Roma 14 - Dakota Wowapi Wakan Kin

¹ Tuwe wicada kinhan waśake śni eśta iyowinkiya po, tuka akipam waakinicapi kin ekta śni.

² Wicaśta wanjidan taku owasin yuta okihi awacin, qa wicaśta tokeca waśake śni kin he waḣpe ece yuta.

³ Tuwe wote cinhan he tuwe wote śni kin iḣaḣa kte śni; qa tuwe wote śni kinhan he tuwe wote cin yaco kte śni; Wakantanka he iyowinkiya.

⁴ Nituwe he wicaśta tokeca taokiye kin daco he; he iye yu he cin en najin kta qa iś hinhpaye kta. Qa he ecen najin kiyapi kta, Wakantanka najin kiye kta okihi.

⁵ Wicaśta wanji anpetu wanji iyotandaka, qa wicaśta tokeca wan anpetu owasin akiyecen yawa ece. Otoiyohi iye tawacin ekta sutaya awacin nunwe.

⁶ Tuwe anpetu wan awacin kinhan he Itancan kin on awacin; qa tuwe anpetu kin awacin śni kinhan, Itancan kin ekta awacin śni. Tuwe wote cinlian, he Itancan kin on wota, qa Wakantanka wopida eciya; qa tuwe wote śni kinhan, Itancan kin on wote śni, qa Wakantanka wopida eciya ece.

⁷ Unkiyepi kin tuwedan iye ḣinca on ni śni, qa tuwedan iye ḣiuca on ṭe śni.

⁸ Unnipi kinhan Itancan kin on unnipi, qa unṭapi kinhan Itancan kin on unṭapi. Hecen unnipi, qa unṭapi unma tukte hecinhan, Itancan kin tawa unyanpi.

⁹ Hecen on Messiya ṭe c̣a ake kini, wicaṭe c̣a wicani kin heniyoza en Itancan kta e heon.

¹⁰ Tokeca nihunkawanji daco he; qa tokeca nihunkawanji iyakiḣaḣa he. Owasin Messiya tawoyaco oiyotanke kin itokam inaunjinpi kta.

¹¹ Hecen wowapi en kagapi; Miye wani kin, heon hupahu otoiyohi miye en canpeśka makehde inajin kta, qa wicaceji otoiyohi Wakantanka en wohdake kta, Itancan kin eya.

¹² Heon etanhan unkiyepi otoiyohi Wakantanka kin en wounhdakapi kta.

¹³ Hecen on, detanhan otoiyohi unkiciyacopi kte śni, tuka kaken e iyotan wakonza po, tuwedan taku en siha ibotopi, qa on hinḣpaye kte cin he hunkawanjitku kin itokam ehde kte śni.

¹⁴ Miś sdonwaye c̣a Jesus Itancan kin en awacami, takudan atayedan śape śni; tuka tuwe taku śapa kecin kinhan, he taku kin iye ekta śapa ece.

¹⁵ Qa woyute kin on etanhan nihunkawanji iyokiśin yaye cinhan wowaśtedake eciyatanhan mayani śni. Messiya tuwe on ṭe ciqon he woyute nitawa kin on ihang ye śni wo.

¹⁶ Ihnuhan taku waśte duhapi kin he yaśicapi kinhan.

¹⁷ Woyute qa woyatke kin Wakantanka tokiconze kin hee śni; tuka wicoowotanna wookiye qa Woniya Wakan kin en wowiyuśkin kin hena ee.

¹⁸ Tuwe hena taku kin en Messiya wowidag ye cinhan, he Wakantanka iyokipi ye c̣a, wicaśta kin on waśte dakapi.

¹⁹ Heon etanhan taku tona wookiye kage cin hena unkakitapi kta qa nakun taku on otoiyohi icaḣ unkiciciyapi kta.

²⁰ Woyute kin on etanhan Wakantanka taku kage cin he ihang ye śni wo. Awicakehan taku owasin waśte; tuka tuwe taku yute c̣a on waḣtani wicaye cinhan, he śicu ece.

²¹ Waconica yutapi śni, qa mini śa yatkanpi śni, qa taku tokeca on etanhan nihunkawanji ḣicahe c̣a, wahtani, qa waśake śni aye cin, hena econpi śni kinhan he waśte.

²² Wowacinye duha he: Niś niye Wakantanka itokamya hduha wo. Tuwe taku iyowinkiye cin on ihdaco śni kinhan, he yuwaśtepi ece.

²³ Qa tuwe wicada śni kinhan he yute cinhan wanna yacopi, wacinyanpi kin on hecon śni, heon etanhan. Taku owasin wacinyanpi eciyatanhan śni kin hena woaḣtani.