Mattheos 24 - Dakota Wowapi Wakan Kin

¹ Unkan Jesus tipi wakan kin etanhan tankan inanpe c̣a tokan iyaya; unkan waonspewicakiye cin en hipi qa tipi wakan token kagapi kin he wanyag śipi.

² Unkan Jesus hewicakiya; Dena owasin wandakapi śni he; awicakehan heciciyapi; Dena inyan wanji inyan itakihna wanke kte śni, owasin yujujupi kta.

³ Unkan Oliwe paha kin akan iyotankehan yanka, hehan waonspewicakiye cin iśnana en hipi qa heciyapi; Dena tohan ecetu kta, qa niye yahi kte c̣a maka ihanke kta, taku on sdonyapi kta, he ito unkokiyaka miye.

⁴ Unkan Jesus waayupte c̣a hewicakiya; Ihnuhan tuwe nihnayanpi kinhan.

⁵ Wicota mi caje on upi kta qa, Messiya he miye ce, eyapi kta; qa wicaśta ota wicahnayanpi kta.

⁶ Unkan wicokicize qa kicizapi oyakapi kin nayaḣonpi kta; ihnuhan nihinniciyapi kinhan; hena owasin hecetu kte, tuka owihanke kin hinaḣinke śni.

⁷ Oyate wan oyate azuwicaye kta, qa wokiconze wokiconze anatan kta; qa tuktekten wicaakiḣan qa makośikśica qa maka śkanśkan yuke kta.

⁸ Dena owasin wicoiyokiśice tokaheya kin hee.

⁹ Hehan wicokakije en yeniyanpi kta qa niktepi kta; qa micaje on oyate owasin śicenidapi kta.

¹⁰ Unkan hehan wicaśta ota śihdapi kta, qa otoiyohi kicihnayanpi kta qa śicekicidapi kta.

¹¹ Qa wicaśta wokcan itonśni ota icagapi kta, qa wicota wicahnayanpi kta.

¹² Hehan wicoḣan śica ota icage kta, heon wicota waśtedake ciqon he sni aye kta.

¹³ Tuka tuwe owihanke hehanyan najin kinhan he ni kta.

¹⁴ Unkan wokiconze wotanin waśte kin de maka kin owancaya oyakapi kta, oyate owasin en wotanin un kta; qa hehan owihanke kta.

¹⁵ Tohan wośice woihangye kin, Daniel wicaśta wokcan cajeyata qon he tipi wakan kin en han wandakapi kinhan; tuwe yawa kinhan okahniga nunwe;

¹⁶ Hehan tona Juda makoce kin en unpi kin ḣe kin ekta napapi kta.

¹⁷ Qa tuwe tipi akan un kinhan kun ku, qa taku ti mahen tanhan ehdaku kte śni.

¹⁸ Qa nakun tuwe magata un kinhan, hdicu qa wokoyake ikikcu kte śni.

¹⁹ Unkan tona anpetu kin hena en ihduśakapi, qa hokśiyoqopa azinwicakiyapi kin hena woteḣi yuhapi kta.

²⁰ Tuka waniyetu, qa anpetu wakan icunhan, nayajicapi kte śni e ito cekiya po.

²¹ Hehan wokakije tanka kte, maka kagapi kin ehantanhan dehanyan taku hecece śni, qa nakun tohinni tokata ekta hecece kte śni.

²² Qa anpetu kin hena yuptecedan śni kinhan, wicaśta tuwedan ni kte śni; tuka wicakahnigapi kin hena on anpetu kin hena yuptecedan kta.

²³ Hehan tuwe, Messiya den un ce, qa, kakiya un ce, eniciyapi eśta, wicadapi śni po.

²⁴ Messiya itonśni, qa wicaśta wokcan itonśni kin heca icagapi kta, qa wowanyake tanka wicoḣan tanka ko econpi kta, hecen okihipica unkanś wicakaḣnigapi kin hena eepi kaeś wicahnayanpi kta tuka.

²⁵ Iho, itokam hena ociciyakapi

²⁶ Heon etanhan; Iho, ḣewotahedan un ce, eniciyapi eśta, ekta yapi śni po; qa, Iho naḣmana un ce, eniciyapi eśta, wicadapi śni po.

²⁷ Wakanhdi wiyohiyanpa tanhan u, qa wiyoḣpeyata hehanyan tanin hinhda ece, Wicaśta Cinhintku kin hi kte cin he iyecece kta.

²⁸ Tukten taku ṭa wanka ec̣a, hen wamdi kiwitayapi ece e kta.

²⁹ Unkan wokakije anpetu kin hena ahankeya, anpetu wi kin aotpaza kta, qa hanyetu wi kin iyoyanpa kte śni, qa wicanhpi maḣpiya eciyatanhan hinḣpaye kta, qa maḣpiya wowaśake kin yuhuhuzapi kta.

³⁰ Unkan hehan maḣpiya en, Wicaśta Cinhintku kin wowakta tawa kin tanin kta. Hehan maka akan oyate owasin nihinciyapi kta, qa Wicaśta Cinhintku kin wowaśake qa wowitan tanka hduha, maḣpiya śapa akan u wanyakapi kta.

³¹ Unkanmazayahotonpi tanka hotanin kin on ohnihdewicaye cin yewicaśi kta, qa hena tate uya topa eciyatanhan, tona wicakaḣnige ciqon hena wicapahi kta, maḣpiya ihanke kin etanhan unma ihanke kin ekta hehanyan.

³² Wanna suken can kin etanhan wiyacinpi wan onspeic̣iciya po. Can intpa hinaḣin suta śni, qa wanna ape uya, hehan mdoketu kin wanna ikiyedan sdonyayapi ece.

³³ He iyecen dena owasin ecetu wandakapi kinhan, wanna ikiyedan, tiyopa kin ehantu e sdonya po.

³⁴ Awicakehan heciciyapi; Wicoicage kin de ihanke kte śni, ecen dena owasin ecetu kta.

³⁵ Maḣpiya maka ko ihanke kta, tuka mioie kin owihanke kte śni.

³⁶ Tuka anpetu kin he, qa wihiyayedan oape kin he tuwedan sdionye śni; maḣpiya ohnihde kin hena sdonyapi śni; Ate ecedan sdonya.

³⁷ Nowa taanpetu qon hena, Wicaśta Cinhintku kin hi kte cin iyecece kta.

³⁸ Minitan qon isanpa anpetu kin hena en, wotapi qa wayatkanpi, winoḣinca wicayuzapi qa wicaśta hihnawicayapi ece, Nowa wata kin en iyaye cin anpetu kin hehanyan;

³⁹ Qa iyukcanpi śni, ecen minitan aye c̣a iyuḣpaihangwicaya: iho, Wicaśta Cinhintku kin u kte cin he iyecece kta.

⁴⁰ Hehan wicaśta nom magata unpi kta; wanji icupi kta, qa unma kin iś okaptapi kta.

⁴¹ Winoḣinca nom wiyutpan on wotpan unpi kta; wanji icupi kta, qa unma kin okaptapi kta.

⁴² Heon etanhan waktaya un po, wihiyayedan oape tukte en Itancan nitawapi u kta sdonyayapi śni.

⁴³ Tuka de sdonya po; wicaśta tipi tawa kin wamanon sa tohan hi kta sdonya unkanś, kikta un qa tipi tawa yuḣdokapi kta iyowinwicakiye kte śni tuka.

⁴⁴ Heon etanhan niś eya wiyeya un po; Wicaśta Cinhintku kin wihiyayedan oape tukte wanji en hi kta, he sdonyayapi śni.

⁴⁵ Tuwe wowidake owotanna qa wayupika, itancan tawa tipi awanyagkiya, tohan iyehantu eca wo wicaqu ece e kta.

⁴⁶ Wowidake kin hecen econ ece, itancan tawa en hdi qa wanhdake cinhan, he yawaśtepi ece.

⁴⁷ Awicakehan heciciyapi; Taku yuhe cin owasin awanyagkiye kta.

⁴⁸ Tuka wowidake śice cin he cante mahen, Itancan mitawa tehan hdi śni ce, eye cinhan;

⁴⁹ Qa tona om wowidake un kin hena wicakaśtake c̣a, witkopi om wote c̣a wayatke cinhan;

⁵⁰ Anpetu wan waktaya un śni, qa wihiyayedan oape wanji iye kecin śni, he en wowidake un kin yuhe cin hdi kta;

⁵¹ Qa cokaya kicakse kta, qa wanaic̣iḣmanpi kin om taku yuhekiye kta; heciya wicaceya qa hi hdakinskinzapi yuke kta.