Philippi 3 - Dakota Wowapi Wakan Kin

¹ Ehake mihunkawanji, Itancan kin en iyuśkin po. Taku kin dena on wowapi cicagapi kin he miye teḣike wadake śni, qa niyepi kin oh waśte.

² Śunka kin on waktaya un po; tona śicaya econpi kin on wakta po; wayuśpapi kin on waktaya un po.

³ Tona bakiḣdayapi, qa wicocante on Wakantanka ohodapi, qa Jesus Messiya en iwinktapi, qa wicaceḣpi wacinyanpi śni kin heuncapi.

⁴ Miś nakun, taku on wicaceḣpi kin wacinwaye kte cin mduha tuka. Tuwe wicaceḣpi wacinyan okihi kecin kinhan he isanpa owakihi.

⁵ Anpetu iśahdogan hehan bamakiḣdayapi, Israel oyate qa Benjamin tawicoun kin hematanhan, Hebrew etanhan Hebrew kin, qa woope kin eciyatanhan Pharisee kin hemaca.

⁶ Ohodapi kin eciyatanhan okodakiciye kin śicaya wakuwa, qa woope woowotanna kin he eciyatanhan takudan iyaonpepica śni waun.

⁷ Tuka taku tona mihdamna qon hena Messiya on takuśni wadake:

⁸ Han, awicakehan taku owasin taku śni wadake, Jesus Messiya Itancan mitawa kin wosdonye oiyokipi kin on, iye on taku owasin toki eḣpewaya, qa hena tacesdi ece mdawa, Messiya iyowahi kte cin heon;

⁹ Qa he en waun kta, mitoowotanna wicoope kin eciyatanhan un kin he wahduhe śni, tuka taku Messiya wacinyanpi eciyatanhan un kin, Wakantanka toowotanna wacinyanpi kin on icage cin hee wacin.

¹⁰ Hecen he iye sdonwaye kta, qa piya ikicage cin wowaśake kin, qa iye kakije cin okicipapi kin hena ko, iye ṭe cin ouncage kin en imacage kta:

¹¹ Hecinhan, wiconṭe etanhan woekicetu kin en iyowahi kte ḣinca.

¹² Wanna dehan iyowahi, qa wanna mayuśtanpi kin ee śni; tuka kuwa amde, okinni taku on Jesus Messiya mayuze cin hee mduze kta.

¹³ Mihunkawanji, nahanḣin mduze mihdawa śni;

¹⁴ Tuka taku wanji ecamon, taku hekta un kin hena akiktonś waun, qa taku tokata un kin hena ekta nape yewakiya ece; hecen oinajinta awaimnanka, Jesus Messiya on Wakantanka wankantuya wicakico kin en oqipe kin yewakiye kte cin heon etanhan.

¹⁵ Heon tona unyuśtanpi kin hecen awauncinpi kta, qa taku on togye wacin duzapi hecinhan, he nakun Wakantanka oniciyakapi kta.

¹⁶ Tuka tohan iyounhipi kin he en woope wanjidan eciyatanhan maunnipi, qa okonwanjidan awauncinpi kte.

¹⁷ Hunkawanjin ciyapi kin, omicipa po, qa tona hecen manipi kin nena iwanwicayaka po, waonspekiya unyaduhapi kin he iyececa.

¹⁸ Wanna ota ociciyakapi, qa nakaha ake ceya omdake, wicaśta ota Messiya can susbeca tawa kin tokaye cin iyecen manipi ece.

¹⁹ Hena owihanke kin he wicotakuniśni; iye tezipi kin Wakantanka yapi, wowiśtece kin en iwinktapi, qa taku makata un kin awacinpi ece.

²⁰ Tuka okodakiciye unkitawapi kin he maḣpiya kin ekta un, qa hetanhan Wanikiya Jesus Messiya Itancan kin hi kta unkapepi.

²¹ Iye untancanpi ḣanye cin he yutokecakta; qa iye tancan wakan kin ouncage kin en icaḣye kta, towaśake on taku owasin ohiye kta okihi kin heon etanhan.