Mattheos 2 - Dakota Wowapi Wakan Kin

¹ Unkan Herod wicaśtayatapi taanpetu kin he ehan, Bethlehem Juda makoce kin en Jesus tonpi, hehan iho, wiyohiyanpatanhan wicaśta ksapa Jerusalem en hipi qa heyapi;

² Tuwe Juda oyate kin en wicaśtayatapi kta tonpi kin he tukten un he; wicanḣpi tawa kin he wiyohiyanpata wanunyakapi qa ohoundapi kta on unhipi ce.

³ Herod wicaśtayatapi kin he naḣon, unkan nina yuśinyaya, Jerusalem ocowasin nakun.

⁴ Unkan wośnapi kagapi owasin qa oyate kin en wowapi kagapi kin hena wicayuwitaya, hehan Messiya tukten tonpi kta hecinhan, he iwicawanga.

⁵ Unkan heciyapi; Juda makoce kin en Bethlehem otonwe kin hetu ce; wicaśta wokcan kin en kaken owapi;

⁶ Qa niś Bethlehem, Juda makoce kin en, Juda itancanpi kin ehna iyotan nicistinna śni; enitanhan wicaśtayatapi wan u kta, he Israel mitaoyate kin wonwicaye kta.

⁷ Hehan Herod wicaśta ksapapi qon naḣmana wicakico, qa wicanḣpi kin tohanhan tanin ece, he atayedan iwicawanga.

⁸ Hehan Bethlehem ekta ye wicaśi qa heya; Ya po, qa hokśiyoqopa kin nina ode po; qa iyeyayapi kinhan hośimakahdi po; miś eya wau qa ohowada kta, eya.

⁹ Wicaśtayatapi ia naḣonpi hehan tankan iyayapi; unkan iho, wicanḣpi, wiyohiyanpata wanyakapi qon he wicitokam iyaye c̣a hokśiyoqopa wanke cin he iwankam inajin.

¹⁰ Unkan wicanḣpi kin wanyakapi qehan wowiyuśkin tanka on iyuśkinpi.

¹¹ Unkan ti mahen ipi hehan hokśiyoqopa kin wanyakapi, hunku Mary nakun, qa itokam makata ehpeic̣iyapi qa ohodapi: unkan wopiye hduḣdokapi hehan taku qupi, mazaskazi, qa canśin pejihuta waśtemna koya.

¹² Unkan wowihanmde on Wakantanka wahowicaya, Herod ekta hdapi kte śni, hehan canku tokeca ohna iye tamakoce ekta hdapi.

¹³ Hena wanna kihdapi hehan, iho, Itancan taohnihde wan wowihanmde on Joseph en ihdutanin qa heya; Najin qa hokiśyoqopa hunku kici iwicacu qa Egupta ekta najica wo, qa tohan ociciyake kte cin hehanyan hen un wo: Herod hokśyoqopa kin kte wacin on etanhan ode kta ce.

¹⁴ Hecen hanyen najin hiyaye, c̣a hokśiyoqopa hunku kici ewicahdaku, qa Egupta ekta iyaya:

¹⁵ Qa hen un, Herod ṭe cin hehanyan: Hecen Itancan wicaśta wokcan on taku eye ciqon he yuecetupi kta; Egupta etanhan micinkśi weco ce.

¹⁶ Wicaśta ksapapi qon Herod hnayanpi wanhdake c̣ehan nina śihda; qa akicita ekta yewicaśi, qa Bethlehem qa makoce ihdukśan koya en, hokśiyopa owasin wicakte, tona waniyetu nonpa qa ihukuya, wicaśta ksapapi wiwicawange ciqon he iyacinyan.

¹⁷ Unkan hehan Jeremiya wicaśta wokcan oie qon yuecetupi, he kaken eya;

¹⁸ Rama en wicaho wan naḣonpi, ic̣idowanpi, wicaceya qa waśihdapi tanka; Racel cinca awicakiceya qa wacintonknakapi kta cin śni, cinca en unpi śni nakaeś.

¹⁹ Tuka Herod wanna ṭa hehan, iho, Itancan taohnihde wan Egupta ekta Joseph en taniniciya;

²⁰ Qa heya; Najin qa hokśiyoqopa hunku kici ewicahdaku, qa Israel makoce tawa kin ekta hda wo; tona hokśiyoqopa ṭa cinpi qon hena wanna ṭapi.

²¹ Unkan najin hiyaye c̣a hokśiyoqopa hunku kici ewicahdaku qa Israel tamakoce kin en hdi.

²² Qa Arcelaos, Juda makoce kin en, atkuku Herod tohe kin en wicaśtayatapi yanka he naḣon hehan ekta hde kta kokipa; tuka wowihanmde on Wakantanka wahoye cin on, Galile makoce kin ekta iyaya:

²³ Qa otonwe wan Nazareth eciyapi kin he en hi qa hen yanka; hecen, Nazareth wicaśta eciyapi kta ce, wicaśta wokcan eye ciqon he yuecetupi.