Mattheos 3 - Dakota Wowapi Wakan Kin

¹ Unkan anpetu kin hena en, Johannes baptem wicaqu ece kin he Juda tamakoce ḣewoskan ekta woyaka hi;

² Qa heya; ihduecetu po, maḣpiya wokiconze kin wanna kiyedan u ce.

³ Isaya wicaśta wokcan cajeyate ciqon he dee, kaken eya; Wicaho ḣewoskan en hotanin; Itancan tacanku kin wiyeya ehnaka po, ocanku tawa kin owotanna kaga po.

⁴ Unkan Johannes eqe tawokoyake taku wan kamel eciyapi he hin kin on kagapi, qa teḣmiso wan ipiyagkiton; unkan tawoyute kin psipsicadan qa tuḣmaga canhanpi kin hee.

⁵ Hehan Jerusalem qa Juda qa Jordan ihdukśan tanhan owasin en hipi:

⁶ Unkan Jordan en baptem wicaqu, woaḣtani ohdakapi.

⁷ Unkan Pharisee qa Saddukee wicota baptem wicaqu kin en hipi wanwicayaka, hehan hewicakiya; Wamduśka wicoicage kin, wocanniye u kte cin nayecipapi kta tuwe e wahokonniciyapi he.

⁸ Heon etanhan ihduecetupi kta iyececa waskuyeca icaḣya po:

⁹ Qa, Abraham ateunyanpi ce, eyeciyapi kta awacinpi śni po; miye heciciyapi, Inyan kin dena etanhan Wakantanka Abraham cinca kicage kta okihi.

¹⁰ Unkan wanna onspe kin can hute kin en ehnakapi; heon etanhan can otoiyohi waskuyeca waśte aicage śni kin he kawankapi qa petan eḣpeyapi ece.

¹¹ Miye nihduecetupi kta on mini on baptem cic̣upi; tuka wanji iyotan waśaka mihakam u, he tahanpe kin weciyuhe kta iyemicihantu śni; he qe Woniya Wakan qa peta on baptem nic̣upi kta.

¹² Icaduge nape ohna hduha, owanka tanyan hdahinte kta, qa aguyapi su kin dotopiye ohna mnakiye kta, tuka ha kin peta kasnipica śni on ḣuḣnaḣye kta.

¹³ Hehan Jesus Galile etanhan u, qa Jordan ekta Johannes en hi, baptem qupi kta e heon.

¹⁴ Tuka Johannes teḣinda qa heya; Baptem mayaqu kta iyemaceca, qa niś en mayahi he.

¹⁵ Tuka Jesus ayupte c̣a heciya; Dehan iyowinyan wo; decen wicoowotanna ocowasin unśtan kta iyececa. Hehan iyowinkiya.

¹⁶ Unkan Jesus baptem qupi qehan ecahankeya mini kin etanhan itawankanhde hda; unkan iho, maḣpiya kin ayuzamnipi, qa Wakantanka Taniya kin wakiyedan kaḣya kuntkiya u, qa en hiyahan, wanyaka.

¹⁷ Unkan iho, maḣpiya eciyatanhan wicaho wan heya; Micinkśi waśte wakidake cin he dee, on iyomakipi ḣinca ce.