Roma 10 - Dakota Wowapi Wakan Kin

¹ Mihunkawanji, micante cantiheye c̣a taku Wakantanka icewnkiye cin, Israel oyate kin wicani kte cin hee.

² Hena wicaweciyaotanin, Wakantanka wacin en yuzapi tuka he wosdonye eciyatanhan śni.

³ Wakantanka toowotanna kin sdonyapi śni, qa iye wicoowotanna tawapi kin hdusutapi akitapi, qa Wakantanka toowotanna kin he ihukuya iyeic̣iyapi śni.

⁴ Tona wicadapi kin owasin en Messiya kin he wicoowotanna woope woyuśtan kin hee.

⁵ Woowotanna woope kin eciatanhan kin he on Moses kaen owa qon; Wicaśta tuwe hena taku kin econ kinhan, hee hena on ni kta ce.

⁶ Tuka wacinyanpi eciyatanhan wicoowotanna un kin he kaken eya, Nicante kin mahen, Messiya kun ahi kte cin heon tuwe maḣpiya ekta wankan ye kta he;

⁷ Qa, Wicaṭe cin etanhan Messiya yuwankan au kte cin heon tuwe wośbe kin ekta ye kta he, eye śni wo.

⁸ Tuka taku eya he; Wicoie kin he nikiyedan un, nii kin ohna, qa nicante kin en un, wacinyanpi wicoie unkoyakapi kin he hee.

⁹ Nii kin on Jesus Itancan kin yahdaotanin, qa he wicaṭe cin etanhan Wakantanka ekicetu ye cin he, nicante kin eciyatan han wicayada kinhan, yani kta.

¹⁰ Wicoowotanna kta e wicacante on wicadapi, qa wiconi kta e wicai kin on wohdakapi ece.

¹¹ Wowapi wakan kin he he ya, Tuwe he wacinye cinhan, he wiśtece kte śni ce.

¹² Juda qa Helenes oyate kin kici ocikpanipi wanica. Tuwe owasin en Itancan kin he tona hoyekiyapi kin hena owasin en wijinya un.

¹³ Tona Itancan caje kin hoyekiyapi kinhan hena otoiyohi nipi kta.

¹⁴ Tuka tuwe kin wacinyanpi śni kinhan token on he hoyekiyapi kta he; qa he nahaḣin naḣonpi śni kinhan token wacinyanpi kta he; qa tuwedan oyake śni kinhan token naḣonpi kta he.

¹⁵ Qa ekta ye wicaśipi śni kinhan token oyakapi kta he. Owapi qon he hecetu; Tona wookiye wotanin waśte kin oyakapi, qa taku waśte en wotanin waśte oyakapi kin hena sihapi kin iyotan waśte ce.

¹⁶ Tuka owasin wotanin waśte kin anagoptanpi śni. Isaya heye ciqon; Itancan, tuwe unkoyakapi kin wicada he.

¹⁷ Heon etanhan wanaḣonpi kin eciyatanhan wicadapi kin u, qa wanaḣonpi kin he Wakantanka oie kin eciyatanhan.

¹⁸ Unkan miś, Hena naḣonpi śni he, epe. Hiya, hena oqo kin makoce owasin ekta iyaye c̣a wicoie kin maka ihanke kin hehanyan i.

¹⁹ Qa Israel oyate kin he sdonyapi śni he. Tokaheya Moses heya, Tona oyate śni se un kin hena on iyocipaśtakapi kta, qa ikce oyate wacinton śni wan on śinhdaciyapi kta ce.

²⁰ Tuka Isaya nina waditake c̣a heya; Tona omadepi śni qon hena e iyemayanpi, qa tona amakitapi śni qon hena en mihdutanin ce.

²¹ Qa Israel oyate kin hewicakiya, Anpetu osan oyate wanaḣon śni qa waceṭunhdapi kin he nape wicawakiyugata ce.