Mattheos 9 - Dakota Wowapi Wakan Kin

¹ Hehan wata kin en okipe c̣a akasanpa kihde c̣a iye totonwe kin en ki.

² Unkan iho, wicaśta ṭaṭake cin wan owinja akan wanka e he en ahipi. Unkan Jesus wacinyanpi kin wanyake c̣ehan ṭaṭake cin heciya; Cinś, cante waśte wo; wayaḣtani kin nicicajujupi ce.

³ Unkan iho, wowapi kagapi kin wanjikji iyakitedan hekiciyapi; Wicaśta kin de śicaya ia.

⁴ Unkan Jesus canteyuzapi kin wanyaka hehan heya; Tokeca cante mahen taku śica awacannipi he.

⁵ Wayaḣtani kin nicicajujupi ce, eyapi; qa iś; Najin qa mani wo, eyapi kin, unma tukte waśakadan he

⁶ Tuka Wicaśta Cinhintku kin woaḣtani maka akan kajuja kta okihi e he sdonyayapi kta; hehan ṭaṭake cin heciya; Najin wo, nitowinja ehdaku qa tiyata hda wo.

⁷ Unkan najin hiyaye c̣a iye ti ekta hda.

⁸ Tuka wicota he wanyakapi hehan yuśinyayapi, qa Wakantanka wicaśta wookihi hinsko tanka wicaqu kin he yatanpi.

⁹ Unkan Jesus hetanhan iyoopta iyaya hehan wicaśta wan Mattheos eciyapi, mazaska mnayanpi kin en iyotanka he wanyaka; qa heciya; Miyahna u wo. Unkan najin hiyaye c̣a ihakam iyaya.

¹⁰ Unkan ti mahen wota iyotanka yanka hehan, iho, mazaska mnayanpi waḣtanipi sa ko ota en hipi, qa Jesus kici iyotankapi, waonspewicakiye cin om.

¹¹ Unkan Pharisee kin iś he wanyakapi hehan waonspewicakiye cin hewicakiyapi; Tokeca Waonspekiye nitawapi mazaska mnayanpi waḣtanipi sa ko om wota he.

¹² Unkan Jesus he naḣon qehan hewicakiya; Tona zanipi kin hena pejihutawicaśta cinpi śni, tuka wayazankapi kin.

¹³ Tuka ya po, qa de taku kapi hecinhan sdonya po; Wowaonśida iyomakipi qa wośnapi wacin śni. Wicaśta owotanna wicakico wahi śni, tuka waḣtanipi sa iyopeiciyapi kta on wahi ce.

¹⁴ Hehan Johannes waonspewicakiye cin en hipi qa heciyapi; Tokeca unkiye qa nakun Pharisee kin ijehan akiḣanunkic̣iyapi, tuka waonspewicayakiye cin akiḣanic̣iyapi śni.

¹⁵ Unkan Jesus hewicakiya; Wakankiciyuza cincapi kin tohanyan tawicu ton kte cin om un kinhan, hehanyan token ecin iyokiśicapi kta he; tuka anpetu u kta tawicu ton kte cin ewicakiciyakupi kta, unkan hehan akiḣaniciyapi kta.

¹⁶ Tuwedan śina teca onśpa wokoyake tanika en akihdag ton śni; kinhan onśpa teca qon he mnawahe kta qa sanpa tanka ḣdecahan aya ece.

¹⁷ Nakun miniśa teca ojuha tanika en okaśtanpi śni ece; kinhan ojuha kin napopa, qa miniśa kin skepa, qa ojuha kin ihangyapi ece. Tuka miniśa teca ojuha teca en okaśtanpi ece, hecen napin tanyan yuhapi.

¹⁸ Hena hecen ewicakiya icunhan, iho, wicaśta itancan wan en u qa canpeśka makehde inajin qa heciya; Micunkśi nakaha ṭa, tuka en yau qa nape on ayaputake cinhan kini kta.

¹⁹ Unkan Jesus najin qa kici hda, nakun waonspewicakiye cin.

²⁰ Unkan iho, winoḣinca wan waniyetu ake nonpa wayazanka, we ece iheya, he idazatanhan en u qa taśina opapun kin yutan:

²¹ Taśina kin hee kaeś mdutan kinhan amasni kta ce, cante mahen eye c̣a hecon.

²² Tuka Jesus ihdamna, qa wanyake c̣ehan heya; Cunś, cante waśte wo; wacinyaye cin he asniniyan ce. Unkan wihiyayedan oape kin he en winoḣinca kin asni.

²³ Unkan Jesus wicaśta itancan qon ti kin en i, qa tona cotanka yajopi, oyate ceyapi ko wanwicayaka;

²⁴ Hehan hewicakiya; Ako iyaya po; wicinyanna kin ṭe śni, tuka iśtinma ce. Unkan iḣaḣapi.

²⁵ Tuka oyate tankan hdicuwicayapi, hehan ti mahen i, qa nape on yuza; unkan wicinyanna kin inajin.

²⁶ Unkan he makoce kin owancaya oyakapi.

²⁷ Unkan Jesus hetanhan iyoopte iyaya, hehan wicaśta nom iśtagongapi kin hena ihakam yapi, howayapi qa heyapi; Dawid Cinhintku onśiunkida miye.

²⁸ Unkan ti mahen iyaya, hehan wicaśta iśtagongapi kin en hipi: Unkan Jesus hewicakiya; Hecen ecamon kta owakihi wicayadapi he. Unkan, Han, Itancan, eyapi.

²⁹ Hehan iśta en wicayutan qa heya; Wacinyayapi kin iyecen ecaniconpi nunwe.

³⁰ Hecen iśta hdukawapi. Unkan Jesus waśagya wahokonwicakiye c̣a heya; Ito tuwedan sdonye kte śni

³¹ Tuka tankan hdapi hehan makoce kin he owancaya nina oyakapi.

³² Unkan hena iyayapi hehan iho, wicaśta wan ia okitpani, wakan śica yuhnaśkinyan, he en ahipi.

³³ Unkan wakan śice cin napeyapi hehan ia okitpani qon ia; unkan oyate kin inihanpi qa heyapi; Israel en tohinni decen wanyakapi śni tuka qon.

³⁴ Tuka Pharisee kin heyapi; Wakanśica itancan kin on taku wakan śica napewicaya ece.

³⁵ Unkan Jesus otonwe kin owasin, otonwe ciqadan ko iyaza un, omniciye tipi yuhapi kin ohnahna waonspekiye c̣a wokiconze wotanin waśte kin he oyaka ece; qa wayazankapi owasin, oyate kin en teḣiya unpi ko asniwicaya ece.

³⁶ Tuka wicota wanwicayaka hehan onśiwicakida; nina mdokiṭapi qa enanakiya iyayapi ece, taḣinca wanunyanpi tuwedan wicayuhe śni iyececa.

³⁷ Hehan waonspewicakiye cin hewicakiya; Awicakehan woksapi kin he tanka, tuka ḣtanipi kte cin hena tonana:

³⁸ Heon etanhan woksapi en Itancan kin iye tamaga kin en wicaśta ḣtanipi kte cin hena hiyuwicaye kta icekiya po.