Roma 13 - Dakota Wowapi Wakan Kin

¹ Wicanagi otoiyohi wicowaśake itancan kin hena ihukun iyeic̣iye kte. Wicowośake Wakantanka etanhan un kin hecedan yukan. Wicowaśake un kin hena Wakantanka kaga.

² Heon etanhan tuwe wicowaśake kin kipajin kinhan he Wakantanka toope kin kipajin, qa tona wawakipajin kin hena wicayacopi kta.

³ Wicaśtayatapi kin hena wicoḣan waśte kin en wakokipe wicakicagapi śni, tuka wicoḣan śice cin en. Hecen wicowaśake kin he koyakipe kte śni he. Taku waśte e econ wo, kinhan on niyatanpi kta ce.

⁴ He taku waśte on niye ekta Wakantanka taokiye kin hee. Tuka taku śica ecanon kinhan kokipa wo. He mazasagye ituḣ yuhe śni; tuka Wakantanka taokiye kin heca, tuwe taku śica econ kinhan tokic̣on kta, wocanniye kin heon.

⁵ Heon etanhan anagoptan yaunpi kta, wocanniye kin hecedan on etanhan śni, tuka nakun wiyukcanpi kin heon.

⁶ Heon etanhan mazaska mnakiyapi kin en oyapapi ece: hena e Wakantanka taokiyepi kin ohinniyan taku kin de econ yukanpi.

⁷ Heon etanhan, owasin taku token wicaqupi kta iyecece cin wicaqu po: Tona iye taoyate kin etanhan mazaska mnayanpi kin he ecen wicaqu po; qa tona oyate tokeca etanhan mnayanpi kin he nakun ecen wicaqu po. Tona kinihanpi kte cin hena wicakinihan po, qa tona yuonihanpi kte cin hena wicayuonihan po.

⁸ Tuwedan takudan ikicazo śni un po, otoiyohi waśte yecidakapi kte cin hecedan. Tuwe wicaśta tokeca waśte wicadake cin he woahope kin tanyan yuha.

⁹ He decetu; Wawiciḣaḣapi ecanon kte śni; Tin wicayakte kte śni; Wamayanon kte śni; Tuwedan en oitonśniyan wodake kte śni; Taku tokan tawapi kin yacin kte śni; qa woahope tokeca yuke cinhan wicoie kin de en yuwitayapi; Wicaśta tokeca niye inihdacin waśte yadake kta ce.

¹⁰ Waśtewicadakapi kin he wicaśta tokeca taku śica takudan ecakicon śni, heon waśtewicadakapi kin he woahope yuecetupi kin hee.

¹¹ Qa nakun kaketu, anpetu kin sdonuayanpi, woiśtinma etanhan unkiktapi kte cin wanna iyehantu; nakaha eunhdakupi kte cin tokaheya wicaundapi qon he isanpa ikiyadan ihan;

¹² Hanyetu kin wanna ecadan unkihunipi kta, anpetu kin kohanna u kta, heon etanhan otpaza wicoḣan kin eḣpeunyanpi, qa iyoyanpa wipe kin kounyakapi kta.

¹³ Qa iyokipiya maunnipi kta, anpetu kin en iyececa. Hanyetu wacipi qa witkopi kin en unkopapi kte śni; wicawihomnipi qa wicinpi, wakinicapi qa winawizipi kin hena en ounpapi kte śni.

¹⁴ Tuka niye Jesus Messiya Itancan kin he koyaka po, qa wicaceḣpi wocantiheye śice cin ecetu yapi kta e on takudan kicamnanpi śni po.