Mattheos 16 - Dakota Wowapi Wakan Kin

¹ Unkan Pharisee qa Sadukee etanhan en hipi, qa maḣpiya eciyatanhan wowapetokeca wan wicakiyutanin śipi, iyutanyanpi kta.

² Tuka iye waayupte c̣a hewicakiya; Tohan ḣtayetu eca, Maḣpiya śaśa heon owaśtecake kta ce, ehapi ece.

³ Qa hanḣanna ec̣a, Ecin ośicecake kta, maḣpiya śaśa qa śapśapa, heon etanhan. Wananiciḣmanpi, maḣpiya ite kin he yukcan onnispepi, tokeca anpetu kin dena wowapetogton oyakaḣnigapi śni he.

⁴ Wicoicage śice c̣a wawiciḣaḣapi econ sa kin he wowapetokeca wan da; tuka wowapetokeca wanjidan qupi kte śni; Jonas wicaśta wokcan tawowapetokeca kin heceedan. Unkan eḣpewicaya iyaya.

⁵ Unkan waonspewicakiye cin akasanpa ipi, qa aguyapi icu akiktonjapi.

⁶ Henan Jesus hewicakiya; Pharisee qa Sadukee on napoḣyapi tawapi kin he iwanyakapi qa kokipa po.

⁷ Unkan iye iyakitedan akinicapi qa heyapi; Aguyapi unkicupi śni, heon etanhan, heya ce.

⁸ Tuka Jesus he sdonye c̣a hewicakiya; Cistinna wacinyayapi kin, tokeca niye iyakitedan ayakinicapi he, aguyapi iyacupi śni heon.

⁹ Hinaḣin oyakaḣnigapi śni, wicaśta kektopawinge zaptan un aguyapi zaptanna, qa makanopiye ojudan tonakeca yapahipi he yeksuyapi śni he.

¹⁰ Nakun wicaśta kektopawinge topa qa aguyapi śakowin, qa makanopiye ojadan tonakeca iyacupi he.

¹¹ Tokeca oyakahnigapi śni he, Pharisee qa Sadukee on napoḣyapi tawapi kin he kokipe ciśipi, he aguyapi on heciciyapi śni.

¹² Hehan aguyapi on napoḣyapi kin he kokipe wicaśi śni, tuka Pharisee qa Sadukee woonspe tawapi kin hee kokipapi kta, he okaḣnigapi.

¹³ Jesus Kesarea Philippi makoce kin en i qehan waonapewicakiye cin wiwicawange qa heya; Wicaśta Cinhintku kin miye matuwe kin, wicaśta keyapi he.

¹⁴ Unkan heyapi; Apa Johannes baptem wicaqu qon; qa apa iś; Elias; qa toktokeca; Jeramias, qa iś wicaśta wokcan wanji.

¹⁵ Qa niś matuwe kehapi he, ewicakiya.

¹⁶ Unkan Simon Inyan ayupte c̣a; Messiya Wakantanka ni un Cinhintku kin he niye, eya

¹⁷ Unkan Jesus ayupte c̣a heciya; Simon Jona cinhintku niyawaśtepi ce; wicaceḣpi qa wicawe kin he oniciyake śni, tuka Ate maḣpiya ekta un kin he oniciyaka

¹⁸ Qa miś nakun heciciya; Inyan he niye, qa imnija kin de akan okodakiciye mitawa wakage kta; qa wakanśica tatiyopa kin he yujuju kte śni.

¹⁹ Unkan maḣpiya wokiconze iyuḣdoke kin he cic̣u kta; hecen taku maka akan yakaśke cinhan he maḣpiya ekta kaśkapi kta; qa taku maka akan yakiduśke cinhan he maḣpiya ekta kiyuśkapi kta.

²⁰ Hehan waonspewicakiye cin Jesus Messiya kin he iye, he tuwedan okiyake śni wicaśi.

²¹ Hetanhan Jesus waonspewicakiye cin wowicakiyaka, Jerusalem ekta ye kta iyececa, qa wicaḣincapi, wośnapi kagapi, wowapi kagapi ko on taku ota kakije kta, qa ktepi kta, qa anpetu iciyamni hehan ake kini kta, hena owicakiyaka.

²² Hehan Inyan Jesus icu qa iyopeye c̣a heya; Itancan, hecetu śni; dena ayakipe kte śni.

²³ Tuka iye ihduhomni qa Inyan heciya; Satan mihektapa tanhan ya wo, tokamayaya; Wakantanka taku tawa kin awacanni śni, tuka wicaśta taku tawapi kin.

²⁴ Hehan Jesus waonspewicakiye cin hewicakiya; Tuwe miyahna u kta cin kinhan, waipiic̣ida kta, qa cansusbeca ehdaku qa mihakam un kta.

²⁵ Tuwe kaśta wiconi tawa kpatan kinhan, he toki eḣpekiye kta; qa tuwe miye on wiconi tawa kin kpagan kinhan, he iyeye kta.

²⁶ Wicaśta wan maka kin ecowasin kamna, qa nagi kin toki eḣpeye cinhan he taku okihi kta he; qa wicaśta nagi kin taku iyepekiye kta he.

²⁷ Wicaśta Cinhintku kin iye Atkuku towitan hduha taohnihdewicaye cin em u kta; hehan wicaśta otoiyohi iye oḣanpi kin eciyatanhan wicaqu kta.

²⁸ Awicakehan heciciyapi; Tona den najinpi kin etanhan wanjikji wiconṭe utapi kte śni, ecen Wicaśta Cinhintku kin iye tokiconze kin en u wanyakapi kta.