Mattheos 20 - Dakota Wowapi Wakan Kin

¹ Maḣpiya wokiconze kin he wicaśta wan tipi yuhe cin he iyececa, he hanḣanna ḣinca hastanhanka iyuwi ojupi tawa kicanyanpi kte cin wicaśta opeton iyaya.

² Unkan wicaśta anpetu eca kaśpapidan wanjidan on opewicaton, hehan hastanhanka iyuwi ojupi tawa kin en yewicaśi.

³ Unkan wihiyayedan oape yamni, hehan ake tankan iyaye c̣a toktokeca tihocoka en taku tokon śni najinpi wanwicayaka;

⁴ Qa hewicakiya; Niś eya hastanhanka iyuwi ojupi kin en ya po; kinhan token owotanna cicupi kta ce. Unkan en iyayapi.

⁵ Ake oape iśakpe qa inapcinwanka hehanhan tankan iyaye c̣a ake iyecen econ.

⁶ Hehan oape iakewanji ecetu, ake tankan iyaye c̣a toktokeca taku tokon śni najinpi wanwicayaka, qa hewicakiya; Tokeca anpetu osan taku tokon śni nayajinpi he.

⁷ Unkan, Tuwedan opeuntonpi śni ce, eciyapi. Hehan hewicakiya; Niś eya hastanhanka iyuwi ojupi kin en ya po, kinhan taku owotanna iyacupi kta.

⁸ Wanna ḣtayetu hehan, hastanhanka iyuwi ojupi yuhe cin iye taokiye itancan kin heciya; Wicaśta ḣtanipi kin wicakico qa wokajuju wicaqu, wo, ehake hipi kin hena tokaheya, ecen tokaheya hipi qon wicayeciyuśtan kta ce.

⁹ Unkan tona oape wanjidan ḣtanipi kin hena hipi, qa otoiyohi kaśpapidan wanji icupi.

¹⁰ Tokaheyapi kin hena en hipi qehan, sanpa yuhapi kta kecinpi, tuka iś eya otoiyohi kaśpapidan wanji icupi.

¹¹ He icupi hehan tipi tawa kin bapi;

¹² Qa heyapi; Ehake hipi kin dena oape wanjidan ḣtanipi, tuka unkiye anpetu osan, wi kata eśta ḣtaunnipi, iyeuncecapi wicayakaga ece.

¹³ Unkan iye waayupte c̣a wanji heciya; Koda, taku śica ecacicon śni; kaśpapidan wanjidan on ḣtamiyecini kta kemayakiye śni he.

¹⁴ Taku nitawa kin ehdaku qa hda wo; ehake hi kin de niye cic̣u kin iyecen waqu ece e kta.

¹⁵ Miye mitawa kin token wacin kin ecen ecamon kta iyecece śni he; miye mawaśte kin heon etanhan iśta niśica he.

¹⁶ Hecen ehake unpi kin hena tokaheyapi kta; qa tokaheya unpi kin hena ehake unpi kta; wicota wicakicopi, tuka tonana wicakaḣnigapi ece.

¹⁷ Unkan Jesus Jerusalem ekta itanwankanhde ya, hehan waonspewicakiya akenonpa kin canku kin icunonpa iśnana awicaya, qa hewicakiya;

¹⁸ Iho, Jerusalem ekta itanwankanhde unyanpi, qa Wicaśta Cinhintku kin wośnapi kagapi wowapi kagapi ko nape en wicaqupi kta; unkan ṭe kta on yacopi kta,

¹⁹ Qa iḣaḣapi kta, kapsinpsintapi kta, qa icipaweḣ okatanpi kta on Ikcewicaśta iyoopta wicaqupi kta; unkan anpetu iciyamni hehan kini kta ce.

²⁰ Hehan Zebedee cinca hunkupi kin en hi, cinhintku napin om, cekiye c̣a taku wanji kida.

²¹ Unkan iye heciya; Taku yacin he. Hehan heciya; Micinkśi kin denaoza wokiconze nitawa en, unma nietapa ekta iyotanke kta, qa unma iś canitka en iyotanke kta, keya ye.

²² Tuka Jesus waayupte c̣a heya; Taku yadapi kin sdonyakiyapi śni. Wiyutke etanhan mdatke kte cin he etanhan yatkan oyakihipi he; qa baptem maqupi kte cin he niś eya nic̣upi kta oyakihipi he. Unkan, Unkokihipi ce, eciyapi.

²³ Hehan hewicakiya; Awicakehan wiyatke mitawa kin etanhan datkanpi kta, qa baptem maqupi kte cin heon niś eya baptem nic̣upi kta; tuka ematapa qa camatka tanhan iyotankapi wicaqupi kte cin he miye mitawa śni; tuka Ate tona wiyeya wicakiciyuśtan kinhan hena tawapi kta.

²⁴ Unkan wikcemnapi kin hena he naḣonpi qehan sunkakiciyapi nom on śihdapi.

²⁵ Tuka Jesus wicakico qa heya; Ikcewicaśta ekta tona itancanpi kin hena oyate wicayuhapi, qa wicaśta tankinyanyanpi kin oyate wowidakewicayapi ece, he sdonyayapi.

²⁶ Tuka niyepi ekta hecece kte śni; tuka wanji tukte tanka yaunpi kta yacinpi kinhan, he ookiye duhapi kta:

²⁷ Qa tuwe niyepi en tokapa un kta hecinhan, wowidake nitawapi kin hee kta.

²⁸ He iyececa, Wicaśta Cinhintku wowidake wicayuhe kta on hi śni, tuka idakapi kta, qa wiconi tawa wokajuju kta wicota on wicaqu kta heon hi.

²⁹ Unkan Jeriko etanhan iyooptapi, hehan wicota ihakam unpi.

³⁰ Unkan iho, wicaśta iśtagonga nonpa canku icahda iyotankapi, Jesus en hiyaya naḣonpi, hehan howayapi qa heyapi; Itancan, Dawid Cinhintku onśiunkida miye.

³¹ Unkan wicota kin teḣindapi qa inina yanke wicaśipi; tuka iś hehan heon iyotan howayapi qa heyapi; Onśiunkida po, Itancan, Dawid Cinhintku.

³² Unkan Jesus owanji najin qa wicakico qa heya; Taku ecaciconpi kta yacinpi he.

³³ Itancan iśta unhdukawapi kta ye, eciyapi.

³⁴ Hehan Jesus onśiwicakida qa iśta wicayutan; unkan ecahankeya iśta on tonwanpi qa ihakam unpi.