Mattheos 27 - Dakota Wowapi Wakan Kin

¹ Unkan hanḣanna ḣinca wośnapi kagapi kin owasin qa oyate kin en wicaḣincapi kin hena koya, Jesus token ktepi kta e he aiapi.

² Unkan kaśkapi hehan ayapi, qa Pontios Pilate wicaśta itancan kin he kaipi.

³ Unkan Judas wiyopeye cin he wanna yacopi wanyaka, hehan iyopeic̣iye c̣a, mazaska wikcemna yamni kin, wośnapi kagapi wicaḣincapi ko ake wcakahi;

⁴ Qa heya; Wawaḣtani, wicawe taku iyaonpepica śni kin wiyopewaya ce. Unkan heyapi; He etanhan unkitokecapi śni; he niś niye.

⁵ Unkan mazaska kin tipi wakan kin en eḣpeye ca kihda; qa hetanhan iyaye c̣a poskin ic̣ikte.

⁶ Unkan wośnapi kagapi kin mazaska kin hena icupi, qa heyapi; Mazaska opiye kin en unkohnakapi kta iyecece śni, wicawe iyopeyapi kin dena ee, heon etanhan.

⁷ Hecen wiyukcanpi qa hena on wakśica kage cin tamaga he opetonpi; ohna wicaśta tokeca wicaḣapi kta.

⁸ Heon etanhan maga kin he, Wicawe maga, eciyapi, anpetu kin dehanyan.

⁹ Hehan Jeramiya wicaśta wokcan taku eye ciqon yuecetupi; he kaken eya; Unkan mazaska wikcemna yamni, tuwe iyopeyapi qon, Israel cincapi kin hecen iyacinpi qon, hena icupi,

¹⁰ Qa wakśica kage cin tamaga kin iyopeyapi, Itancan kin econmaśi iyececa.

¹¹ Unkan Jesus wicaśta itancan kin itokam inajin: Qa wicaśta itancan kin wiwange c̣a heciya; Juda wicaśtayatapi kin he niye he. Unkan; Niś heha ce, Jesus eya.

¹² Unkan wośnapi kagapi wicaḣincapi ko taku iyaonpapi, tuka takudan ayupte śni.

¹³ Hehan Pilate heciya; Dena taku iyanionpapi kin nayaḣon śni he.

¹⁴ Tuka oie wanjidan eśta ayupte śni, hecen wicaśta itancan kin nina yuśinyaya.

¹⁵ Wotapi kin de iyehantu eca wicaśta itancan kin wicakaśkapi wanji kiyuśka ece, tukte wanji oyate kin kicapi.

¹⁶ Unkan he ehan wanji tanyan śdonyapi, Barabbas eciyapi, he kaśka hnakapi.

¹⁷ Hecen en mniciyapi hehan Pilate hewicakiya; Unma tukte eiciyuśkapi kta yacinpi he, Barabbas qa iś Jesus nakun Messiya eciyapi.

¹⁸ Winawizipi on he iye en kahipi e sdonya.

¹⁹ Unkan woyaco oiyotanke kin akan kiyotanka hehan tawicu kin tuwe en uśi, qa heciya; Wicaśta owotanna kin he takudan ecakicon śni we, on anpetu kin de wiwahamna en nina mayuśinyaya ce.

²⁰ Tuka wośnapi kagapi wicaḣincapi ko oyate kin wahokonwicakiyapi, Barabbas kicapi kta, qa Jesus ihangyapi kta.

²¹ Hehan wicaśta itancan kin ake wiwicawange c̣a hewicakiya; Unma tukte ciciyuśkapi kta yacinpi he. Unkan, Barabbas, eyapi.

²² Pilate hewicakiya; Jesus nakun Messiya eciyapi kin he token ecamon kta he. Unkan owasin; Icipaweḣ okatanpi kta, eciyapi.

²³ Unkan wicaśta itancan kin heya; Tokeca, taku śica econ kin tukte e he. Tuka nina panpi qa; Icipaweḣ okatanpi kta, eyapi.

²⁴ Hecen Pilate takudan okihi śni, qa nina owodutaton icaga he wanyaka, hehan mini icu, qa wicota wicitokam nape hdujaja, qa heya; Wicaśta owotanna kin de we kin miye en amaupi kte śni; niye ito wanyaka po.

²⁵ Hehan oyate kin iyuḣpa ayuptapi qa heyapi; He we kin unkiyepi qa unkicincapi koya en unkaupi nunwe.

²⁶ Unkan hehan Barabbas wicakiciyuśka; qa Jesus kapsinpsinta hehan icipaweḣ okatanpi kta e wicaqu.

²⁷ Hehan wicaśta itancan taakicita kin Jesus ti mahen ayapi, qa wicobe ocowasin en mniciyapi.

²⁸ Qa iye tawokoyake kiyuśdokapi, qa śina duta wan inkiyapi.

²⁹ Qa wapepeka kazontapi on wateśdake kagapi qa teśdagkicatonpi, qa cedi wan nape etapa kin on yuskiyapi; qa itokam canpeśka makehde inajinpi, qa iḣaḣapi, qa heyapi; Iho, Juda Wicaśtayatapi kin.

³⁰ Qa atagośapi, qa cedi kin icupi qa pa en apapi.

³¹ Unkan hecen iḣaḣapi hehan śina kin ekiciyakupi qa iye tawokoyake qon kic̣unkiyapi, qa icipaweḣ okatanpi kta ayapi.

³² Tankan ayapi hehan wicaśta wan Kurene etanhan, Simon eciyapi, he wanyakapi; unkan he cansusbeca kin kicic̣inkiyapi.

³³ Unkan makoce wan Golgotha eciyapi, he wicapahu makoce eyapi kin he kapi, he ekta ipi;

³⁴ Hehan miniśa pizi icahiyapi kin hetanhan yatkekiyapi; tuka uta hehan yatke kta wicada śni.

³⁵ Unkan hen icipaweḣ okatanpi, oeconna econpi qa tawokoyake kicipamnipi. Hecen wicaśta wokcan oie qon yuecetupi; Mitawokoyake kicipamnipi qa onḣdoḣda mitawa on oceonua econpi ce.

³⁶ Unkan hen iyotankapi qa awanyakapi:

³⁷ Qa wiyaonpapi kin de owapi qa pa iwankam ehnakapi; JESUS, JUDA WICAŚTAYATAPI KIN HE DEE.

³⁸ Nakun wicaśta wamanon sa nom kici icipaweḣ owicakatanpi, unma etapa eciyatanhan, qa unma is catka tanhan econpi.

³⁹ Unkan tona en hiyayapi kin hena aiapi, qa apomnamnapi;

⁴⁰ Qaheyapi; Tipi wakanihangyaye c̣a anpetu yamni ake piya yakage kte ciqon, niic̣iya wo. Wakantanka Cinhintku kin he niye hecinhan, cansusbeca kin etanhan kun ku wo.

⁴¹ He iyececa, wośnapi kagapi kin iḣaḣapi, qa wowapi kagapi wicaḣincapi ko om heyapi;

⁴² Wicaśta tokeca niwicaya ece, iye niic̣iye kta okihi śni; Israel wicaśtayatapi tawapi hecinhan, iho, wanna cansusbeca kin etanhan kun ku kta, kinhan wicaundapi kta.

⁴³ Wakantanka wacinkiye ciqon; tawa kta hecinhan wanna ehdaku kta; Wakantanka Cinhintku kin he miye ce, eye ciqon.

⁴⁴ Nakun wicaśta wamanon sa, kici icipaweḣ owicakatanpi kin hena iś eya iyecen i en hiyeyapi.

⁴⁵ Unkan wihiyayedan oape śakpe hetanhan napcinwanka ape cin hehanyan makoce kin owancaya otpaza.

⁴⁶ Unkan napcinwanka apa hehantu ecetu, Jesus howaye c̣a hotankakiya heya; Eli, Eli, lama sabakthani; Wakantanka mitawa, Wakantanka mitawa, tokeca eḣpemayaya he, eyapi kin hee.

⁴⁷ Unkan en najinpi kin he naḣonpi qehan, apa heyapi; Elias kipan ce.

⁴⁸ Unkan wanji etanhan inyang ye c̣a mini iyuḣepe wan icu, qa miniakuya en oputkan, cedi wan icape c̣a yatkekiya.

⁴⁹ Unmapi kin heyapi; Hinnahanka, Elias nikiya hi kta hecinhan ito wanunyakapi kta.

⁵⁰ Tuka Jesus ake hotankakiya hotanin qehan, taniya kin hiyuya.

⁵¹ Unkan iho, tipi, wakan cokaya ozanpi kin he okiyuḣdecapi, wankantanhan qa kun ihanke kin hehanyan; nakun maka kin śkanśkan qa inyan namdecapi:

⁵² Qa wicaḣapi kin yuḣdokapi, qa wicaśta waśte iśtinmapi kin hena ota hiyupi;

⁵³ Qa wicahnakapi kin etanhan hninanpapi, qa otonwe wakan kin en hipi, qa wicota en taniniciyapi.

⁵⁴ Unkan akicita tancan qa tona om Jesus awanyake cin hena maka kin śkanśkan qa taku econpi ko wanyakapi qehan, nina yuśinyayapi, qa, Awicakehan Wakantanka Cinhintku kin he dee tuka ce, eyapi.

⁵⁵ Unkan winoḣinca ota hen unpi qa itehanyan wanyakapi; tona Galile etanhan upi qa okiyapi ece qon:

⁵⁶ Mary Magdalene he wanji ee, qa Mary Jakob qa Joses hunku, qa Zebede cineca hunkupi kin.

⁵⁷ Wanna ḣtayetu hehan Arimathea etanhan wicaśta wijica wan en hi, Joseph eciyapi, he nakun Jesus waonspewicakiye cin wanji ee;

⁵⁸ He Pilate en i, qa Jesus tancan kin kida. Hehan Pilate tancan kin he quwicaśi.

⁵⁹ Unkan Joseph tancan kin he icu qehan, miniḣuha ska wan opazunta;

⁶⁰ Qa ohna hnakapi tawa teca, imnija kin en kaḣdoke cin, he en ohnaka; qa inyan wan tanka ohna hnakapi i kin en eonpa, hehan kihda.

⁶¹ Unkan ohna hnakapi kin iyotakons, Mary Magdalene qa Mary unma qon iyotankehan yukanpi.

⁶² Unkan anpetu en ihduwiyeyapi ece kin he ihanḣanna, hehan wośnapi kagapi qa Pharisee kin hena Pilate en hipi,

⁶³ Qa heyapi; Itancan, wicahnaye sa kin de ni un qehan, Anpetu yamni hehan wakini kta ce, eya keyapi, he unkiksuyapi.

⁶⁴ Heon etanhan wicahnakapi kin natag wicaśi wo, anpetu yamni hehanyan; okinni waonspewicakiye cin hena en hipi qa tancan kin manon akiyahdapi kta, qa hehan, Wicate cin etanhan kini ce, oyate kin ewicakiyapi kta; hecen ehake wicahnayanpi kin he tokaheya kin isanpa tanka kta.

⁶⁵ Pilate hewicakiya; Akicita wicaduhapi; hdapi qa token oyakihipi sutaya nataka po.

⁶⁶ Hecen kihdapi qa wicahnakapi kin sutaya natakapi; inyan kin he apuspapi qa akicita en najinwicakiyapi.