Mattheos 22 - Dakota Wowapi Wakan Kin

¹ Unkan Jesus waayupte c̣a ake wiyacinpi on wowicakiyake c̣a heya;

² Wicaśta wan wicaśtayatapi heca cinhintku kin wakankiciyuzapi kicage cin he maḣpiya wokiconze kin iyececa.

³ Unkan wowidake wicayuhe cin hena yewicaśi, tona wakankiciyuzapi en wicakicopi qon hena uwicaśipi kta; tuka upi kta wicadapi śni.

⁴ Akeś wowidake toktokeca ekta yewicaśi qa hewicakiya; Tona wicakicopi qon hena hewicakiya po; Wotapi mitawa wiyeya yanka; tatanka mitawa ptejicadan ko wanna ktepi, qa taku owasin wiyeya hiyeya; iho po, wakankiciyuzapi kin en u po.

⁵ Tuka iḣaḣapi qa toki iyayapi; wanji tamaga ekta iyaye c̣a, wanji iś mazopiye tawa ekta iyaya.

⁶ Qa hunḣ wicakico ipi kin hena wicayuzapi, qa śicaya wicakuwapi qa wicaktepi.

⁷ Wicaśtayatapi kin he naḣon qehan nina śihda; qa taakicita ekta yewicaśi, qa tinwicaktepi kin hena ihangwicaye c̣a totonwepi kin ḣuḣnaḣya.

⁸ Hehan wowidake tawa kin hewicakiya; Wakankiciyuzapi kin wiyeya yanka, tuka tona en wicakicopi qon hena opapi kta iyececapi śni.

⁹ Heon etanhan canku ojate kin ektakta ya po, qa tona iyewicayayapi kin wakankiciyuzapi kin en uwicaśi po.

¹⁰ Hecen wowidake unpi kin hena canku ojate kin ektakta iyayapi, qa tona iyewicayapi, śica qa waśte ko, en awicaupi; hecen wakankiciyuzapi wicaśta ota en opapi.

¹¹ Unkan wicaśtayatapi kin tona wotapi kte cin hena wanwicayaka tin hiyu, qa iho, wicaśta wanji wakankiciyuzapi wokoyake kin kic̣un śni hen wanyaka:

¹² Qa heciya; Koda, tokeca wakankiciyuzapi wokoyake kic̣un śni en hidotanka he. Unkan takudan eye śni.

¹³ Hehan wicaśtayatapi kin taokiyewicaye cin hewicakiya; Siha nape ko paḣtapi qa detanhan aya po, qa tankan otpaza kin en eḣpeya po; heciya wicaceya qa hi hdakinskinzapi yuke kta.

¹⁴ Wicota wicakicopi tuka tonana wicakaḣnigapi ece.

¹⁵ Hehan Pharisee kin iś yapi, qa token iapi on yuśkiśkapi kta aiapi.

¹⁶ Qa iye waonspewicakiyapi kin Herodian hena om ekta yewicaśipi qa heyapi; Waonspekiye, iewicayaka sdonunyanpi, qa awicakehan Wakantanka tacanku kin onspeunyakiyapi ece, qa tuwedan koyakipe śni; wicaśta akantu ekta eyatonwe śni nakaeś.

¹⁷ Heon token idukcan he; unkokiyaka po; Kesar mazaska qupi ece kin he owotanna he.

¹⁸ Unkan Jesus taku śica en wicaun kin he sdonya qa heya; Wananic̣iḣmanpi, tokeca iyutanmayayapi he:

¹⁹ Mazaska mnayanpi ece kin he makipazo po, eya. Unkan kaśpapidan wanji kahipi.

²⁰ Hehan hewicakiya; Wicite qa wowapi kagapi kin de tuwe tawa he.

²¹ Unkan, Kesar tawa ce, eyapi. Hehan hewicakiya; Heon etanhan Kesar taku tawa kin kicu po, qa Wakantanka taku tawa kin kicu po.

²² He naḣonpi hehan yuśinyayapi qa eḣpeya hdicupi.

²³ Unkan anpetu kin he en Sadukee kin en hipi, hena piya wicoicage kin wanica ce, eyapi ece, qa wiwangapi;

²⁴ Qa heciyapi; Waonspekiye, Wicaśta wan cinca yuhe śni ṭe cinhan, tawicu qon he iye sunkaku yuze kta, qa cincu cinca icaḣkiciciye kta, Moses keye ciqon.

²⁵ Unkan unkiyepi en wicaśta śakowin sunkakiciyapi; unkan tokapa kin he winoḣinca wan yuza tuka ṭa; qa cinca nica heon iye iyokihe cin he tawicu aiḣpekiya.

²⁶ Qa icinonpa Iyecen econ, qa iyamni, qa ecen śakowinpi kin.

²⁷ Hehan ehake winoḣinca qon ṭa.

²⁸ Hecen piya wicoicage kin en, hena śakowinpi kin wanji tukte winoḣinca kin he hduhapi kta he; owasin yuzapi.

²⁹ Jesus waayupte c̣a hewicakiya; Yanunipi, wowapi wakan qa Wakantanka towaśake kin sdonyayapi śni.

³⁰ Piya wicoicage kin en winoḣinca wicayuzapi śni, qa hiḥnatonpi śni, tuka maḣpiya ekta Wakantanka ohnihdewicaye cin iyececapi ece.

³¹ Tuka wicaṭe cin piya icagapi kin on Wakantanka taku eniciyapi kin he dawapi śni he; he kaken eya;

³² Abraham Wakantanka tawa, Isaak Wakantanka tawa, qa Jakob Wakantanka tawa kin he miye: Wakantanka wicaśta ṭapi kin tawapi śni, tuka ni unpi Wakantanka tawapi ece.

³³ Unkan oyate kin hena naḣonpi hehan taku onspewicakiye cin on yuśinyayapi.

³⁴ Tuka Pharisee kin hena, Jesus Sadukee kin inina yanke wicakiya, he naḣonpi hehan en mniciyapi:

³⁵ Qa etanhan wanji woope aiekiyapi kin heca wiwange c̣a iyutanyan heciya;

³⁶ Waonspekiye, woope kin en woahope kin tukte iyotan tanka he.

³⁷ Unkan Jesus heciya; Itancan Wakantanka nitawa kin he nicante ocowasin on, qa ninagi ocowasin on, qa nitoksape ocowasin on waśteyakidake kta.

³⁸ Woahope tokaheya qa tanka kin hee.

³⁹ Qa inonpa kin he iyececa; Nikiyedan un kin niye inihdacin waśteyadake kta ce.

⁴⁰ Woahope kin denaoza woope ocowasin wicaśta wokcan ko en ikoyaka ece.

⁴¹ Pharisee kin iś en mniciyapi icunhan Jesus wiwicawange c̣a heya;

⁴² Messiya on token idukcanpi he; tuwe cinhintku he. Unkan, Dawid Cinhintku ce, eciyapi.

⁴³ Hehan hewicakiya; Hecen token Dawid Woniya Wakan kin on Itancan, eciya he; qa heya;

⁴⁴ Itancan kin Itancan mitawa heciya; Mietapa ekta iyotanka wo, tona tokaniyanpi kin siha oahe nitawa wicawakage kta, hehanyan.

⁴⁵ Hecen Dawid, Itancan, eciya hecinhan, token ecin cinhin tkuye kta he.

⁴⁶ Unkan tuwedan oie wanjidan ayupte kta okihi śni; qa anpetu kin hetanhan tuwedan ake wiwanga tawaṭenye śni ece.