Mattheos 18 - Dakota Wowapi Wakan Kin

¹ Unkan hehan waonspewicakiye cin Jesus en hipi qa heciyapi; Maḣpiya wokiconze kin en tuwe iyotan tanka he.

² Unkan Jesus hokśiyoqopa wan kico qa wicacokaya ehnaka;

³ Qa heya; Awicakehan heciciyapi; Nihduhomnipi śni, qa hokśiyoqopa iyenicecapi śni kinhan, maḣpiya wokiconze kin en yaipi kte śni.

⁴ Tuwe ihduhukuye c̣a hokśiyoqopa kin de iyecen canteyuze cinhan, maḣpiya wokiconze kin en iyotan tanka kin hee.

⁵ Qa tuwe hokśiyoqopa dececa wan, micaje on, iyowinkiye cinhan, he miye iyowinmakiya ece.

⁶ Qa tuwe hokśiyoqopa kin dena, wacinmayanpi kin, wanji waḣtanikiye cinhan, he inyan wiyutpan wan tahu en iyakaśkapi, qa iye miniwanca ośbe kin en iyoḣpeyapi unkanś waśte kta tuka.

⁷ Waḣtaniwicayapi kin on oyate kin woteḣi yuhapi kta; eya waḣtanikiyapi yuke kta iyececa; tuka wicaśta tuwe waḣtaniwicaya hecinhan, he woteḣi yuhe kta.

⁸ Heon etanhan, ninape qa nisiha waḣtaniniyanpi hecinhan, hena hdakse c̣a eḣpeya wo; huha kaksapi wiconi en yai kta hee waśte, qa nape nonpa qa siha nonpa hduha peta owihanke wanica en iyoḣpeniyanpi kte cin he śica.

⁹ Qa niiśta waḣtaniniye cinhan, hduśdoke c̣a eḣpeya wo; iśta wanjidan hduha wiconi en yai kte cin he waśte, qa iśta napin hduha peta owihanke wanica en iyoḣpeniyanpi kte cin he śica.

¹⁰ Ihnuhan dena cikcistinpidan wanjidan eśta śiceyadake cinhan; heciciyapi ce; Maḣpiya ekta ohnihdewicayapi tawapi kin hena Ate maḣpiya ekta un kin ite ohinniyan wanyakapi ece.

¹¹ Wicaśta Cinhintku kin taku atakuniśni qon he niye kta on hi.

¹² Hecen token idukcanpi he. Wicaśta wan taḣinca wanunyanpi opawinge wicayuhe, c̣a etanhan wanjidan kitaninśni hecinhan, wikcemna napcinwanka sanpa napcinwanka hena owanjidan ewicahnake c̣a ḣe kin ekta iyaye c̣a wanji taninśni kin he okide śni he.

¹³ Qa iyeye cinhan, awicakehan heciciyapi; hee on iyuśkin, qa wikcemna napcinwanka sanpa napcinwanka tokiya iyayapi śni kin hena on iyuśkin śni ece.

¹⁴ He iyececa, dena cikcistinpidan wanjidan eśta toki eḣpeyapi kta, Niyatepi maḣpiya ekta un kin hecen tawacin śni.

¹⁵ Tuka nisunka waniciḣtani kinhan, ekta ye c̣a iye niye kiciśnana he okiciyaka ye; naniḣon kinhan nisunka ake yahduhe kta.

¹⁶ Tuka ananigoptan śni kinhan, hehan wanji qa iś nonpa om de kta; hecen waayatanin nonpa, qa iś yamni ipi kin on wicoie owasin yusutapi kta.

¹⁷ Tuka hena nakun anawicagoptan śni kinhan, hehan okodakiciye kin owicakiyaka wo; unkan okodakiciye kin anawicagoptan śni kinhan, hehan Ikcewicaśta qa wamnayanpi kin iyecen yahdawa kta.

¹⁸ Awicakehan heciciyapi; Taku maka akan yakaśkapi kinhan, he maḣpiya ekta kaśkapi kta; qa taku make akan yakiduśkapi kinhan, he maḣpiya ekta kiyuśkapi kta.

¹⁹ Akeś heciciyapi; Tuwe nom maka akan taku wanjidan yadapi kta e wayeconzapi kinhan, Ate maḣpiya ekta un kin he ecen ecawicakicon kta.

²⁰ Tukten nom yamni, micaje on mniciyapi kinhan, hen wiciyopeya waun ece.

²¹ Hehan Inyan en hi qa heciya; Itancan, misunka tona wamiciḣtani qa wecicajuju kta he; śakowin hehanyan he.

²² Jesus heciya; Śakowin hehanyan kta, eciciye śni, tuka wikcemna śakowin ece śakowin.

²³ Heon etanhan maḣpiya wokiconze kin wicaśtayatapi wan iyececa, he wowidake wicayuhe cin wicakiciyawa kta:

²⁴ Unkan wicakiciyawa icunhan wanji mazaska tkeutapi tanka kektopawinge wikcemna iyohiye sni kin he ahipi.

²⁵ Unkan on kajuju kta takudan yuhe śni, hecen yuhe cin he tancan wiyopeyapi kta, qa tawicu, qa cinca, qa taku yuhe cin owasin, qa kajujupi kta, keya.

²⁶ Heon wowidake un kin he en makipusdiya eḣpeic̣iya, cekiye c̣a heya; Itancan, amakipe ye, owasin cicicajuju kta.

²⁷ Hehan yuhe cin he wowidake tawa kin onśikida, kiyuśka qa ikicazo qon kicicajuju.

²⁸ Tuka wowidake un kin he tankaa iyaye c̣a om idakapi kin wanji, kaśpapidan opawinge ikicazo kin he iyeya, qa iyaḣpaye c̣a poskin yuze c̣a heciya; Tona imiyecazo kin micicajuju wo.

²⁹ Hehan kici idakapi un kin he siha en eḣpeic̣iya, cekiye c̣a heya; Amakipe ye, kinhan owasin cicicajuju kta.

³⁰ Unkan wicada śni; tuka iyaye c̣a conkaśke mahen kaśkahnaka, oicazo hdajuju kta hehanyan.

³¹ Unkan kici wowidake unpi kin hena taku econpi kin wanyakapi qehan, nina iyokiśicapi: heon en hipi qa wicayuhe cin taku econpi kin owasin okiyakapi.

³² Hehan yuhe cin he ake kico qa heciya; Wowidake niśice ḣinca, icazopi hinsko tanka qon he cicicajuju, cemayakiye cin heon.

³³ Hecen miye onśioida kin he iyecen kici wowidake yaun kin iś eya onśiyakida kta iyecece śni he.

³⁴ Unkan yuhe cin śihda qa kakiśyapi kte cin en wicaqu, tona iyohiye śni qon ocowasin hdajuju kta hehanyan.

³⁵ He iyecen, Ate maḣpiya ekta un kin ecaniconpi kta, otoiyohi cante eciyatanhan nisunkapi tona waniciḣtanipi kin wicayecicajujupi śni kinhan,