Roma 2 - Dakota Wowapi Wakan Kin

¹ Heon etanhan wicaśta kin nituwe kaśta, wadaco kinhan iyaonpepica śni yaun kte śni. Taku on wicaśta tokeca daco kinhan he en niye nihdaco, wadaco tuka niś eya he kici taku okonwanjidan ecanon ece.

² Tona wicoḣan hecen econpi kin hena Wakantanka wowicake eciyatanhan wicayaco kin he sdonunyanpi.

³ Qa wicaśta kin, niś tona heconpi kin wicadaco, qa iyecen ecanon kinhan, Wakantanka wicayaco kin he nayecipe kta kecanni he.

⁴ Qa iś iye towaśte wowijice kin ayakta śni he, wacintanka qa wawacinkta yuza tanka koya; qa Wakantanka towaśte kin nihduecetu kta aniye cin hee e sdonyaye śni he.

⁵ Tuka cante niteḣika, qa nihduecetu śni kin eciyatanhan, wocanniye anpetu, qa Wakantanka owotanna wicayaco kin yutaninpi iyehantu kte cin en, wocantiyahde amnayaya he.

⁶ He wicaśta otoiyohi rye oḣan kin eciyatanhan wicakicu ece e kta:

⁷ Tona wicoḣan waśte en ape yukanpi, qa wowitan, woyuonihan, qa ṭepica śni kin akitapi ece kin hena wiconi owihanke wanice kta:

⁸ Tuka tona wakinin unpi, qa wowicake kin anagoptanpi śni, tuka woaḣtani awacinpi kin hena, wosihda, qa wocanniye,

⁹ Wośitkihda, qa wokakije, wicaśta otoiyohi taku śica econ kin wicanagi kin kiciun kta, Juda wicaśta kin he tokaheya, qa hehan Helenes hee kta.

¹⁰ Tuka wowitan, woyuonihan, wookiye ko, tona waśteya oḣanye cin hena kiciun kta, Juda wicaśta kin he tokaheya, qa hehan Helenes hee kta.

¹¹ Wakantanka Wicaśta itohnake ekta etonwe śni ece.

¹² Tona woope codan waḣtanipi kin hena woope codan yutakunipi kte śni, qa tona woope kin en waḣtanipi kin hena woope kin eciyatanhan wicayacopi kta.

¹³ Wakantanka ekta tona woope naḣonpi kin hena owotanna kin eepi śni, tuka tona woope kin ecen econpi kin hena owotanna wicayawapi kta.

¹⁴ Tohan Ikcewicaśta woope yuhapi śni kin hena iye cinka woope wicoḣan kin ecen econpi kinhan, woope yuhapi śni eśta, iś iye woope ihduhapi ece.

¹⁵ Hena iś iye cantepi kin ekta woope wicoḣan owapi kin he hdutaninpi, iye tawiyukcan kin nakun he yaotanin, qa tawacinpi kin otoiyohi tuktekten iyakicionpapi, qa akeś anakiḣmanpi ece.

¹⁶ Anpetu wan en, Wakantanka wotanin waśtemitawa kin eciyatanhan, Jesus Messiya on, wicaśta taku naḣmana awacinpi kin yaco kinhan.

¹⁷ Iho, Juda wicaśta eniciyapi, qa woope kin awacin nanke c̣a Wakantanka oh nihdatan,

¹⁸ Qa iye tawacin kin sdonyaya, qa taku tona waśte kin idukcan, woope kin tanyan onnispe nakaeś;

¹⁹ Qa tona iśta gongapi kin tanyan yewicayaye c̣a, otpaza ehna un kin iyoyamwicaye cin he niye kecannicin;

²⁰ Qa wacinton śni kin hena waonspekiya niyuhapi, qa hokśiyoqopakin onspewicayakiya ece, qa woope kin en woadonye wowicake ko ouncage kin yuha yaun.

²¹ Heon etanhan wicaśta tokeca onspeyakiye cin niś niye onspenic̣iciye śni he. Wamanonpi kte śni keya odake cin, niś niye wamayanon he.

²² Wawiciḣaḣapi econpi kte śni kehe cin, niś niye tuwe wawiyakiḣaḣa he. Wakagapi kin waḣteyada śni kin niś niye tipi wakan kin etanhan wamayanon he.

²³ Niś woope kin en iniwinkta kin, woope kicaksapi kin on Wakantanka wowiśtenyaya he.

²⁴ Niyepi eciyatanhan Ikcewicaśta kin Wakantanka caje kin ośtehdapi ece; wowapi en kagapi qon iyececa;

²⁵ Woope kin oyape cinhan, awicakehan bakiḣdayapi kin taku okihi ece; tuka woope yakaksa ece kinhan, baniciḣdayapi kin he bakiḣdayapi śni icaga.

²⁶ Heon bakiḣdayapi śni kin he woope woowotanna kin tanyan ope cinhan, he bakiḣdayapi śni kin bakiḣdayapi kiciyawapi kte śni he.

²⁷ Qa bakiḣdayapi śni ece kin he woope kin ope cinhan, he, niye oowa qa bakiḣdayapi kin eciyatanhan woope yecakse cin, niyaco kte śni he.

²⁸ Tuwe akan tanhan ecedan hecece cin, he Juda wicaśta kin heca śni; qa bakiḣdayapi akan tanhan qa wicaceḣpi ecedan en un kin he hee śni;

²⁹ Tuka tuwe mahen tanhan hecece cin he Juda wicaśta kin hee, qa bakiḣdayapi kin he oowa kin en he śni, tuka wicanagi kin en un kin hee; he wowitan kin wicaśta akantu eciyatanhan śni, tuka Wakantanka eciyatanhan un.