Mattheos 8 - Dakota Wowapi Wakan Kin

¹ Unkan paha kin etanhan kun ku qehan, wicota ḣinca ihakam unpi.

² Unkan iho, wicaśta wan lepros ececa he en hi qa canpeśka makehde inajin qa heciya; Itancan, yacin kinhan, asnimayaye kta oyakihi.

³ Unkan Jesus nape ekta yekie c̣a yutan, qa heciya; Wacin; hecen asni wo. Unkan ecehnana wowayazan kin ayuśtan.

⁴ Unkan Jesus heciya; Ihunhan tuwe oyakidake cinhan; tuka ekta ye c̣a wośnapi kage cin he en ihdutanin wo, qa taku Moses econniśi qon he wayuśna wo, sdonyapi kta e heon etanhan.

⁵ Unkan Jesus Kapernaum en hi qehan, akicita tancan wan en u qa cekiya;

⁶ Qa heya; Itancan, hokśidan mitawa tiyata wanka ṭaṭaka, nina yazan.

⁷ Unkan Jesus heciya; Wau qa aśniwaye kta.

⁸ Hehan akicita opawinge wicayuhe cin he ayupte c̣a heya; Itancan, wati en timahen yau kta iyemacece śni; tuka oie kin ecedan eya wo, kinhan hokśidan mitawa asni kta:

⁹ Miś eya wicaśta itancan hemaca, qa akicita wicamduha; unkan wanji, Ya wo, ewakiya eca, ya ece; qa wanji tokeca, U wo, ewakiya eca, u ece; qa mitaokiye, Kaken econ wo, ewakiya eca, ecen econ ece.

¹⁰ Unkan Jesus he naḣon qehan yuśinyaya, qa ihakam unpi kin hewicakiya; Awicakehan heciciyapi, Israel hee kaeś en wacinyanpi hinsko tanka iyewaye śni ce.

¹¹ Nakun heciciyapi; Wiyohiyanpa tanhan qa wiyoḣpeya tanhan wicota upi kta, qa Abraham qa Isaak qa Jakob om iyotankapi kta, maḣpiya wokiconze kin en:

¹² Tuka wokiconze cincapi kin hena tankan iyewicayapi kta, otpaze ḣinca ekta; heciya wicaceya hi hdakinskinzapi ko yuke kta.

¹³ Unkan Jesus akicita opawinge wicayuhe cin heciya; Hda wo, wacinyaye cin iyecen ecaniconpi nunwe. Unkan wihiyayedan oape kin he en hokśidan tawa kin asniyanpi.

¹⁴ Unkan Jesus Inyan ti kin en tin iyaya, hehan kunku kin makata wanka wanyaka, tancan kata.

¹⁵ Unkan nape kin yutan, hehan tancan kate cin ayuśtan; unkan najin qa wowicakihan.

¹⁶ Wanna ḣtayetu hehan wakan śica wicayuhnaśkinyan ota en awicahipi; unkan oie kin on wakan śica napewicaya; qa tona wayazankapi kin owasin asniwicaya.

¹⁷ Hecen Isaya wicaśta wokcan taku eye ciqon he yuecetupi kta; he kaken eya; Iye teḣiya unyakonpi kin eunkiciyakupi qa waunyazanpi kin yutokan iyeunkiciciyapi ece.

¹⁸ Unkan Jesus wicota ḣinca ihdukśan yukanpi kin hena wanwicayaka hehan akasanpa yapi kta keya.

¹⁹ Unkan wowapi kaga wan en hi qa heciya; Waonspekiya, tokiya da eca cihakam waun ece e kta.

²⁰ Unkan Jesus heciya; Śungidan waśun tonpi, qa maḣpiya okinyanpi kin hoḣpi yuhapi ece; tuka Wicaśta Cinhintku kin tukten pa ipahinye kta yuhe śni.

²¹ Hehan waonspewicakiye cin tokeca wanji heciya; Itancan, tokaheya wahde c̣a ate weḣe kta e iyowinmakiya ye.

²² Tuka Jesus heciya; Mihakam un wo; ito ṭapi kin hena tona kiṭapi kin wicakiḣapi kta.

²³ Unkan wata wan en opa, hehan waonspewicakiye cin ihakam upi.

²⁴ Unkan iho, mini kin ekta tate iyumni wan tanka; hecen wata kin taja on akaḣpapi; tuka iye iśtinma yanka.

²⁵ Unkan waonspewicakiye cin en hipi, qa yuḣicapi qa heciyapi; Itancan, niunkiya po, unṭapi kta ce.

²⁶ Unkan hewicakiya; Cistinna wacinyayapi kin, tokeca koyakipapi he. Hehan inajin qa tate mini ko kiśica; unkan amdakedan tanka.

²⁷ Tuka wicaśta kin hena yuśinyayapi qa heyapi; De taku wicaśta ka hwo, hecen tate mini ko anagoptan ece.

²⁸ Unkan akasanpa i, Gadarene makoce tawapi kin en, hehan wicaśta nom wakan śica wicayuhnaśkinye cin hena itkokipapi, wicaśta hnakapi kin etanhan upi, wohitikapi ḣinca, hecen tuwedan canku kin he ohna ye kta okihi śni.

²⁹ Unkan iho, heya howayapi; Jesus Wakantanka Cinhintku, taku unkiyotahedan un he; hinaḣinke śni tuka itokam kakiśunyayapi kta on yahi he.

³⁰ Unkan yukanpi kin itehan kukuśe optaye wan wo wicaqupi ece.

³¹ Hecen wakan śice cin hena cekiyapi qa heyapi; Napeunyayapi kinhan kukuśe optaye kin en unkiyayapi kta iyowinunkiya miye.

³² Unkan; Ya po, ewicakiya. Hecen tankata hinanpapi hehan kukuśe optaye kin en iwicayayapi. Unkan iho, kukuśe optaye kin iyuḣpa maya ḣinca apamahde inyang naśdog iyayapi, mde kin en, qa minin ṭapi.

³³ Unkan tona wo wicaqupi qon hena najicapi; qa otonwe en kipi, qa taku owasin oyakapi, wicaśta wakan śica wicayuhnaśkinyanpi qon, taku ecawicakiconpi kin hena koya.

³⁴ Unkan iho, otonwe kin ocowasin Jesus itkokim upi, qa wanyakapi qehan, makoce tawapi kin etanhan hde kta icekiyapi.