Mattheos 17 - Dakota Wowapi Wakan Kin

¹ Unkan iyohaḣam anpetu śakpe hehan Jesus Inyan qa Jakob, qa iye sunkaku Johannes, hena iwicacu, qa paha wan tehanwankantu ekta awicaya;

² Qa wicitokam yutokecapi; ite kin anpetu wi kin iyecen iyega, qa tawokoyake kin iyoyanpa iyecen aka.

³ Unkan iho, Moses qa Elias en ihdutaninpi qa kici wohdakapi.

⁴ Hehan Inyan ayupte c̣a Jesus heciya; Itancan, den unyakonpi kin he waśte; yacin kinhan, den wakeya yamni ti unkagapi kta, wanji unnicagapi kta, qa Moses Elias kici wanjikji wicunkicagapi kta.

⁵ Iahan icunhan iho, iyoyanpa maḣpiya wan aowicahanzi, qa iho, maḣpiya kin eciyatanhan wicaho wan heya; Micinkśi waśtewakidake c̣a on iyomakipi ḣince cin he dee ce; anagoptan po

⁶ Unkan waonspewicakiye cin he naḣonpi hehan makipusdiya eḣpeic̣iyapi, qa nina kokipapi.

⁷ Tuka Jesus en wicahi, qa wicayutan qa heya; Inajin po, qa kokipapi śni po.

⁸ Unkan iśta yuwankan ikikcupi hehan, tuwedan wanyakapi śni, Jesus ecedan.

⁹ Unkan paha kin etanhan kun hdicupi, hehan Jesus wahokonwicakiye c̣a heya; Wowanyake kin he tuwedan okiyakapi śni po, Wicaśta Cinhintku kin wiconṭe etanhan piya ikicage śni hehanyan.

¹⁰ Unkan waonspewicakiye cin wiwangapi qa heciyapi: Wowapi kagapi kin, Elias tokaheya hi kta ce, eyapi kin, tokeca heyapi hwo.

¹¹ Unkan Jesus waayupte c̣a hewicakiya; Awicakehan Elias tokaheya hi kta, qa taku owasin yuecetu kta.

¹² Tuka heciciyapi; Elias wanna hi tuka iyekiyapi śni, qa token cinpi qon ecakiconpi. He iyececa Wicaśta Cinhintku kin iyepi eciyatanhan kakije kta.

¹³ Hehan waonspewicakiye cin okaḣnigapi, Johannes baptem wicaqu qon e he ke c̣a heon hewicakiya.

¹⁴ Unkan wicota en hdipi qehan, wicaśta wan en hi qa canpeśka makehde inajin,

¹⁵ Qa heya; Itancan, micinkśi onśimicida ye, hanyetu wi ihnaśkinyan qa śicaya un; otakiya peta en iḣpaye c̣a otakiya mini en iyoḣpaya ece:

¹⁶ Qa waonspewicayakiye cin wicawakahi, tuka asniyanpi kta okihipi śni.

¹⁷ Hehan Jesus ayupte c̣a heya; Wicoicage wacinye śni qa wacin teḣike, tohanyan cicipi waun kta he; tohanyan iyowinciciyapi kta he; den makau po.

¹⁸ unkan Jesus iyopeya, qa hecen wakan śice cin tankata hinanpa; unkan wihiyayedan oape kin hetanhan hokśidan kin asniyanpi.

¹⁹ Hehan waonspewicakiye cin Jesus iśnana yanke cin en hipi qa heyapi; Tokeca unkiye he napeunyanpi kta unkokihipi śni he.

²⁰ Unkan Jesus hewicakiya; Wacinyayapi śni heon; awicakehan heciciyapi; Sinape su wanjidan hinskokeca wacinyayapi unkanś, paha kin de, Detanhan tokan iyaya wo, eyakiapi kta; unkan tokan iyaye kta, qa taku oyakitpanipi wanice kta.

²¹ Tuka taku decece cin he cekiyapi qa wote śni unpi ecedan on tankan hinanpa ece.

²² Unkan Galile en unpi icunhan Jesus hewicakiya; Wicaśta Cinhintku kin wanna ecadan wicaśta napepi kin en wicaqupi kta.

²³ Unkan kte pi kta, qa anpetu iciyamni kinḣan ake piya ikicage kta ce, eya. Unkan nina iyokiśicapi.

²⁴ Hehan Kapernaum en hipi qehan, tona mazaska mnayanpi ece kin Inyan en hipi qa heyapi; Waonspeniciyapi kin he mazaska mnayanpi en iyoḣpeye kta he.

²⁵ Unkan, Han, eya. Hehan tin hdicu qehan Jesus tokaheya ie c̣a heciya; Simon token idukcan he; maka akan wicaśtayatapi kin tokiyatanhan mazaska mnayanpi he; iye cincapi etanhan, qa iś wicaśta tokecapi kin etanhan.

²⁶ Wicaśta tokecapi etanhan, Inyan eya. Unkan Jesus heciya; Henan cincapi kin wicakaśkapi śni ece:

²⁷ Tuka śihda wicunyanpi kte śni, e heon niś mde kin ekta ye c̣a hinśkijupi wan minin iyeya wo, qa hogan tokaheya hiyu kin he icu wo; he i kin dukawa kinhan ohna kangi kagapi wan iyeyaye kta; he icu qa miye qa niye on wicaqu wo.