Mattheos 14 - Dakota Wowapi Wakan Kin

¹ Unkan anpetu kin hena en Herod wicaśtayatapi kin Jesus oyakapi kin he naḣon;

² Qa tahokśidan kin hewicakiya; Johannes baptem wicaqu ece kin he dee; ṭapi kin etanhan kini, heon etanhan wicoḣan tanka econ ece.

³ Herod Johannes yuze c̣a kaśka, qa conkaśke en ehnaka, Herodias iye sunkaku Philip tawicu qon heon.

⁴ Duhe kta iyecece śni ce, Johannes, eciye ciqon.

⁵ Unkan heon kte kta cin, tuka oyate kin kowicakipa; hena e wicaśta wokcan heca kecinpi.

⁶ Tuka Herod anpetu en tonpi qon he ake hiyohipi, hehan Herodias cunwintku kin wicacokaya waci, qa Herod iyokipiya.

⁷ Heon etanhan, taku wakan cajeyate c̣a, taku kida kta hecinhan, awicakehan qu kta, keciya.

⁸ Unkan he itokam hunku onspekiya, heon heya; Wanna Johannes baptem wicaqu ece qon he pa kin wakiśica wan ohna maqu ye.

⁹ Unkan wicaśtayatapi kin iyokiśice ḣinca, tuka wakanyan wacajeyate cin heon, qa tona om wota iyotanke cin hena on, he qu wicaśi.

¹⁰ Hecen ekta ye wicaśi, qa conkaśke mahen Johannes pa baksa.

¹¹ Unkan pa kin he wakśica ohna akupi, qa wikośka kin qupi; unkan iye iyoepta hunku qu.

¹² Unkan waonspewicakiye cin hena en hipi, qa tancan kin eyakupi qa ḣapi; hehan yapi qa Jesus okiyakapi.

¹³ Unkan Jesus he naḣon qehan, hetanhan watom iyaye c̣a, iśnana ḣewoskan makoce wan ekta i. Unkan oyate kin he naḣonpi qehan, otonwe etanhanhan huinyun ihakam yapi.

¹⁴ Unkan huta ekta ihunni qehan, wicota wanwicayaka; qa onśiwicakida, qa tona teḣiya unpi kin hena asniwicaya.

¹⁵ Unkan wanna ḣtayetu hehan waonspewicakiye cin en hipi qa heyapi; Makoce kin de ḣewotahedan, qa wanna ḣtayetu, heon oyate kin hde wicaśi wo, hecen otonwe ciqadan kin en yapi kta, qa taku yutapi opeic̣itonpi kta.

¹⁶ Tuka Jesus hewicakiya; Hdapi kta iyecece śni; ito niye taku yutapi wicaqu po.

¹⁷ Unkan heciyapi; Aguyapi kagapi zaptan qa hogan nonpa, henana den unhapi ce.

¹⁸ Unkan heya; Hena makau po.

¹⁹ Unkan oyate kin wato en iyotanke wicaśi, qa aguyapi zaptan qa hogan nonpa nakun icu, qa maḣpiya ekta etonwan, hehan yawaśte, qa yuśpaśpa qa waonspewicakiye cin wicaqu, unkan waonspewicakiye cin iś oyate kin wicaqupi.

²⁰ Unkan owasin wotapi qa imnanpi; unkan oyaptapi etanhan pahipi, makanopiye akenonpa ojudan.

²¹ Unkan tona wotapi kin hena wicaśta kektopawinge zaptan ecetu, nakun winoḣinca śiceca koya.

²² Hehan ecahankeya Jesus waonspewiyakiye cin wata wan en ope wicaśi, iye itokam akasanpa yapi kta, oyate kin hde wicaśi icunhan.

²³ Unkan wanna oyate kin hde wicaśi, hehan iśnana paha wan ekta cekiya iyaya. Wanna otpaza tuka iśnana ekta yanka.

²⁴ Tuka wata kin wanna mde kin cokaya un, taja on iyotanhan iyekiyapi, tatohekiya yapi nakaeś.

²⁵ Unkan hanyetu en itopa kiktapi hehan Jesus mini kin amani en wicaya.

²⁶ Unkan waonspewicakiye cin mini kin amani wanyakapi qehan, yuśinyayapi qa heyapi; He wanagi; qa kokipapi on śicahowayapi.

²⁷ Tuka Jesus kohanna owicakiye c̣a heya; Cante waśte po; de miye ce; kopehdapi śni po.

²⁸ Unkan Inyan ayupte c̣a heya; Itancan he niye hecinhan, ekta mini kin amani u maśi wo.

²⁹ Unkan; U wo, eciya. Hecen Inyan wata kin etanhan kun iyaye c̣a Jesus ekta ye kta mini kin amani.

³⁰ Tuka wohitiya tateyanpa wanyaka, hehan kokipa. Qa spaye kta iyaya, hehan śicahowaya, qa heya; Itancan, nimayan wo.

³¹ Unkan Jesus ecahankeya nape ekta yekiye c̣a yuwankan icu, qa heciya; Cistinna wacinyaya, tokeca wacetunyahda he.

³² Unkan wata kin en opapi hehan amdakedan icu.

³³ Hehan wata en unpi kin en hipi, makata eḣpeic̣iyapi qa heciyapi; Awicakehan Wakantanka Cinhintku kin he niye.

³⁴ Unkan akasanpa ihunnipi hehan Geneseret makoce kin en hipi.

³⁵ Unkan wicaśta makoce kin he en unpi kin hena iyekiyapi, qa ihdukśan wanke cin owancaya hośi wicakayapi. Unkan tona teḣiya unpi kin owasin en awicahipi;

³⁶ Qa cekiyapi, taśina opapun heceedan kaeś yutanpi kta heon; unkan tona yutanpi kin owasin tanyan asnipi.