Mattheos 7 - Dakota Wowapi Wakan Kin

¹ Wayacopi śni po, hecen niyacopi kte śni.

² Woyaco tukte e on wadacopi hecinhan he on niś eya niyacopi kta; qa wiyutapi tukte e on widutapi eca hee on winiciyutapi ece e kta.

³ Qa nisunka iśta kin en takuśni yanka e tokeca wandaka he; qa cankaga wan niiśta ohna yanke cin he wanyahdake śni.

⁴ Qa iś token nisunka, Ito niiśta kin etanhan takuśni kin icicicu kta, eyakiye kta he; qa iho, cankaga wan niiśta ohna yanka ce.

⁵ Wanaic̣iḣman, tokaheya cankaga iśta ohna niyanke cin he hduśdoka wo; qa hehan takuśni nisunka iśta ohna yanke cin he iyacu kta tanyan wandake kta.

⁶ Taku tona wakan kin hena śunka wicaqupi śni po, qa inyan teḣika nitawapi kin kukuśe wicitokam eḣpeyapi śni po; okinni siha on amanipi kta, qa akeś hdicupi qa niyaḣdecapi kta.

⁷ Da po, kinhan nic̣upi kta; ode po, kinhan iyeyayapi kta; en katoto po, kinhan niciyuḣdokapi kta.

⁸ Tuwe da eca icu ece; qa tuwe ode eca iyeya ece; qa tuwe tiyopa katoto eca he kiciyuḣdokapi ece.

⁹ Unkan enitanhanpi wicaśta wanji cinhintku aguyapi kida kinhan, inyan wanji qu kta he.

¹⁰ Qa hogan kida kinhan wamduśka wan qu kta he.

¹¹ Heon etanhan niye niśicapi eśta, taku waśte nicinca wicayaqupi kta onnispepi ehantanhan, Niyatepi maḣpiya ekta un kin he, sam iyeya tona kidapi kin, taku waśteśte wicaqu ece e kta.

¹² Heon etanhan taku tona wicaśta ecaniconpi kta yacinpi kinhan, hena owasin ecawicakicon po; woope qa wicaśta wokcanpi kin iho hee.

¹³ Tiyopa ciqadan kin he ohna ya po; Tiyopa kin tanka qa canku nakun tanka wicotakuniśni iyahde, qa ohna iyayapi kin wicota ḣinca.

¹⁴ Tuka tiyopa kin ciqadan qa canku nakun ocistiyedan wiconi iyahde; qa wicaśta tonana iyeyapi ece.

¹⁵ Wicaśta wokcan itonpiśni kin hena kowicakipa po; hena taḣinca wanunyanpi iyecen koyag en nihipi, tuka mahen śunktokeca wayapota ece kin hecapi.

¹⁶ Waskuyeca tawapi kin on sdonwicayayapi kta. Wicaśta wapepeka etanhan hastanhanka yuśpipi he, qa toka hu kin etanhan suken waskuyeca icupi he.

¹⁷ He iyecen can waśte owasin waskuyeca waśte icaḣya ece; tuka can śice cin waskuyeca śica aicaga ece.

¹⁸ Can waśte kin he waskuyeca śica icahye kta ohihi śni; qa nakun can śice cin he waskuyeca waśte icaḣye kta ohihi śni.

¹⁹ Can otoiyohi waskuyeca waśte aicage śni kin he kawankapi qa petan eḣpeyapi ece.

²⁰ Heon etanhan waskuyeca tawapi on sdonwicayayapi kta.

²¹ Tona, Itancan, Itancan, emakiyapi kin owasin maḣpiya wokiconze kin en yapi kte śni; tuka tuwe Atewaya maḣpiya ekta un kin tawacin kin ecen econ kinhan hee en un kta.

²² Anpetu kin he en wicota hemakiyapi kta; Itancan, Itancan, nicaje on wiunyukcanpi śni he; qa nicaje on taku wakan śica napewicunyanpi; qa nicaje on wicoḣan tanka ota econkupi ce.

²³ Tuka hehan hewicawakiye kta; Tohinni sdonciyapi śni, wicoḣan śica ecanonpi kin mitantanhan iyaya po.

²⁴ Heon etanhan tuwe mioie kin dena naḣon, qa ecen econ kinhan, he wicaśta ksapa e imdacin kta, he qe imnija wan akan ti kicaga.

²⁵ Unkan nina magaju qa minitan aya; nakun tateyanpa ḣinca, qa tipi kin he en iheya, tuka hinḣpaye śni; inyan akan kagapi nakaeś.

²⁶ Qa tuwe mioie kin dena naḣon, tuka ecen econ śni kinhan, he wicaśta witkotkoka iyececa, he wiyaka akan tipi kicaga.

²⁷ Unkan nina magaju qa mini tanka icaga, nakun tateyanpa ḣinca, qa tipi kin he en iheya; unkan hinḣpaya; qa ihangyapi kin he tanka.

²⁸ Unkan Jesus wicoie kin dena ihunnikiya, hehan wicota wahokonwicakiye cin on yuśinyayapi.

²⁹ Wanji wookihi yuhe cin iyecen wahokonwicakiya, qa wowapi kagapi econpi kin iyecece śni.