Roma 3 - Dakota Wowapi Wakan Kin

¹ Hecen Juda wicaśta kin token iyotan un he, qa bakiḣdayapi kin he taku okihi he.

² Taku owasin on iyotan, tuka tokaheya Wakantanka oie kin wicaqupi qon he.

³ Qa wanjikji wicadapi śni eśta, hecen tokeca kta he. Hena wicadapi śni kin he Wakantanka wacinyanpi kin ecetu śni ye kta he.

⁴ Hiya, hecetu śni; Wakantanka wowicake kta, qa wicaśta otoiyohi iton kte śni; wowapi en kagapi qon iyececa; Nioie kin on nindaowotanna kta, qa niyacopi kin en ohiyaye kta ce.

⁵ Tuka waunḣtanipi kin hena Wakantanka toowotanna yutanin kinhan token unkeyapi kta he; Wakantanka kakiświcaye cin he owotanna śni he; (wicaśta akantu kin iyecen iwaa;)

⁶ Hiya hecetu śni; hecetu kinhan token Wakantanka wicoicage kin wicayaco kta he.

⁷ Oiwaton śni kin on etanhan Wakantanka towicake kin he iye towitan kin hduotanin kinhan, token on etanhan waḣtani sa iyecen mayacopi he.

⁸ Qa tokeca taku waśte u kte cin heon taku śica econkupi kte śni he, unkakicagapi qa wanjikji, unkeyapi ce, keyapi kin iyececa; hena wicayacopi kin he owotanna.

⁹ He etanhan tokeca kta; unkiye iyotan unwaśtepi he. Hiya, takuśnina on. Wanna Juda Helenes wicaśta ko, owasin woaḣtani ihukuya yukanpi kin he unyaotaninpi qon.

¹⁰ Wowapi en kagapi qon iyececa; Tuwedan owotanna un śni;

¹¹ Tuwedan okaḣnige śni; tuwedan Wakantanka akite śni;

¹² Owasin icunonpa iyayapi, ptaya ihduśicapi; tuwedan taku waśte econ śni, wanjidan eśta.

¹³ Dotepi kin wicahnakapi yuḣdokapi kin hee; cejipi kin on wicahnayanpi ece, ihapi kin en sinteḣda tage yukan:

¹⁴ Ipi kin wicayaśicapi qa wicoie pa ḣinca ko on ojudan:

¹⁵ Sihapi kin iś weyapi kta e duzahanpi;

¹⁶ Tacankupi kin ohna wicotakuni śni wicokakije ko yukan;

¹⁷ Qa wookiye canku kin he sdonyapi śni.

¹⁸ Qa iśtapi kin itokam Wakantanka kokipapi kin wanica ce.

¹⁹ Woope kin taku tona eye cinhan, tona woope ihukuya un kin hena hewicakiya ece e sdonunyanpi. Hecen wicai otoiyohi iohmus icupi kta, qa wicoicage owasin Wakantanka itokam wicayacopi kta.

²⁰ Heon etanhan iye itokam, woope wicoḣan kin on, wicaceḣpi takudan yaowotanpi kte śni; woope kin eciyatanhan woaḣtani sdonkiyapi ece.

²¹ Tuka nakaha woope codan Wakantanka toowotanna kin yutaninpi; woope qa wicaśta wokcanpi kin he yaotaninpi ece.

²² Wakantanka toowotanna kin, Jesus Messiya wacinyanpi kin eciyatanhan u kin hee, tona wicadapi kin owasin en, qa owasin akan un, qa owasin akiyececapi.

²³ Owasin ḣin waḣtanipi, qa Wakantanka towitan kin iyohi śni unpi.

²⁴ Qa iye towaonśida kin on iyunwin codan owotanna wicayawapi, wopekitonpi Jesus Messiya en un kin he eciyatanhan.

²⁵ He Wakantanka toka qehan ehde, wokajuju kta, iye we kin wacinyanpi kin eciyatanhan, iye toowotanna hduotanin kte, woaḣtani ehanna econpi qon hena kajujupi kin on etanhan.

²⁶ Wakantanka tehan ape un kin en, nakaha iye toowotanna kin hdutanin kta e heon; hecen iye kin owotanna un kta, qa nakun tuwe Jesus wacinye cinhan, he yaowotan kta.

²⁷ Hehan ihdatanpi kin toki un he. He anaptapi. Woope kin tukte e on; wicoḣan kin hee he. Hiya, wacinyanpi woope kin hee on etanhan.

²⁸ Heon woope wicoḣan codan, wacinyanpi on etanhan, wicaśta kin owotanna yawapi e he unkiyukcanpi.

²⁹ Juda oyate iśnana Wakantanka tawapi he; qa Ikcewicaśta tawapi śni he. Hiya, nakun Ikcewicaśta tawapi.

³⁰ Tuwe wacinyanpi on bakiḣdayapi kin yaowotanna kte, qa wacinyanpi eciyatanhan bakiḣdayapi śni kin owotanna yawa kte cin he Wakantanka wanjidan.

³¹ Hecen wacinyanpi kin on woope kin ecetu śni unyanpi he. Hiya, hecetu śni, tuka woope kin unyusutapi.