Mattheos 28 - Dakota Wowapi Wakan Kin

¹ Anpetu wakan owihanke kin ekta, wanna anpetu tokaheya ayanpa kta hehan, Mary Magdalene qa Mary unma kin, wicahnakapi kin wanyag hipi:

² Unkan iho, maka śkanśkan wan tanka; maḣpiya eciyatanhan Itancan taohnihde wan kun u, en hi qa tiyopa kin etanhan inyan kin yuptanye c̣a akan iyotanka.

³ He ite kin wakanhdi kin iyececa, qa tawokoyake kin wa iyecen ska:

⁴ Unkan he kokipapi on awanyakapi kin nina cancanpi qa wicaśta ṭapi kin iyecen ayapi.

⁵ Unkan maḣpiya ohnihde kin he waayupte c̣a winoḣinca kin hewicakiya; Niye kokipapi śni po; Jesus icipaweḣ okatanpi qon he oyadepi sdonwaya:

⁶ Den un śni; wanna ihduekicetu, heye ciqon iyececa: Kuwa po, Itancan kin wanke ciqon he wanyaka miye.

⁷ Qa kohanna hdapi qa, Wicaṭe cin etanhan kini ce, waonspewicakiye cin ewicakiya po; unkan iho, Galile ekta nitokam iyaya ce, hen wandakapi kta; iho, wanna ociciyakapi.

⁸ Unkan wokokipe wowiyuśkin tanka ko yuha koyaḣanna kihdapi; waonspewicakiye cin hośi wicakakipi kta inyang hdapi.

⁹ Unkan waonspewicakiye cin hośi wicakahdapi icunhan, iho, Jesus itkowicakipa qa heya; Wiyuśkin po. Unkan en hipi qa siha en yuzapi qa ohodapi.

¹⁰ Hehan hewicakiya; Kopehdapi śni po; mihunkawanji owicakiyag ya po, Galile ekta yapi kta; heciya wanmayakapi kta ce.

¹¹ Unkan hena hdapi icunhan, akicita awanyakapi qon etanhan wanjikji otonwe kin en hipi, qa wośnapi kagapi kin taku econpi kin owasin owicakiyakapi.

¹² Unkan hena witaya mniciyapi, wicaḣincapi ko om, qa he akiiapi, hehan akicita mazaska ota wicaqupi;

¹³ Qa heyapi; Unkiśtinmapi icunhan waonspewicakiye cin hanyen hipi qa manon icupi ce, eya po.

¹⁴ Unkan he wicaśta itancan kin naḣon kinhan, unkiye ceunkiyapi kta, qa anaunnicikśinpi kta.

¹⁵ Hecen mazaska kin icupi, qa token onspewicakiyapi kin iyecen econpi; heon wicoie kin he Juda oyate kin en oyakapi ece, anpetu kin dehanyan.

¹⁶ Hehan waonspewicakiye cin akewanjipi, hena Galile ekta iyayapi, paha wan Jesus cajeyate ciqon hetu.

¹⁷ Unkan wanyakapi hehan ohodapi; tuka apa ceṭunhdapi.

¹⁸ Unkan Jesus en wicahi owawicakiye c̣a heya; Maḣpiya ekta qa maka akan wowaśake ocowasin maqupi:

¹⁹ Heon etanhan ya po, oyate kin owasin waonspewicakiya po, qa Ateyapi, Cinhintkuyapi, qa Woniya Wakan kin caje on baptem wicaqu po;

²⁰ Qa taku tona econciśipi kin owasin yuhapi kta e onspewicakiya po. Unkan iho, anpetu owasin cicipi waun, maka owihanke kin hehanyan. Amen.