Mattheos 12 - Dakota Wowapi Wakan Kin

¹ Anpetu kin hena en, anpetu wakan icunhan, Jesus aguyapi ojupi kin ehna iyaya; unkan waonspewicakiye cin wotektehdapi, qa aguyapi yuksa icupi qa yutapi.

² Unkan Pharisee kin he wanyakapi hehan heciyapi; Wanyaka wo, waonspewicayakiye cin, anpetu wakan icunhan taku econpi kte śni ece kin, hee econpi.

³ Unkan iye hewicakiya; Dawid taku econ qon he tohinni dawapi śni he; iye qa tona om un kin wotektehdapi qehan;

⁴ Tipi wakan kin en i, qa aguyapi taninyan ehnakapi kin yuta, he iye qa tona om un kin yutapi kte śni, tuka wośnapi kagapi kin ecedan yutapi kta tuka.

⁵ Qa woope kin en nakun dawapi śni, wośnapi kagapi kin tipi wakan ohna anpetu wakan ahopapi śni eśta iyaonpepica śni unpi.

⁶ Tuka heciciyapi; Tuwe tipi wakan kin isanpa tanka wan den un.

⁷ Wowaonśida wacin qa wośnapi wacin śni ce, eyapi qon he idukcanpi unkanś, tona waḣtanipi śni kin hena wicadacopi kte śni tuka.

⁸ Qa Wicaśta Cinhintku kin he anpetu wakan Itancan kin he nakun ee.

⁹ Hehan hetanhan iyaye c̣a omniciye tipi tawapi kin en i.

¹⁰ Unkan iho, wicaśta wan nape śnija hen un; unkan wiwangapi qa heciyapi; Anpetu wakan icunhan waasniyapi kta iyececa he; he iyaonpapi kta e heyapi.

¹¹ Unkan hewicakiya; Enitanhanpi wicaśta wanji taḣinca wanunyanpi wanjidan yuhe cinhan, he anpetu wakan icunhan woḣa en iyoḣpaya hecinhan, tancan en yuze c̣a ehdaku kte śni he.

¹² Wicaśta kin he taḣinca wanunyanpi isanpa ece. Heon etanhan anpetu wakan icunhan taku waśte econpi kta iyececa.

¹³ Hehan wicaśta qon heciya; Nape hdukatin wo; hecen yukatin, unkan unma kin iyecen asni icaga.

¹⁴ Unkan Pharisee kin hetanhan tankan hdapi, qa token ktepi kte cin he akiiapi.

¹⁵ Tuka Jesus he sdonye c̣a hetanhan tokan iyaya; unkan wicota ḣinca ihakam unpi, qa iye hena owasin asniwicaya:

¹⁶ Qa nina oyake śni wicaśi.

¹⁷ Hecen Isaya wicaśta wokcan kin taku eye ciqon yuecetupi kta; he kaken eya;

¹⁸ Iho, mitahokśdan wahdaḣnige ciqon; waśte wakidake cin on minagi iyuśkin ece; mitaniya kin waqu kta, hecen Ikcewicaśta kin woyaco owicakiyake kta.

¹⁹ Wicakize kte śni, qa pan kte śni, qa ho kin tuwedan canku ohna naḣon kte śni:

²⁰ Cedi kaśuśujapi kin he yukse kte śni, qa haḣonta ide kte cin he kasni kte śni, woyaco he woohiye ekta au śni kinhan:

²¹ Qa iye caje kin Ikcewicaśta wacinyanpi kta.

²² Hehan wanji wakan śica yuhnaśkinyan he en ahipi, iśtagonge c̣a ia okitpani; unkan asniyan, hecen iśtagonge c̣a ia okitpani kin he ia qa nakun tonwan.

²³ Unkan wicaśta ota kin owasin yuśinyayapi qa heyapi; Dawid cinhintku kin he dee śni he.

²⁴ Tuka Pharisee kin iś he naḣonpi qehan heyapi; Wicaśta kin de wakan śica napewicaye cin he Beelzebub wakan śica itancan kin on hecon ece.

²⁵ Unkan Jesus token canteyuzapi kin he sdonye c̣a hewicakiya; Wokiconze wan iye iyakitedan kiciza eca hinḣpaya ece; nakun otonwe qa tipi otoiyohi iye iyakitedan kicizapi ehantanhan ecen he kte śni.

²⁶ Qa Satan Satan napeye cinhan wanna iye iciciza; hecen token tokiconze kin sutaya he kta he.

²⁷ Qa miye Beelzebub on wakan śica napewicawaya ehantanhan, nicincapi kin iś taku on napewicayapi he; heon etanhan hena niyacopi kta.

²⁸ Tuka miye Wakantanka Taniya on wakan sica napewicawaya hecinhan, Wakantanka tokiconze kin wanna en nihipi.

²⁹ Wicaśta waśaka ti kin en, tuwe tin iyaye c̣a taku tawa kin ihangye kta token okihi kta he; tokaheya wicaśta waśake cin kaśke cinhan hehan tipi kin ihangye kta.

³⁰ Tuwe mici un śni kinhan he makipajin ece; qa tuwe micipahi śni kinhan he yutakuni sni ece.

³¹ Heon etanhan heciciyapi; Woaḣtani owasin iapi śica ko wicaśta wicakicicajujupi kta; tuka Woniya Wakan aiapi kin he wicaśta wicakicicajujupi kte śni.

³² Qa tuwe Wicaśta Cinhintku kin taku śica eciye cinhan, he kicicajujupi kta; tuka tuwe Woniya Wakan kin taku śica eciye cinhan, he kicicajujupi kte śni, wiconi kin de en, qa nakun wiconi u kte cin en.

³³ Can kin waśte kaga po, kinhan waskuyeca waśte kta; qa iś can kin śica kaga po, kinhan waskuyeca śice kta; can kin waskuyeca tawa kin on sdonyapi ece.

³⁴ Wamduśka wicoicage, niśicapi hecen token taku waśte ehapi kta oyakihipi he; wicacante ojudan kin he eciyatanhan wicai kin ia ece.

³⁵ Wicaśta waśte kin iye cante waśte ojudan kin eciyatanhan taku waśte hiyuya ece; qa nakun wicaśta śice cin iye cante śica ojudan kin etanhan taku śica hiyuya ece.

³⁶ Tuka wicoie waśte śni otoiyohi wicaśta eyapi kin hena on woyaco anpetu kin en ohdakapi ece e kta, he miye eciciyapi

³⁷ Nioie kin on niyaowotanpi kta, qa nakun nioie kin on niyacopi kta.

³⁸ Hehan wowapi kagapi wanjikji qa Pharisee kin ayuptapi qa heciyapi; Waonspekiya, wowapetokeca wan wanyagunyakiyapi kta uncinpi.

³⁹ Tuka iye waayupte c̣a hewicakiya; Wicoicage śice c̣a wawiciḣaḣapi econ sa kin he wowapetokeca da, tuka wowapetokeca wanjidan qupi kte śni, Jonas wicaśta wokcan wowapetokeca tawa kin heceedan kta.

⁴⁰ Anpetu yamni qa hanyetu yamni hehanyan Jonas hogan tanka tezi kin ohna un qon, he iyecen anpetu yamni qa hanyetu yamni Wicaśta Cinhintku kin maka cante kin en un kta.

⁴¹ Woyaco anpetu kin en Ninewe wicaśta kin inajinpi qa wicoicage kin de yacopi kta; hena e Jonas woyake cin on iyopeic̣iyapi tuka; unkan iho, Jonas isanpa tanka wanji den un.

⁴² Itokaḣ wicaśtayatapi winoḣinca qon he woyaco kin en inajin kta, qa wicoicage kin de yaco kta; eqe Solomon toksape naḣon kta on maka ihanke kin etanhan u tuka; unkan iho, wanji Solomon isanpa tanka den un.

⁴³ Woniya śape cin wicaśta kin etanhan tankata hinanpa, hehan makoce puza en omani, ozikiyapi akita, tuka takudan iyeye śni;

⁴⁴ Hehan heya; Tipi mitawa etanhan wahinape ciqon he ake ekta wahde kta. Unkan ekta ki, qa tuwedan ohna yanke śni, kahintapi qa ayuco yuśtanpi, hecen iyeya.

⁴⁵ Hehan iyaye c̣a woniya tokeca śakowin iye isanpa śicapi, hena iwicacu qa om mahen iyaya, qa ohna yukanpi; unkan wicaśta kin he hetanhan teḣiya un, tokaheya un qon isanpa. Wicoicage śice cin de hecece kta.

⁴⁶ Unkan oyate kin hecen wowicakiyaka icunhan, iho, iye hunku qa hunkawanjitku kin tankan hinajinpi qa okiyapi kta cinpi.

⁴⁷ Unkan wanji heciya; Iho, nihun qa nihunkawanji tankan najinpi qa oniciyapi kta cinpi.

⁴⁸ Tuka iye waayupte c̣a tuwe heye cin he heciya; Tuwe inawaya he, qa mihunkawanji kin hena tuwepi he.

⁴⁹ Unkan waonspewicakiye cin ektakiya nape hdugate c̣a heya; Iho, mihun qa mihunkawanji dena eepi ce.

⁵⁰ Tuwe kaśta Ate maḣpiya ekta un tawacin kin ecen econ kinhan he mihunkawanji qa mitawinoḣtin qa mihun ee.