Mattheos 5 - Dakota Wowapi Wakan Kin

¹ Unkan wicota wanwicayaka hehan paha wan ekta iyaya; qa hen iyotanka hehan waonspewicakiye cin en hipi.

² Unkan i hdukawa qa waonspewicakiye c̣a heya;

³ Tona cante mahen onśiic̣idapi kin hena wicayawaśtepi ce; maḣpiya wokiconze kin he tawapi ece.

⁴ Tona ceyapi kin hena wicayawaśtepi; hena wicakihnapi kta.

⁵ Tona onśiḣanpi kin hena wicayawaśtepi; maka kin de tawapi kta.

⁶ Tona woowotanna on wotektehdapi qa ipuzapi kin hena wicayawaśtepi ce; hena imnanpi kta.

⁷ Tona waonśidapi kin hena wicayawaśtepi; hena onświcadapi kta.

⁸ Tona cante en ecepidan kin hena wicayawaśtepi; hena Wakantanka wanyakapi kta.

⁹ Tona wookiye kagapi kin hena wicayawaśtepi; hena Wakantanka cinca ewicakiyapi kta.

¹⁰ Tona woowotanna econpi kin on śicaya kuwapi kin hena wicayawaśtepi; maḣpiya wokiconze kin he tawapi ece.

¹¹ tohan aniiapi qa śicaya nicuwapi, qa miye on itonśniyan taku śica owasin eniciyapi kinhan, niyawaśtepi ece.

¹² Wiyuśkinpi qa nina cante waśte po, maḣpiya ekta ocinyopeniyanpi tanka yanka; wicaśta wokcan nitokam unpi qon hena iś eya hecen wicakuwapi qon.

¹³ Maka miniskuya kin he niyepi. Tuka miniskuya kin he skuye śni kinhan taku e on skuyeyapi kta he; hetanhan takudan okihi kte śni, tankan eḣpeyapi kta qa wicaśta amanipi kta.

¹⁴ Oyate iyoyanpa kin he niyepi. Otonwe wan paha akan kagapi kin he anaḣbepica śni ece.

¹⁵ Nakun petijanjan ideyapi qa koka oḣdateya iyeyapi śni, tuka petijanjan ihupa wan en ośtanpi, hecen tipi kin ohna owasin iyoyamwicaya ece

¹⁶ He iyecen wicaśta itokam iyoyanpa nitawa iyojanjan kta, hecen wicoḣan waśte nitawa wanyakapi kta, qa maḣpiya ekta ateyayapi yanke cin he yuonihanpi kta.

¹⁷ Woope qa wicaśta wokcan kin mdutakuni kte śni on wahi kecinpi śni po, ihangyapi on wahi śni tuka yuecetupi kta on.

¹⁸ Awicakehan heciciyapi; Maḣpiya qa maka kin atakuniśni eśta, oowa wanjidan qa oehnake wanjidan woope kin etanhan icupi kte śni, owasin ecetu kta.

¹⁹ Heon etanhan, tuwe woahope kin dena wanji cistinna ahope śni, qa hecen wicaśta onspewicakiye cinhan, he maḣpiya wokiconze kin en iyotan cistinna yawapi kta; tuka tuwe ecen econ qa iyecen waonspewicakiye cinhan, he maḣpiya wokiconze kin en tanka yawapi kta.

²⁰ Miye heciciyapi ce; Wicoowotanna nitawapi kin, wowapi kagapi qa Pharisee tawapi kin isanpa tanka śni kinhan, maḣpiya wokiconze kin en ecaca oyapapi kte śni.

²¹ Tuwedan yakte kte śni, hunkawicayapi kin eyapi keyapi nayaḣonpi; qa tuwe tin wicakte kinhan he yacopi kta ce.

²² Tuka miś heciciyapi; Tuwe taku on etanhan śni sunkaku śicekidake cinhan he yacopi kta; qa tuwe sunkaku, Waḣteśni, eciye cinhan he omniciye tanka kin en ayapi kta; qa tuwe, Winitkotkoka, eciye cinhan, he Wakanśica tapeta kin en iyoḣpeyapi kta iyececa.

²³ Heon etanhan wośnapi nitawa owayuśna kin ekta ayahi kinhan, qa hen nisunka taku iyanionpa he yeksuya hecinhan;

²⁴ Ito wośnapi nitawa owayuśna kin itokam ehnake c̣a ekta ya wo, tokaheya nisunka kici okiciciye c̣a hehan ku qa wahduśna wo.

²⁵ Tuwe taku en aniu hecinhan he kohanna kici okiciyuwaśte wo, canku ohna kici yaun kin icunhan; okinni wayaco ekta aniye kta, qa wayaco kin iś akicita en aniye kta, qa hecen kaśka nihnakapi kta:

²⁶ Awicakehan heciciya; Tohanyan mazaśadan ehake yahdajuju śni kinhan hetanhan tankan yaku kte śni

²⁷ Wawiciḣaḣapi ecanon kte śni, hunkawicayapi qon eyapi keyapi nayaḣonpi.

²⁸ Tuka miś heciciyapi; Tuwe winoḣinca wan en etonwe c̣a cantiheye cinhan he wanna cante ekta kici Wawiciḣaḣapi econ.

²⁹ Niiśta etapa eciyatanhan kin he waḣtaniniye cinhan hduśdoke c̣a eḣpeya wo; niiśta wanji atakuniśni kinhan he waśte kta, qa tancan ocowasin Wakanśica ti kin en ehpeniyanpi kte śni.

³⁰ Qa ninape etapa kin waḣtaniniye cinhan hdakse c̣a eḣpeya wo; nihuha wanjidan atakuniśni kinhan he waśte kta, qa tancan ocowasin Wakanśica ti kin en iyoḣpeniyanpi kte śni.

³¹ Tuwe tawicu eḣpekiye kta hecinhan kpaganpi wowapi wan qu kta, keyapi qon.

³² Tuka miś heciciyapi; Tuwe tawicu eḣpekiya, wawiciḣaḣapi econ kin on etanhan śni, he wawiciḣaḣapi econkiya ece; qa tuwe winoḣinca eḣpeyapi kin he yuze cinhan he nakun wawiciḣaḣapi econ ece.

³³ Akeś hunka wicayapi qon heyapi keyapi nayaḣonpi; Itonśni nic̣icage kte śni, tuka taku konza Itancan kin eyakiye cinhan hena yahduecetu kta ce.

³⁴ Tuka miś heciciyapi; Taku cajedate c̣a he namaḣon ce, eye śni wo; maḣpiya kin he hecen cajedate kte śni, he Wakantanka oiyotanke tawa kin hee.

³⁵ Qa nakun maka kin de, he Wakantanka siha oahe kin ee; qa nakun Jerusalem hecen cajedate kte śni, Wicaśtayatapi tanka totonwe kin hee.

³⁶ Qa nakun nipa kin he caje yahdate kte śni, paha wanjidan kaeś ska qa iś sapa yakage kta oyakihi śni, heon etanhan.

³⁷ Tuka taku ehe cin, Han, han; Hiya, hiya, ecedan kta; taku dena sanpa kinhan he taku śica etanhan icage kta.

³⁸ Iśta wanji iśta wanjidan on etanhan, qa hi wanji hi wanjidan on etanhan, keyapi nayaḣonpi.

³⁹ Tuka miś heciciyapi; Taku śica tokic̣onpi śni po; tuka tuwe tapon etapa eciyatanhan anipe cinhan unma eciyatanhan kipazo po.

⁴⁰ Qa tuwe woope on niyaco qa onḣdoḣda nici kta cin kinhan, nitaśina nakun teḣinda śni wo.

⁴¹ Qa tuwe wiyutapi hanska wanji hehanyan kici yeniye kta hecinhan, nom kici ya wo.

⁴² Tuwe taku nicida kinhan qu wo; qa tuwe wonicidota hecinhan etanhan ihdamna śni wo.

⁴³ Tuwe nikiyedan un kin he waśteyadake kta, qa tuwe tokaniye cin he śiceyadake kta, eyapi qon nayaḣonpi.

⁴⁴ Tuka miś heciciyapi; Tona tokaniyanpi kin hena cante wicakiya po; qa tona niyaśicapi kin hena wicayawaśte po; tona śicenidapi kin hena taku waśte ecawicakicon po; qa tona taku i en iyeniyanpi qa teḣiya nicuwapi kin hena wecekiye ewicakiciya po.

⁴⁵ Hecen Ateyayapi maḣpiya ekta un kin he cincaniyanpi yaunpi kta; he qe anpetu wi tawa kin wicaśta śica wicaśta waśte ko en awicahinanpeya ece, qa wicaśta owotanna owotanna śni ko awicamagajuya ece.

⁴⁶ Tona waśtenidapi kin hena waśte wicayadapi kinhan wokajuju taku duhapi he; wamnayanpi kin hena eepi kaeś heconpi śni he.

⁴⁷ Qa aunka wicayayapi kin henana napewicaduzapi kinhan, taku econpi ece sanpa tukte e ecanonpi he; wamnayanpi kin hena eepi kaeś heconpi śni he.

⁴⁸ Heon etanhan Niyatepi maḣpiya ekta un kin he owotanna ḣinca he iyecen niś eya owotanna ḣinca un po.