Philippi 4 - Dakota Wowapi Wakan Kin

¹ Heon etanhan mihunkawanji waśte cicidapi, qa cantocikpanipi kin, wowiyuskin mitawa qa wateśdake mitawa kin, Itancan kin en sutaya najin po, waśte cicidapi.

² Yuodiyas eewakiye c̣a, Suntuce cewakiya, Itancan kin en okonwanjidan awacinpi kta.

³ Qa mitawaśi wicake cin ceciciya ce, winoḣinca tona wotanin waśte kin en mici oḣanye cin hena owicakiya wo, qa Klement, qa mitawaśi unmapi, cajepi kin wiconi wowapi kin en un kin hena koya.

⁴ Ohinniyan Itancan kin en iyuśkin po; qa ake, Iyuśkin po, epe.

⁵ Niwaḣbapidan kin he wicaśta owasin sdonyapi kta. Itancan kin kiyadan un.

⁶ Takudan iyokiśinya awacinpi śni po, tuka taku yacinpi kin owasin on, wocekiye, wokidapi qa wopida eyapi ko on Wakantanka oyakidakapi kta.

⁷ Qa Wakantanka tawookiye okaḣniḣpica śni kin he nicantepi qa nitawacinpi kin Jesus Messiya en niyuhapi kte.

⁸ Unkan ehake mihunkawanji, taku wicakapi kin, taku yuonihanpi kin, taku owotanna kin, taku wakan kin, taku waśte dapica kin, taku waśte eyapi kin, wowaśte qa wowitan yuke cinhan, hena awacin po.

⁹ Taku tona onnispepi, qa iyacupi, qa nayaḣonpi, qa miye en wandakapi kin hena econ po, qa Wookiyo Wakantanka kin niyepi kin en nicipi un nunwe.

¹⁰ Itancan kin en nina imduśkin, nakaha unhanketa awamayacinpi kin ḣe piya ḣca aya heon. He de en ihamayaktapi, tuka token on ecamiyeconpi nun tanin śni.

¹¹ Taku imakakije cin he wake śni; taku en micihe cin hena on iyokipiya waun kta e onspemiciciya.

¹² Token waḣpaniya waun kte cin he sdonwakiya, qa token wijinya waun kte cin he nakun sdonwakiya; ohinniyan qa taku owasin on, wimapi, qa wotektewahda kta, wimajica qa mawaḣpanica kte cin onspemakiyapi.

¹³ Messiya waśagmaye cin he eciyatanhan taku owasin owakihi.

¹⁴ Tuka inakakije cin en omayakiyapi kin he tanyan ecanonpi.

¹⁵ Philippi wicaśta, he de sdonya po, wotanin waste otokahe ekta, Makedonia etanhan imadamde c̣ehan, waqupi qa icupi kin icaḣtagya okodakiciye kin niye niśnana omayakiyapi.

¹⁶ Thessalonike ekta waun qon he icunhan, taku imakakije cin on wancadan qa nonpa taku mayakaipi.

¹⁷ Taku maqupi kta wacin kin hee śni, tuka waskuyeca niyepi on sanpa niciyuotapi kte cin he wacin.

¹⁸ Tuka owasin mduhe c̣a wijica waun; niyepi etanhan taku Epaphroditos maqu kin hena iwacu, taku waśtemna wośna waśte, qa Wakantanka iyokipi kin heca he iwamaśeca.

¹⁹ Taku inicakijapi kin owasin Wakantanka mitawa nic̣upi kta, iye woyuha wowitan kin en un kin hetanhan, Jesus Messiya eciyatanhan.

²⁰ Wakantanka Ate unyanpi kin wowitan owihanke wanin kicihan nunwe. Amen.

²¹ Tona Messiya en owotanna un kin hena nape wicayuza po. Hunkawanjin kiciyapi om waun kin hena nape niyuzapi.

²² Tona owotanna un kin hena owasin nape niyuzapi, Kesar tiyohnaka kin hena iyotan.

²³ Jesus Messiya Itancan unkiyapi towaonśida kin niyepi owasin en nicipi un nunwe. Amen.