Roma 12 - Dakota Wowapi Wakan Kin

¹ Heon mihunkawanji, Wakantanka wacantohnake cin on etanhan eciciyapi ce, nitancanpi kin wośnapi ni un, wakan, qa taku Wakantanka iyokipi kin, hena hecen yaqupi kta, he wawoyakiyapi kte cin hecetu ḣinca.

² Qa wicoicage kin de en iyecen awacanipi kteśni, tuka nitawacinpi yuecepidan kte cin on nihdutokecapi nunwe; hecen Wakantanka tawacin waśte, oiyokipi, qa hduśtanpi kin he tukte e idukcanpi kta.

³ Wowaonśida maqupi kin he eciyatanhan, tona niyepi ekta un kinotoiyohi hecen eciciyapi; Tuwedan token ihdukcan kte cin he isanpa ihdawa kte śni, tuka wacinksamya ihdukcan kta, Wakantanka otoiyohi wacinyanpi iyuta wicaqu kin he eciyatanhan.

⁴ Wicatancan wanjidan en wicahuha ota unhapi, qa huha kin hena owasin okonwanjidan oḣanye śni:

⁵ He iyecen unkiye unkotapi, tuka Messiya eh tancan unwanjipidan, qa otoiyohi huha unkiciyapi.

⁶ Hecen wowaonśida otoiyohi yukinukanyan unqupi kin eciyatanhan wicookihi ociptetu unhapi; he wokcanpi kte cin hee hecinhan, wowacinye iyutapi kin on unkiyukcanpi ece e kta.

⁷ Qa waowicakiyapi kin hee hecinhan, waowicakiyapi kin en unyakonpi kta; qa tuwe waonspekiya okihi kinhan, he waonspekiyapi kin en un kta.

⁸ Tuwe wahokonwicakiye kte cin he wahokonwicakiyapi kin en un kte; tuwe taku wicaqu kte cin he oḣanpiya econ kte; tuwe oyate wicayuhe cinhan he mnihenya econ kta; qa tuwe onśiwicadake cinhan iyokipiya econ kte.

⁹ Wacantkiyapi kin he wohnaye wanin un nunwe. Taku śice cin he śice dakapi, qa taku waśte kin he en iyaihdaśka po.

¹⁰ Hunkawanjin kiciyapi waśte kicidakapi kin he on otoiyohi cante en kiciyuza po, qa woyuonihan on otoiyohi iyotan kicidaka po.

¹¹ Wicoḣtani kin en kujapi śni, woniya on aic̣iciyapi, Itancan kin okiya po.

¹² Woape en wiyuśkinpi; kakijapi kin en icunhan wacintankapi; qa wocekiye eya yukan po.

¹³ Ton owotanna un kin taku icakijapi kinhan owicakiya po. Wicaśta icimanipi kin oḣanpiya ecawicakicon po.

¹⁴ Tona śicaya nieuwapi kin hena wicayawaśte po; wayawaśte po, qa wayaśicapi śni po.

¹⁵ Tona wiyuśkinpi kin hena om wiyuśkin po; qa tona ceyapi kin hena om ceya po.

¹⁶ Otoiyohi okonwanjidan awakicicin po. Taku wankan un kin hena ekta ewacinpi śni po; tuka tona kun ihdawa kin hena en opa po. Wacinksapeic̣idapi śni po.

¹⁷ Tuwedan taku śica on itkom śicaya econpi śni po. Wicaśta owasin itokamya taku owotanna ecedan kamnan po.

¹⁸ Tohanyan oyakihipi kinhan, wicaśta owasin om wookiye yakon po.

¹⁹ Waśte cicidapi kin, ihnuhan niye cinka watoyec̣onpi kin, tuka wocanniye nakicipa po. Hecen wowapi en kagapi, Tokic̣onpi kin he miye mitawa, wicawecu kta ce, Itancan kin eya.

²⁰ Heon tuwe toka niye cin he wotektehda kinhan wo qu wo; qa ipuza kinhan mini qu wo; hecen ecanon kinhan, petaga kin he pa kin en eju ade kta.

²¹ Ihnuhan taku śica on ohiniyanpi kin, tuka taku waśte e on taku śice cin ktepidan po.