Mattheos 25 - Dakota Wowapi Wakan Kin

¹ Hehan maḣpiya wokiconze kin witanśna unpi wikcemna iyacinpi kta; petijanjan ihupa ikikcupi qa tawicu ton kte cin he itkokim iyayapi.

² Unkan zaptan ksapapi, qa zaptan witkotkokapi.

³ Witkotkokapi kin hena petijanjan ihupa icupi, tuka wihdi takudan yuhapi śni.

⁴ Tuka ksapapi kin hena cega ohna wihdi hduhapi, petijanjan ihupa iyahna.

⁵ Unkan tawicu ton kte cin he u śni; hehanyan iyuḣpa ḣbapi qa iśtinmapi.

⁶ Unkan hanyecokaya hehan wicaho wan tanin, Iho, tawicu ton kte cin he u ce; itkokim ya po.

⁷ Hehan witanśna unpi kin hena owasin iyotankapi, qa petijanjan kin piyapi.

⁸ Unkan witkotkokapi kin hena ksapapi kin hewicakiyapi; Wihdi nitawapi etanhan ongege unqu miye, petijanjan unkicisnipi kta.

⁹ Tuka ksapapi kin waayuptapi qa hewicakiyapi; Hiya, okinni unkiye niyepi nakun iyounhipi kte śni; tuka tona wopetonpi ece kin ekta ya pe, qa epeiciton miye.

¹⁰ Unkan he opeton iyayapi, hehan tawicu ton kte cin he hi; unkan tona wiyeya unpi kin hena wakankiciyuzapi kte cin en kici iyayapi; hehan tiyopa kin ecen icupi.

¹¹ Iyohakam witanśna unpi unmapi kin en hipi, qa heyapi; Itancan, Itancan, tiyopa unkiciyuḣdoka miye.

¹² Tuka iye waayupte c̣a; Sdonciyapi śni, awicakehan eciciyapi ce, eya.

¹³ Heon etanhan kiktahan un po, anpetu qa wihiyayedan oape kin tukte wanji en, Wicaśta Cinhintku kin hi kte cin he sdonyayapi śni.

¹⁴ He iyecen wicaśta wan makoce tokeca ekta ye kta, hehan wowidake wicayuhe cin wicakico, qa woyuha tawa kin wicakipamni.

¹⁵ Unkan wanji mazaska tkeutapi tanka zaptan qu, qa wanji nom, qa wanji iś wanjidan qu; otoiyohi token okihi kta hecen wicaqu; hehan icimani iyaya.

¹⁶ Unkan tuwe tkeutapi tanka zaptan icu qon he iyaye, c̣a on wopeton ece econ, qa nakun tkeutapi tanka zaptan kamna.

¹⁷ Qa tuwe nom icu qon iś eya iyecen nom nakun kamna.

¹⁸ Tuka tuwe wanjidan icu qon he iyaye c̣a, maka qe c̣a, yuhe cin mazaska tawa kin inaḣma.

¹⁹ Unkan wanna tehan hehan wowidake unpi kin dena itancan tawapi kin hdi, qa wicakiciyawa.

²⁰ Unkan tuwe tkeutapi tanka zaptan icu qon he zaptan toktokeca koya ahi qa heya; Itancan, tkeutapi tanka zaptan mayaqu; iho, nakun tkeutapi tanka zaptan hena awakamna, eya

²¹ Unkan yuhe cin heciya; Han, wowidake waśte qa wacinyepica; taku tonana on wacinyepica yaun, taku ota yuheciciye kta; niyuha towiyuśkin kin en opa wo.

²² Hehan tuwe tkeutapi tanka nom icu qon he hi, qa heya; Itancan, tkeutapi tanka nom mayaqu; iho, nakun tkeutapi tanka nom hena awakamna.

²³ Itancan tawa kin heciya; Han, wowidake waśte qa wacinyepica; taku tonana on wacinyepica yaun, ito taku ota yuheciciye kta; niyuha towiyuśkin kin en opa wo.

²⁴ Hehan tuwe tkeutapi tanka wanjidan icu qon he hi, qa heya; Itancan, wicaśta niteḣika sdonwaya, tukten woyaju śni eśta etanhan wamnayaya ece, qa tukten taku eḣpeyaye śni kin hetanhan wayapahi ece.

²⁵ Qa kowakipa, heon imdamde c̣a mazaska tkeutapi tanka nitawa maka kin en nawaḣbe; iho, nitawa kin yahduha.

²⁶ Itancan tawa kin waayupte c̣a heciya; Wowidake niśice c̣a nikuja; tukten wowaju śni kin hetanhan wamnawaya ece, qa tukten taku wakada śni hetanhan wawapahi ece e sdonyaya;

²⁷ Heon etanhan mazaska mitawa wicaśta wopetonpi kin yuhewicayakiye kta iyececa tuka; hecen wahdi, qa mitawa oicage ko ewehdaku kta tuka.

²⁸ Heon tkeutapi tanka kin ekiciyaku po, qa tuwe tkeutapi tanka wikcemna yuhe cin he ito qu po.

²⁹ Tuwe taku ota yuho cin he nakun qupi ece e kta, hecen iyakicuya yuhe kta; tuka tuwe takudan yuhe śni kin hetanhan taku ton kin hee kaeś ekiciyakupi ece e kta.

³⁰ Qa wowidake wakamna śni kin he tankan otpaza kin en eḣpeya po; heciya wicaceya qa hi hdakinskinzapi yuke kta.

³¹ Tohan Wicaśta Cinhintku kin wowitan hduha, ohnihdewicaya wakan kin owasin om u kinhan, hehan wowitan oiyotanke tawa kin en kiyotanke kta:

³² Qa itokam oyate kin iyuḣpa mniciyapi kta; unkan wicayukinukan kta, waawanhdake wan taḣinca wanunyanpi, tatokadan etanhan wicapahi ece kin he iyececa.

³³ Qa taḣinca wanunyanpi kin hena iye etapa eciyatanhan, qa tatokadan kin iye catka eciyatanhan ewicahnake kta.

³⁴ Hehan Wicaśtayatapi kin tona etapa eciyatanhan unpi kin hena hewicakiye kta; U po, Ate eciyatanhan niyawaśtepi kin, wokiconze maka kagapi kin ehantanhan wiyeya niciyankapi kin he ito hduha po.

³⁵ Wotektewahda, unkan wo mayaqupi; imapuza, unkan wayatkemayakiyapi; wicaśta matokeca waun, unkan tin hiyumayayapi:

³⁶ Tancomakadan, unkan waamayakaḣpapi; wamayazanka, unkan onśimayadapi; makaśkapi, unkan wanyag mayahipi ece.

³⁷ Hehan wicaśta owotanna kin hena ayuptapi qa heciyapi kta; Itancan, tohinni wotekteyahda wanunniyakapi, qa wo unnic̣upi he; qa inipuza qa wayatkeunniciyapi he:

³⁸ Tohinni wicaśta tokeca yaun wanunniyakapi, qa tin hiyuunniyanpi he; qa tancodan yaun, qa wokoyake unnic̣upi he:

³⁹ Tohinni waniyazanka qa kaśka nihnakapi yaun wanunniyakapi, qa en unnihipi he.

⁴⁰ Unkan Wicaśtayatapi kin waayupte c̣a hewicakiye kta; Awicakehan heciciyapi; Mihunkawanji kin dena cikcistinpidan hecawicayeconpi kin he miye ecamiyeconpi ece.

⁴¹ Hehan tona catka kin eciyatanhan unpi kin hewicakiye kta; Niyaśicapi kin, mitantanhan iyaya po, peta owihanke wanica ekta, wakanśica iye taokiyewicaye cin koya on kagapi qon.

⁴² Wotektewahda, tuka wo mayaqupi śni; imapuza, tuka wayatkemayakiyapi śni:

⁴³ Wicaśta matokeca waun, tuka tin hiyumayayapi śni; tancodan waun, tuka wokoyake mayaqupi śni; wamayazanka qa kaśka mahnakapi waun, tuka onśimayadapi śni.

⁴⁴ Hehan ayuptapi qa heciyapi kta; Itancan, tohinni wotekteyahda, qa inipuza, qa wicaśta tokeca yaun, qa tanconikadan, qa waniyazanka, qa kaśka nihnakapi yaun wanunniyakapi, qa ounniciyapi śni he.

⁴⁵ Hehan awicayupte c̣a heye kta; Awicakehan heciciyapi; Dena cikcistinpidan hecawicayeconpi śni kin he miye ecamiyeconpi śni ece.

⁴⁶ Unkan dena owihanke wanin wokakije kin en yapi kta; tuka wicaśta owotanna kin hena owihanke wanin wieoni kin en yapi kta.