Mattheos 6 - Dakota Wowapi Wakan Kin

¹ Wicaśta itokam ihnuhan taku ituyaḣanpi kinhan, wanniyakapi kta heon; hecen ecanonpi kinhan Niyatepi maḣpiya ekta un kin he takudan nic̣upi kte śni.

² Heon etanhan tohan taku wicayaqu kta hecinhan nitokam cotanka yajowicayakiye kte śni, wanaic̣iḣmanpi kin omniciye tipi qa canku ohna econpi ece kin iyececa, wicaśta on wicayatanpi kte cin heon; awicakehan heciciyapi; Hena wokajuju hduhapi ece.

³ Tuka niye taku wicayaqu eca ninape etapa taku econ kin he nicatka sdonye kte śni.

⁴ Hecen wawicayaqu kin he naḣmana un kta; qa Niyatepi taku naḣmana un kin wanynku ece kin he iye taninyan nicicajuju kta.

⁵ Qa tohan ceyakiya eca wanaic̣iḣmanpi kin iyenicece kte śni; hena eqe omniciye tipi qa canku oise kin en najin cekiyapi waśtedakapi ece, wicaśta wanwicayakapi kta e heon; awicakehan heciciyapi; Hena wokajuju hduhapi ece.

⁶ Tuka niye qe ceyakiye cinhan, tipi cistinna nitawa kin en timahen yakiyahde c̣a tiyopa ecen iyacu kinhan, hehan Niyate naḣmana un kin he cekiya wo, qa Niyate naḣmana wawanyaka ece kin he taninyan nicicajuju kta.

⁷ Ceyakiyapi kinhan akihdehde oie kic̣unpi śni po, Ikcewicaśta econpi kin iyececa; hena e iapi ota unpi kin on nawicaḣon kta kecinpi.

⁸ Niye hena iyenicecapi kte śni; hinaḣin yakidapi śni itokam, hena taku kin yacinpi, Niyatepi sdonya ece.

⁹ Heon etanhan kaken cekiya po; Ate unyanpi maḣpiya kin en; Nicaje wakandapi kte;

¹⁰ Nitokiconze u kte; Nitawacin ecen econpi nunwe, maḣpiya kin en iyececa, nakun makaakan:

¹¹ Anpetu kin de anpetu woyute unqu miye:

¹² Qa waunḣtanipi kin unkicicajuju po, tona waunkiciḣtanipi wicunkicicajujupi kin he iyececa:

¹³ Qa taku wawiyutanyan un kin en unkayapi śni po, tuka taku śice cin etanhan eunhdaku po: Wokiconze kin he niye nitawa, qa wowaśake kin, qa wowitan kin, owihanke wanic̣a. Amen.

¹⁴ Niye wicaśta waḣtanipi wicayecicajujupi kinhan, Niyatepi maḣpiya ekta un kin he nakun niye nicicajujupi kta.

¹⁵ Tuka niye wicaśta waḣtanipi kin wicayecicajujupi śni ehantanhan, nakun Niyatepi wayaḣtanipi kin nicicajujupi kte śni.

¹⁶ Tohan wote śni yaunpi kinhan wanaic̣iḣmanpi kin iyecen ite śinkiyapi śni po; hena eqe ite hduśicapi ece, hecen wicaśta ekta wote śni unpi e ihdutaninpi kta; awicakehan heciciyapi, Hena wokajuju hduhapi ece.

¹⁷ Tuka niye qe wote śni yaun kinhan pa sdakiye c̣a ite hdujaja wo:

¹⁸ Hecen wicaśta en wote śni yaun nihdutanin kte śni, tuka Niyate naḣmana un kin he en nihdutanin kta; qa Niyate naḣmana wawanyake cin he taninyan nicicajuju kta.

¹⁹ Woyuha maka akan ekihnakapi śni po; hen wamduśkadan qa gigi kin wayutakuniśni ece, qa wamanon sa wayujujupi qa wamanonpi ece.

²⁰ Tuka woyuha maḣpiya kin ekta ekihnaka po; heciya wamduśkadan qa gigi kin wayuśice cin wanica, qa wamanon sa wayujujupi śni qa wamanonpi śni.

²¹ Tukten woyuha niciyankapi hecinhan, nicantepi nakun hen un kta.

²² Wiciśta kin he wicatancan iyoyanpa kin hee; heon etanhan niiśta tokeca śni kinhan nitancan ocowasin iyoyanpa kta:

²³ Tuka niiśta śice cinhan nitancan kin ocowasin otpaze kta. Heon iyoyanpa en niun kin he otpaza hecinhan, otpaza kin he tanka ḣinca.

²⁴ Tuwedan wicaśta itancan nom anawicagoptan kta okihi śni; wanji śice kidake kta, qa unma kin iś wadte kidake kta: wanji en iyaihdaśke kta, qa unma kin iś en etonwe kte śni: Wakantanka qa mammon napin anagoptan oyakihipi kte śni.

²⁵ Heon etanhan heciciyapi; Yanipi kin on nagiyeic̣iyapi śni po, taku yatapi kta, qa taku datkanpi kta; qa nakun nitancanpi on taku kodakapi kta: Wiconi kin he woyute isanpa śni he; qa wicatancan kin iś wokoyake isanpa yawapi śni he.

²⁶ Maḣpiya okinyanpi kin hena wanwicayaka po, hena wojupi śni, qa woksapi śni, qa mazopiye en omnayanpi śni, tuka Niyatepi maḣpiya ekta un kin he hena wo wicaqu ece; unkan niye hena isanpa niyawapi śni he.

²⁷ Niyepi etanhan wanji tukte e he awacannipi on wiciśpa wanjidan kaeś sanpa nihduhanskapi oyakihipi kta he.

²⁸ Qa tokeca wokoyake on iyokiśinniciyapi he; tinta mnaḣcaḣca kin wanyaka po, icage cin; ḣtani śni qa nakun wapahmun śni;

²⁹ Tuka heciciyapi; Solomon wowitan tanka hduha un qon hee kaeś de wanji iyececa wokoyake kic̣un śni.

³⁰ Unkan tinta peji, dehan icage c̣a heyakecinhan oceti en eḣpeyapi ece kin, he Wakantanka hecen koyagya hecinhan, niś niye wacinyan nicistinpidan, sanpa wakoyagniyanpi kte śni he.

³¹ Heon etanhan, Taku untapi, qa taku unyatkanpi, qa taku kounyakapi kta he, eya wacin iyokiśicapi śni po.

³² Taku kin hena owasin Ikcewicaśta akitapi ece; qa Niyatepi maḣpiya ekta un kin he dena takuowasin yacinpi esdonya ece.

³³ Tuka Wakantanka tokiconze kin he tokaheya akita po, qa toowotanna nakun; kinhan dena taku owasin koya nic̣upi kta.

³⁴ Heon etanhan heyakecinhan on iyokiśinic̣iyapi śni po; heyakecinhan he taku tawa kin on iyokiśica ece e kta; anpetu eca taku śica tawa kin yukan ece e kta.