Roma 1 - Dakota Wowapi Wakan Kin

¹ Palos Jesus Messiya taokiye, yewicaśipi kin en kicopi, Wakantanka tawootanin waśte on kaḣnigapi;

² Ehanna wowapi wakan kin en wicaśta wokcan oyakapi qon hee;

³ Iye Cinhintku Jesus Messiya Itancan unyanpi kin heon etanhan; he qe wicaceḣpi eciyatanhan Dawid cinca kin hetanhan icaga;

⁴ Qa wowaśake on Wakantanka Cinhintku kin hee e yuotaninpi, Woniya Wakan kin eeiyatanhan, wiconṭe etanhan piya ikicage cin he en;

⁵ Iye kin eciyatanhan wowaśte unkicupi, qa oyate owasin wacinyanpi kin anagoptanpi kte cin heon yewicaśipi wicoḣan kin he nakun, iye caje kin on:

⁶ Hena ehna Jesus Messiya wicakico kin he niyepi.

⁷ Tona Roma ekta un kin owasin, Wakantanka waśte wicakida, yaowotanpidan kte cin on wicakico kin hena, wowapi cicagapi. Wowaonśida, wookiye ku, Wakantanka ateunyanpi, qa Jesus Messiya Itancan kin etanhan, nicipi un nunwe.

⁸ Tokaheya, Jesus Messiya eciyatanhan, niyepi owasin on etanhan, Wakantanka mitawa kin wopida ewakiya ece, niye wacinyayapi kin he maka kin owaneaya cajeyatapi kin heon.

⁹ Wakantanka minagi kin eciyatanhan ohowada, iye Cinhintku tawootanin waśte kin en, he sdonmayan, ayaśtan śni wocekiye epa eca, ohinniyan cajeciyatapi ece;

¹⁰ Qa nakaha Wakantanka tawacin kin eciyatanhan ekta ciupi owakihi kte cin heon cewakiya ece.

¹¹ Wanciyakapi nina wacin, woniya etanhan taku wicaqupi wan cic̣upi kta, on niyusutapi kte cin heon etanhan.

¹² Niyepi kin on iyuśkinmayanpi kte cin he waka, niś niye qa miś miye napin wacinunyanpi kin on etanhan.

¹³ Mihunkawanji, he de sdonye śni dukanpi kta wacin śni, wanna ota ekta ciupi kta kepca, tuka dehanyan iyomakipi śni, niyepi ekta waskuyeca wanjikji mduhe kta wacin, oyate toktokeca kin en mduhe cin he iyececa.

¹⁴ Helenes, Ikcewicaśta ko, ksapapi, wacintonpi śni ko, hena iyohi wicaweciye śni waun.

¹⁵ Hecen token owakihi kin, niyepi nakun Roma ekta yaunpi kin, wootanin waśte kin ociciyakapi kta wacin.

¹⁶ Messiya tawootanin waśte kin on imaśtece śni; he niwicaye kte cin on Wakantanka to waśake kin hee, tona wicadapi kin hena en, Juda wicaśta kin he tokaheya, qa hehan Helenes wicaśta kin hena.

¹⁷ Heon etanhan Wakantanka owotanna oḣanye cin he wacinyanpi kin etanhan wacinyanpi ekta yuotaninpi; wowapi qon iyececa, Tuwe owotanna kin he wacinyanpi on ni kta ce.

¹⁸ Maḣpiya kin etanhan Wakantanka tocanniye kin yuotaninpi, woaktaśni owasin qa wicaśta woaḣtani econpi kin en, tona woaḣtani on wowicake kin anaptapi kin hena en.

¹⁹ Hena on Wakantanka token sdonyapi kte cin taninyan un; Wakantanka sdonye wicakiya nakaeś.

²⁰ Maka kagapi kin hetanhan Wakantanka towakan qa towaśake otokahe wanice cin hena tanin, hena wanyagpica śni eśta, taku kage cin on etanhan sdonyapi ece; hecen on woanaḣbe yuhapi kte śni.

²¹ Qa hecen Wakantanka sdonyapi, tuka Wakantanka iyecen yutanpi śni, qa pidapi śni; tuka tawacinpi kin ekta waḣanḣanic̣ida ayapi, qa iye cantepi wacintonśni kin otpas aya.

²² Ksapeic̣idapi kin en icunhan witkotkoka icaḣ ayapi.

²³ Qa Wakantanka ṭepica śni towitan kin he wicaśta ṭe kte cin ouncage kin iyecen yutokecapi, qa zitkadan, wahutopa, watutka kin hena koya.

²⁴ Heon iye cantiheyapi śice cin en Wakantanka awicayuśtan, ihduśapapi kte c̣a, iye tancanpi kin kiciyuśihtinpi kte cin heon.

²⁵ Hena Wakantanka wowicake tawa kin woitonśni kagapi, qa taku icaḣyapi kin he yuonihanpi qa ohodapi, waicaḣ ye cin he isanpa, he qe owihanke wanin yawaśtepi nunwe.

²⁶ Heoa etanhan wocantiheye śice cin en Wakantanka awicay uśtan; hecen winoḣinca wicayuhapi kin hena e wicoḣan owotanna kin yutokecapi, qa owotanna śni econpi ece.

²⁷ Qa wicaśta kin iś eya winyan yuhapi kin he ayuśtanpi, qa iś iyepi otoiyohi winktapi on kicicinpi, wica kin wica kici wowiśtece okiciḣanyanpi, qa iye tancan mahen waḣtanipi kin taku iyohi kte cin he yuhapi.

²⁸ Qa Wakantanka wacin en yuze wacinpi śni kin he iyecen, Wakantanka is eya wicotawacin waḣte śni kin en awicayuśtan, hecen taku wowiśtece kin hduśtanpi kta.

²⁹ Hena e woaḣtani owasin, wiinaḣmanpi, wicośice, waicucupi kte cin, qa oḣinyanpi on iyatahdepi; winawizipi, tin wicaktepi, wakinicapi, wohnaye, qa wocanniye on ojupidan.

³⁰ Waajijipi sa, waaiapi sa, Wakantanka śice dapika, waḣanicidapi, wamnaic̣idapi, ihdatanpi sa, taku śica kagapi sa, hunkakeyapi kin anawicagoptanpi śni;

³¹ Wacintonpi śni, woope kicaksapi, wacantkiyapi śni, wacin tankapi śni, qa waonśidapi śni.

³² Hena Wakantanka toope kin sdonyapi; (tona hecen econpi kin hena wiconṭe iyahdeiqiyapi,) tuka iś iye hecen econpi qa tona heconpi kin hena on iyokipipi ece.