Mattheos 11 - Dakota Wowapi Wakan Kin

¹ Unkan Jesus waonspewicakiye akenonpapi kin taku econwicaśi ayaśtan, hehan hetanhan iyaya, otonwe tawapi kin ohnahna woyake kta qa waonspekiye kta.

² Unkan Johannes kaśka hnakapi kin en Messiya oḣan kin naḣon qehan, iye waonspewicakiye cin nom ekta yewicaśi;

³ Qa heciya; Tuwe u kte ciqon he niye he, qa iś tuwe tokeca wanunyakapi kta he.

⁴ Unkan Jesus waayupte c̣a hewicakiya; Hda po, qa taku tona nayaḣonpi qa wandakapi kin hena Johannes okiyaka po:

⁵ Iśtagongapi kin tonwanpi ece, huśtepi kin manipi ece, tona lepros ececapi kin ska wicakagapi ece, ṭapi kin kinipi ece, qa tona onśikapi kin hena wotanin waśte owicakiyakapi ece.

⁶ Qa tuwe miye on naśdute śni kinhan, he yawaśtepi ce, eya.

⁷ Hena wanna kihdapi hehan Jesus Johannes on oyate kin wowicakiyaka; Taku wandakapi kta on ḣewoskan yaipi he; cedi wan tateyanpa kahuhuza:

⁸ Tuka taku e wanyag yaipi he; wicaśta wan wokoyake panpanna koyake cin he; iho tona taku panpanna koyakapi kin hena wicaśtayatapi tipi ohna yakonpi ece.

⁹ Tuka taku e wanyag yaipi he; wicaśta wokcan kin heca he; han, eciciyapi, qa wicaśta wokcan isanpa.

¹⁰ Wowapi en kagapi qon, Iho, niite itokam wahośiya mitawa yewaśi, he nitokam canku nitawa nicage kta ce, iho hee.

¹¹ Awicakehan heciciyapi; Tona winoḣinca eciyatannan wicatonpi kin wanji Johannes baptem wicaqu ece kin sanpa tanka icage śni; tuka tuwe maḣpiya wokiconze kin en iyotan cistinna kin he sanpa tanka.

¹² Nakun Johannes baptem wicaqu taanpetu kin hetanhan dehanyan maḣpiya wokiconze kin nina akitapi, qa nina akite cin hena iyaḣpayapi ece.

¹³ Johannes hehanyan woope qa wicaśta wokcanpi owasin woyakapi:

¹⁴ Qa niś wicada wacannipi hecinhan Elias u kte ciqon he dee.

¹⁵ Tuwe noge winaḣon yukan hecinhan he ito naḣon kta.

¹⁶ Tuka ito wicoicage kin de taku e imdacin kta he. Hokśipidan tihocoka en iyotankapi kin hena e iyececa, takodakupi wicakipanpi,

¹⁷ Qa hewicakiyapi; Cotanke unniciyajopi tuka niye wayacipi śni; waśinunhdapi tuka niye yaceyapi śni.

¹⁸ Johannes wote śni qa wayatke śni hi; unkan, Taku wakan śica yuha ce, eyapi.

¹⁹ Wicaśta Cinhintku kin wota qa wayatkan hi; unkan heyapi; Iho, wicaśta wan wote sa qa miniśa yatkan ece, wamnayanpi qa waḣtanipi sa takodawicaya ece. Tuka woksape iye cinca kin on owotanna oyakapi ece.

²⁰ Hehan otonwe kin tona en iye oḣan tanka econpi qon hena iyopewicaya, iyopeic̣iyapi śni heon.

²¹ Hehehe Korazin, hehehe Bethsada; wicoḣan tanka niyepi en econpi kin, hena Turos qa Sidon en econpi unkanś, wanakaja heyake śica caḣota ko en iyopeiciyapi kta tuka.

²² Heon etanhan heciciyapi; Woyaco anpetu kin en, teḣiya yaunpi kta, qa Turos Sidon kici aopten unpi kta.

²³ Qa kapernaum niye, maḣpiya ekta wankan aniyanpi, tuka wicaḣapi ekta eḣpeniyanpi kta; wicoḣan tanka niye en econpi kin hena Sodom en econpi unkanś, anpetu kin dehanyan ecen un kta tuka.

²⁴ Heon etanhan heciciyapi; Woyaco anpetu kin en teḣiya yaun kta, qa Sodom makoce kin ahecece kta.

²⁵ Anpetu kin hena en Jesus waayupte c̣a heya; Ate, maḣpiya maka ko Itancan kin, ciyatan, dena taku kin tona ksapapi qa wasdonyapi kin anawicayakiḣbe c̣a hokśiyoqopapi owicayakidaka ece.

²⁶ Han, Ate hecetu, hecen iyonicipi nakaeś.

²⁷ Ate taku owasin maqu; unkan tuwedan Cinhintkuyapi kin sdonye śni, Ateyapi un kin hecedan sdonkiya; nakun tuwedan Ateyapi kin sdonye śni, tuka Cinhintku kin hecedan; qa tuwe Cinhintku kin sdonyekiye cin he nakun.

²⁸ Tona ḣtayanipi qa tkeya wayaqinpi kin owasin en mau po, kinhan ozikiyapi cic̣upi kta.

²⁹ Can nap̣inpi mitawa kin he icu po, qa miye eciyatanhan onspeic̣iciya po, cante ekta onśimic̣ida qa waḣbayedan waun; hecen ninagipi en woozikiye duhapi kta.

³⁰ Can nap̣inpi mitawa kin he teḣike śni, qa waqin mitawa kin he kap̣ojedan.