Mattheos 23 - Dakota Wowapi Wakan Kin

¹ Hehan Jesus oyate kin, iye waonspewicakiye cin om wowicakiyaka:

² Qa hewicakiya; Wowapi kagapi Pharisee ko Moses oiyotanke tawa kin en iyotankapi ece

³ Heon etanhan taku tona openiśipi kin hena owasin opapi qa econ po; tuka iye oḣanpi kin ohna econpi śni po; taku eyapi, tuka iyecen econpi śni ece.

⁴ Waqinpi tketke qa qinpi teḣika heca oheyunpi, qa wicaśta tapete akan ehnakapi ece, tuka iye qe śaśte on yutanpi kta tawatenyapi śni.

⁵ Qa wicoḣan econpi kin owasin wicaśta wanwicayakapi kta e heon econpi ece. Wateśdake tanka ic̣icagapi, qa śina opapun hdutankapi ece.

⁶ Wotapi en oyanke waśteśte cinpi, qa omniciye tipi kin ohna wankan iyotankapi kte cin he waśtedakapi ece:

⁷ Qa tihocoka kin en wicayuwintapi, qa, Itancan, Itancan wicaśta ewicakiyapi kta cinpi.

⁸ Tuka niye, Itancan, eniciyapi kte śni; wanji mdetahunka duhapi, Messiya hee; qa niyepi ewasin hunkawanjinyeciyapi.

⁹ Qa nakun maka akan tuwedan, Ate, eciyapi śni po; Wanji maḣpiya ekta un kin he Ateyayapi.

¹⁰ Qa nakum, Waonspekiye, eniciyapi kte śni; Wanji Waonspekiye duhapi, Messiya hee.

¹¹ Qa tukte wanji iniyotanpi kta hecinhan, he wowidake nitawapi ee kta.

¹² Tuwe yuwankan iyeic̣iye kta hecinhan, he yuhukun eḣpeyapi kta; qa tuwe ihduhukuya hecinhan, he yuwankan iyeyapi kta.

¹³ Tuka wowapi kagapi qa Pharisee kin, wananic̣iḣmanpi, woteḣi niciyankapi nunwe; wiwazica tipi tawapi ihangyayapi ece, qa wanniyakapi kta on wocekiye hanska ehapi ece; heon etanhan woyaco tanka iyahdeniciyapi kta.

¹⁴ Wowapi kagapi qa Pharisee kin, wananic̣iḣmanpi, woteḣi niciyankapi nunwe; maḣpiya wokiconze kin wicaśta anawicayeciptapi, niye en dapi kte śni, qa tona en yapi kta cinpi kin teyahindapi ece.

¹⁵ Wowapi kagapi qa Pharisee kin, wananiciḣmanpi, woteḣi niciyankapi nunwe; miniwanca maka ko aokibeyayapi, wicaśta wanjidan duhomnipi kta; qa ecetu kinhan, niye isanpa nonpa akihde Wakanśica cinca yakagapi ece.

¹⁶ Tokakeya mani iśtagongapi kin, woteḣi niciyankapi nunwe; hehapi ece; Tuwe tipi wakan kin on wakonze cinhan he taku śni; tuka tuwe tipi wakan kin en mazaskazi yuke cin, he on wakonze cinhan, he waḣtani ece.

¹⁷ Winitkotkokapi qa istanigongapi; mazaskazi qa iś tipi wakan mazaskazi wakan kage cin unma tukte iyotan he.

¹⁸ Nakun Tuwe owayuśna kin on wakonze cinhan he taku śni; tuka tuwe wośna owayuśna akan un kin he on wakonze cinhan he waḣtani ece

¹⁹ Winitkotkokapi qa iśtanigongapi kin; wośnapi qa iś owayuśna wośnapi kin wakan kage cin unma tukte tanka he.

²⁰ Heon etanhan tuwe owayuśna kin on wakonze cinhan, e owayuśna qa taku akan un kin koya on wakonza ece.

²¹ Qa tuwe tipi wakan kin on wakonze cinhan, he tipi wakan, qa nakun tuwe ohna ti ece kin, hee on wakonza ece.

²² Qa tuwe maḣpiya kin on wakonze cinhan, he Wakantanka oiyotanke tawa, qa nakun tuwe akan iyotanke cin on wakonza ece.

²³ Wowapi kagapi qa Pharisee kin, wananic̣iḣmanpi, woteḣi niciyankapi nunwe; ceyakata waḣpe skuya, wacanga ko, iwikcemna kin waduśnapi ece; qa woope kin en taku tanka, woowotanna, wowaonśida qa wowacinye, hena ayaktapi śni ece; dena e ecanonpi kta, qa unma nakun econ śni yaunpi kte śni tuka.

²⁴ Tokaheya mani iśtagongapi kin, hoponkadan puskem edakupi, qa kamel heca napca iyeyayapi ece.

²⁵ Wowapi kagapi qa Pharisee kin, wananic̣ihmanpi, woteḣi niciyankapi nunwe; wakśica wiyatke ko akantanhan duskapi ece, tuka mahen wamanonpi qa wicotawacin śica on ojugjudan.

²⁶ Pharisee iśtagonge, tokaheya wiyatke wakśica ko mahentanhan ska kaga wo, kinhan akantanhan he nakun ska kta.

²⁷ Wowapi kagapi qa Pharisee kin, wananic̣ihmanpi, woteḣi niciyankapi nunwe ohna wicaḣapi sanyanpi henicecapi hena akantanhan owanyag waśate tuka mahentanhan wicaśta huhu qa taku śica owasin on ojugjudan ece.

²⁸ He iyecen niyepi wicaśta ekta akantanhan owotanna yaunpi seececa, tuka mahentanhan wanaic̣iḣmanpi qa woowotanna śni on onijupidan.

²⁹ Wowapi kagapi qa Pharisee kin, wananic̣iḣmanpi, woteḣi niciyankapi nunwe; wicaśta wokcan ohna wicaḣapi kin en tipi wicayecagapi, qa wicaśta owotanna ohna wicahnakapi kin hena sanyayapi ece:

³⁰ Qa hehapi; Atewicunyanpi ni unpi he anpetu kin en unyakonpi unkanś, wicaśta wokcan wicaktepi qon en ounpapi kte śni tuka ce.

³¹ Hecen tona wicaśta wokcan wicaktepi qon cincapi kin hena niyepi e onihdakapi ece.

³² Qa nakun niye niyatepi wicoḣan tawapi kin hena wicayeciyuśtanpi kta.

³³ Wamduśka henicapi, sinteḣda wicoicage, token wakanśica ti iwicayacopi kin nayecipapi kta he.

³⁴ Heon etanhan iho, wicata wokcan, wicaśta ksapa, wowapi kagapi hena koya, niyepi ekta yewicawaśi; unkan etanhan apa wicayaktepi kta, qa icipaweḣ owicayakatanpi kta; qa apa omniciye tipi nitawapi kin ohnahna wicayakapsinpsintapi kta; qa otonwe iyasyaza śicaya wicayakuwapi ece e kta.

³⁵ Hecen maka akan wicaśta owotanna wicaktepi hena we kin ocowasin niyepi en aniupi kta; Abel owotanna we kin hetanhan, Zakarias, Barakias cinhintku, tipi wakan qa owayuśna kin iyotahedan yaktepi qon he we kin hehanyan.

³⁶ Awicakehan heciciyapi; Dena owasin wicoicage kin de en awicau kta.

³⁷ Jerusalem, Jerusalem, wicaśta wokcan wicayakte sa, qa tona niye ekta yewicaśipi qon hena inyan on wiqayakinin ece qon, wahupakoza wan iye cinca ḣupahu ihukuya wicatpahi ece kin, he iyecen wanna ota nicinca wicawapahi kta wacin, tuka niye wicayadapi śni ece.

³⁸ Iho, yatipi kin wanna otiwota eḣpeniciyapi:

³⁹ Qa heciciyapi; Detanhan tohanyan, Tuwe Itancan caje yuha u kin he yawaśtepi nunwe, ehapi śni, hehanyan wanmayadakapi kte śni.