Philippi 2 - Dakota Wowapi Wakan Kin

¹ Heon Messiya on iwicakiyapi yuke cinhan, qa wowaśtedake en imagagaic̣iyapi, qa Woniya kin en kodakiciyapi yuke cinhan, qa wacantkiyapi wowaonśida ko yuke cinhan,

² Mitowiyuśkin kin miciyuśtan po, akiyecen awacannipi, qa wowaśte okonwanjidan duhapi, qa wicotawacin wanjidan yaunpi kta.

³ Waakinicapi qa ihdatanpi kin on takudan ecanonpi kte śni, tuka waḣbayedan yaunpi, qa otoiyohi niye isanpa tokan waśte yecidakapi kta.

⁴ Otoiyohi wicitawa kin ecedan ekta etonwanpi śni po, tuka nakun otoiyohi tokan tawa kin ekta.

⁵ Jesus Messiya token tawacin qon he iyecen wacin duzapi kta.

⁶ He Wakantanka ouncage kin en un, qa Wakantanka kici akidecen yanka keic̣iye cin he wawicakipi śni kecin.

⁷ Tuka ihduśdoke c̣a wowidake un kin ouncage kin iou, qa wicaśta kin iyecen ihdus icaga;

⁸ Qa wicaśta ouncage kin en un qehan, ihduhukuya qa wiconṭe ekta aiyahdeya wanaḣon yanka, can susbeca en ṭe cin he ehan.

⁹ Heon etanhan Wakantanka he tehan wankantuya hduwankan icu, qa caje wan wicacaje owasin isanpa waśte kin he qu;

¹⁰ Hecen Jesus caje kin on, hupahu kin owasin canpeśka makehde enajin kta, maḣpiya ekta un, qa maka akan un, qa maka kin ihukuya un kin henakiya.

¹¹ Qa Wakantanka Ateyapi kin yatanpi kte cin on, Jesus Messiya he Itancan kin ee ce; wicaceji owasin eya oyakapi kta.

¹² Heon waśte cicidapi kin, ohinniyan nayaḣonpi kin he iyecen, en cicipi waun kin hecedan śni, tuka nakaha en waun śni eśta, sanpa wokokipeya cancanic̣iya yanipi kte cin hduśtan po.

¹³ Tuwe cinniciyapi, qa econniciyapi kin he Wakantanka ee, iye toiyokipi kin eciyatanhan niyepi kin en oḣanyan.

¹⁴ Wihnupi qa waakinicapi wanin taku owasin econ po.

¹⁵ Hecen iyaonpepica śni, qa owotanna, wicoicage wan pemni, qa yukśankśanyan un kin ehna Wakantanka cinca ecedan yaunpi kta; hena en maka petijanjan iyecen iyoyanpa yaunpi;

¹⁶ Qa wiconi wicoie kin pazo yaunpi: Hecen Messiya anpetu tawa kin en taku on imawinkta kin he dee, taku śni on waimnanke śni, qa taku śni on ḣtawani śni kin hee.

¹⁷ Unkan wacinyayapi wośnapi wawokiyapi kin en, amihdapson eśta nakun imduśkin, qa niyepi owasin om imduskin kta.

¹⁸ Heon niś niyepi nakun iduśkinpi qa miyeci iniwinktapi ece.

¹⁹ Tuka niyepi kin ekta Timotheos kohanna yewaśi kta wacanmi, Jesus Messiya Itancan kin on, hecen tohan token yaunpi kin sdonwaye cinhan, hehan miś nakun iyokipi waun kta.

²⁰ Tuwe iyecen wacin yuze c̣a iye cinka taku nitawapi kin ihakta kte cin mduhe śni.

²¹ Owasin wicitawa kin akitapi, qa taku Jesus Messiya tawa kin akitapi śni.

²² Tuka he iyutapi kin sdonyayapi, hokśidan wan atkuku kici un kin he iyecen wotanin waśte kin en micica.

²³ Iye kohanna ye waśi kta, tohan token waun kte cin sdonwakiya.

²⁴ Qa miś eya ecadan wau kta e Itancan kin wacinwaya.

²⁵ Tuka Epaphroditos misunka qa mitawaśi, qa kici akicita waun, tuwe u yaśipi, qa tuwe taku imakakije cin omakiye cin, he niyepi ekta hde waśi kta iyececa epca.

²⁶ He niyepi owasin cantonikpanipi, qa iyokiśica un, wayazanke cin nayakiḣonpi kin neon.

²⁷ He qeś wayazanke c̣a wanna ṭe kta ikiyedan, taka Wakantanka onśikida, qa he iśnana śni, tuka miye nakun, hecen woiyokiśice icitakihna mduhe kte śni e heon.

²⁸ Qa heon itonpeyahan hde waśi, ake wandakapi kinhan iduśkinpi kta, qa miś aopten iyokiśica amaye kta.

²⁹ He Itancan kin on etanhan wopida owasin yuha tin u śi po, qa tona hececapi kin wicayuonihan po.

³⁰ He Messiya wicoḣtani tawa kin on wanna aśkadan ṭe kta tuka, wiconi tawa kin itonkipe śni, miye en wawokiyapi aokpaniyan ecanonpi kin he niciyuśtanpi kte cin heon etanhan.