Mattheos 4 - Dakota Wowapi Wakan Kin

¹ Hehan Jesus woniya on ḣewoskan makoce kin ekta ayapi, Wakanśica iyutanye kta e heon.

² Unkan wanna anpetu wikcemna topa qa hanyetu wikcemna topa wote śni un, hehan wotektehda

³ Unkan wawiyutanyan kin en hi qa heciya; Wakantanka Cinhintku kin he niye hecinhan, inyan kin dena aguyapi icage kta keya wo.

⁴ Tuka iye ayupte c̣a heya; Aguyapi ecedan on wicaśta ni kte śni, tuka wicoie otoiyohi Wakantanka i eciyatanhan enanpe cin hena on, hecen wowapi kagapi qon.

⁵ Henan Wakanśica otonwe wakan kin ekta aya, qa tipi wakan oinkpa wan akan ehde;

⁶ Qa heciya; Wakantanka Cinhintku kin he niye hecinhan, hetanhan kun eḣpeic̣iya wo; kaken wowapi en kagapi ce; Taohnihde kin niye on econ wicaśi kta, hecen nape ohna niyuhapi kta, inyan wan en siha iboniṭo kte śni.

⁷ Tuka Jesus heciya; Akeś wowapi en kagapi; Itancan Wakantanka nitawa kin he iyutanyaye kte śni.

⁸ Hehan ake Wakanśica paha wan tehanwankantuya kin he ekta aya, qa maka akan wokiconze kin owasin wowitan ko kipazo;

⁹ Qa heciya; Makata eḣpenic̣iye c̣a ohomayada kinhan, dena owasin cic̣u kta ce.

¹⁰ Hehan Jesus heciya; Satan miḣeyata ya wo; Itancan Wakantanka nitawa kin he ohoyada kta, qa iśnana wowidagniye kta ce, eya owapi tuka qon.

¹¹ Hehan Wakanśica ayuśtan; unkan iho, maḣpiya ohnihde kin en hipi qa okiyapi.

¹² Unkan Johannes kaśkapi he naḣon hehan Jesus Galile ekta iyaya:

¹³ Qa Nazareth eḣpeya iyaye c̣a Kapernaum en hiyanka, he mde kin icahda, Zabulon qa Nephtalim opapun kin hetu.

¹⁴ Hecen Isaya oie qon yuecetupi kta;

¹⁵ Zabulon makoce qa Nephtalim makoce, mde kahda ocanku kin, Jordan akasanpa tanhan, Galile Ikcewicaśta ounyanpi kin:

¹⁶ Oyate otpaza en iyotanke ciqon he iyoyanpa tanka wanyakapi, qa tona wiconṭe makoce qa ohanzi kin en iyotankapi kin hena iyoyanpa awicahinanpa ce.

¹⁷ Unkan hetanhan Jesus woyaka aye c̣a heya ece; Ihduecetu po, maḣpiya wokiconze kin wanna kiyedan u ce.

¹⁸ Unkan Galile mde kin icahda mani icunhan, wicaśta nom sunkakiciyapi wanwicayaka, Simon, Inyan eciyapi, qa sunkaku Andrew eciyapi, ho wan mde kin en iyeyapi; hena hopsicapi kin hecapi:

¹⁹ Unkan hewicakiya; Miyahna u po, kinhan wicaśta wicadupsicapi ece e kta cicagapi kta ce.

²⁰ Unkan ecahankeya ho kin eḣpeyapi qa ihakam iyayapi.

²¹ Unkan hetanhan iyoopta ye c̣a, nakun nom sunkakiciyapi wanwicayaka, Jakob Zebede cinhintku qa sunkaku Johannes, wata kin ohna atkukupi Zebede kici unpi qa ho piyapi; unkan hena wicakico.

²² Iś eya wata kin atkukupi ko oḣankoya eḣpeyapi qa ihakam iyayapi.

²³ Unkan Jesus Galile owancaya iyaya, omniciye tipi yuhapi kin ohna waonspewicakiye c̣a, wokiconze wotanin waśte kin oyaka ece, qa oyate kin en wowayazan owasin qa wicocante śica owasin asniyan ece.

²⁴ Unkan oḣan kin Suriya owancaya oyakapi; hecen tona śicaya yukanpi, qa tona wowayazan ocaje owasin on wayazanpi, qa teḣiya unpi, qa tona taku wakan śica yuhapi, qa ṭaṭapike cin hena koya owasin en awicahipi; unkan asniwicaya.

²⁵ Hecen oyate ota ihakam yapi ece, Galile etanhan, qa Dekapolis qa Jerusalem qa Juda etanhan, qa Jordan akasanpa tanhan.