupi, wowaonśida en ahan naunjinpi kin en, wacinyanpi kin on etanhan, qa Wakantanka towitan kin ape unkiyuśkinpi ece.

³ Qa hecedaii śni, nakun wokakije on unkiyuśkinpi ece; wokakije kin he wacin tankapi kaga e sdonunyanpi;

⁴ Qa wacin tankapi kin he wiyukcanpi, qa wiyukcanpi kin he woape;

⁵ Qa woape kin he iśten wicaye śni, Woniya Wakan unqupi kin he eciyatanhan, Wakantanka towaśte uncantepi kin en unkokicicaśtanpi kin he etanhan.

⁶ Takudan unkokihipi śni kin he icunhan, wanna iyehantu qehan Messiya waḣtanipi sa kin on ta.

⁷ Tuwedan wicaśta owotanna kin on ṭe kte śni naceca; tuka okinni wicaśta waśte on tuwe ṭe kta tawaṭenye kta nace.

⁸ Tuka waḣtanipi sa heuncapi kin he icunhan, Messiya unkiyepi on ṭe cin he en, Wakantanka token canteunkiyapi kin hduotanin.

⁹ Hecen sam iyeya, nakaha iye we kin on owotanna unyawapi kin, iye eciyatanhan wocanniye kin etanhan eunhdakupi kta.

¹⁰ Toka unyakonpi qehan he icunhan, iye Cinhintku ṭe cin eciyatanhan, Wakantanka kici okiciciye unyanpi hecinhan, he sam iyeya kici okiciciya unyakonpi kin, iye ni un kin eciyatanhan ni unyanpi kta.

¹¹ Qa hecedan śni, tuka nakun Wakantanka kin en unkiyuśkinpi, Jesus Messiya Itancan unkiyapi kin eciyatanhan, he etanhan nakaha wookiye unhapi.

¹² Heon etanhan wicaśta wanjidan eciyatanhan woaḣtani wicoicage kin wicehna hiyu, qa woaḣtani etanhan wiconṭe, qa hecen wiconṭe wicaśta owasin akan iwicayaya, owasin waḣtanipi nakaeś.

¹³ Woope kin itokam woaḣtani wicaśta kin ehna un; tuka tukten woope wanice cinhan hen woaḣtani wicakiciyawapi śni ece.

¹⁴ Hececa eśta, Adam qa Moses iyotahedan wiconṭe ounyan, Adam tuwe u kte cin oowa kin hee waḣtani kin tona iyecen waḣtanipi śni kin hena eepi kaeś en ounyan.

¹⁵ Tuka woaḣtani qon he kici wowaonśida kin akidecece śni. Wicaśta wanjidan waḣtani qon he on wicota ṭapi hecinhan, he sam iyeya Wakantanka towaonśida, qa wowaonśida on ituwicakiḣanpi kin he wicaśta wanjidan, Jesus Messiya kin hee on wicota en wicakiciyuota kta.

¹⁶ Qa wicaśta wanjidan waḣtani qon eciyatanhan, wowaonśida on ituwicakihanpi kin he iyecece śni. Wanjidan on etanhan wiconṭe iwicayacopi; tuka wowaonśida on ituhanpi kin he woaḣtani ota etanhan wicayaowotanna kta.

¹⁷ Wicaśta wanjidan waḣtani kin on etanhan wanjidan eciyatanhan wiconṭe ounyan hecinhan, he sam iyeya tona wowaonśida untkana, qa wicoowotanna wicaqupi kin icupi kin hena, wanjidan, Jesus Messiya kin hee, e eciyatanhan wiconi kin en ounyanpi kta.

¹⁸ Heon etanhan woaḣtani wanjidan eciyatanhan, wicaśta owasin en wiconṭe iwicayacopi kin aupi; he iyecen woowotanna wanjidan on etanhan wiconi iwicayaowotanna kin he wicaśta owasin en aupi.

¹⁹ Wicaśta wanjidan waanagoptan śni un qon he etanhan wicota waḣtani sa wicakagapi kin, he iyecen wanji waanagoptan un kin eciyatanhan wicota owotanna wicakagapi kta.

²⁰ Woaḣtani ihduota kte cin heon woope kin hi, tuka tukten woaḣtani yuota ikicage ciqon hen wowaonśida nina sam iyeya ihduota.

²¹ Hecen wiconṭe en woaḣtani ounye ciqon he iyecen wiconi owinanke wanica en wowaonśida ounye kta, Jesus Messiya Itancan unkiyapi kin eciyatanhan.