Markos 9 - Dakota Wowapi Wakan Kin

¹ Hehan hewicakiya; Awicakehan heciciyapi; den najinpi etanhan wanjikji wiconṭe utapi śni itokam, Wakantanka tokiconze wowaśake on hi wanyakapi kta.

² Unkan anpetu śakpe iyohakam Jesus, Inyan, qa Jakob, qa Johannes iwicacu, qa icunonpa paha wan tehanwankantu kin ekta awicaya; qa wicitokam yutokecapi;

³ Tawokoyake kin wiyatpatpa, ska ḣinca, wa iyececa; maka akan wayuska kin tuwedan iyecen ska kaga okihi śni.

⁴ Unkan hen Elias qa Moses en ihdutaninpi; qa hena Jesus kici wohdag yukanpi.

⁵ Hehan Inyan waayupte c̣a Jesus heciya; Itancan, den unyakonpi he waśte; ito wakeya yamni ti unkicagapi kta; wanji niye on, qa wanji Moses, qa wanji Elias unkicagapi kta.

⁶ Taku eye kta sdonkiye śni; nina yuśinyayapi nakaeś.

⁷ Unkan maḣpiya wan aohanziwicaya; qa maḣpiya kin eciyatanhan wicaho wan tanin qa heya; Micinkśi waśtewakidake cin he dee, he anagoptan po.

⁸ Hehan ecahankeya ihdukśan etonwanpi qehan, wicaśta tuwedan wanyakapi śni, Jesus iśnana kici unpi.

⁹ Unkan paha kin etanhan apamahde kupi icunhan wahokonwicakiya, taku wanyakapi kin tuwedan okiyakapi kte śni, Wicaśta Cinhintku kin ṭapi etanhan kini śni hehanyan.

¹⁰ Unkan wicoie kin he awacinpi, qa ṭapi etanhan kini eyapi kin he taku kapi hecinhan he ikiciwangapi.

¹¹ Unkan heya iwangapi; Tokeca e Elias tokaheya hi kta ce, wowapi kagapi kin eyapi he.

¹² Unkan awicayupte c̣a heya; Awicakehan Elias tokaheya hi kta, qa taku owasin yuecetu kta; qa Wicaśta Cinhintku kin token taku ota kakije kta, qa ḣeyata iyeyapi kta e wowapi en kagapi qon, he nakun owicakiyaka.

¹³ Tuka heciciyapi ce; Awicakehan Elias wanna hi; unkan token cinpi kin ecen ecakiconpi, wowapi en kagapi qon iyececa.

¹⁴ Unkan waonspewicakiye cin en hdi qehan, wicihdukśan wicota ḣinca wanwicayaka; qa wowapi kagapi kin wiwicawangapi.

¹⁵ Unkan oyate kin iyuḣpa wanyakapi qehan nina yuśinyayapi, qa ekta inyang yapi qa okiyapi.

¹⁶ Unkan wowapi kagapi kin, Taku e on wiwicanungapi he, eya iwicawanga.

¹⁷ Unkan wicota etanhan wanji ayupta; Waonspekiye, micinkśi woniya ie śni kin heca yuhe cin he cicahi.

¹⁸ Qa tukten eyaku eca yuḣdeḣdeca ece; hecen i minitaga au, qa hi hdakinskinza, qa ḣanyan ece; unkan waonspewicayakiye cin hena tankan eḣpeyapi kta kewicawakiya, tuka okitpanipi.

¹⁹ Unkan waayupte c̣a hewicakiya; Wicoicage wicada śni, tohanyan cicipi waun kta; tohanyan iyowinciciyapi kta he. En makau po.

²⁰ Hehan en kahipi. Unkan wanyag iheye cin hecehna woniya kin yuḣdeḣdeca; qa makata eḣpeye c̣a, i minitaga au paptanptan iyeic̣iya wanka.

²¹ Unkan atkuku kin heya iwanga; Tohantanhan hececa he. Unkan iś; Hoksiyoqopa ehantanhan, eya.

²² Qa ota petan eḣpeye c̣a, minin eḣpeya, ihangye kta e heon; tuka niś taku oyakihi kinhan, onśiunkida po qa ounkiya po.

²³ Jesus heciya; Wicada oyakihi kinhan; tuwe wicada kin he on taku owasin okihipica ce.

²⁴ Unkan hecehnana hokśidan atkuku kin hotanin qa ceya heya; Itancan wicawada; wicawada śni kin he niye omakiya wo.

²⁵ Jesus oyate kin en inyang hiyupi wanwicayaka, hehan woniya śapa iyopeye c̣a heciya; Woniya ia okitpani qa noge tpa, tankan hinanpe c̣a, icimana en ye śni wo, he miye e econ ciśi ce, eya.

²⁶ Unkan hotanin qa nina yuḣdeḣdeca, qa tankata hinanpa; unkan wicaśta ṭa iyececa, hecen, Wanna ṭa ce, wicota eyapi.

²⁷ Tuka Jesus napata yuze c̣a yuwankan icu; unkan najin hiyaya.

²⁸ Unkan tin hiyu qehan, waonspewicakiye cin naḣmana iwangapi; Tokeca unkiye tankan eḣpeya unkokihipi śni he.

²⁹ Unkan hewicakiya; Ocaje kin de wote śni cekiyapi kin ecedan on tankan hiyu kta okihi ece.

³⁰ Hehan hetanhan yapi qa Galile iyoopta iyayapi; qa tuwedan sdonye kte śni cin.

³¹ He icunhan waonspewicakiye cin wowicakiyaka qa; Wicaśta Cinhintku kin wicaśta napepi kin en wicaqupi, unkan ktepi kta; qa ktepi iyohakam anpetu iciyamni hehan kini kta ce, ewicakiya.

³² Tuka wicoie kin he okaḣnigapi śni, qa on iwangapi kta kokipapi.

³³ Unkan Kapernaum en hi; qa ti mahen yanka hehan wiwicawanga; Canku ohna taku e on ayakinicapi he.

³⁴ Tuka inina yukanpi; canku ohna wanji tukte iyotan tankapi kta e heon hdokinicapi.

³⁵ Unkan iyotanke c̣a akenonpapi kin wicakico qa hewicakiya; Wicaśta wan tokaheya un kta cin kinhan, hee ehake un kta, qa owasin wowidagyapi kta.

³⁶ Hehan hokśiyoqopa wan icu, qa wicacokaya ehnaka; qa nape ohna eyaku, hehan hewicakiya;

³⁷ Tuwe hokśiyoqopa dececa wanji, micaje on tin hiyuye cinhan, miye tin hiyumayan ece; qa tuwe tin hiyumaye cin he miye śni, tuka tuwe u maśi kin he tin hiyuya ece.

³⁸ Hehan Johannes ayupte c̣a; Waonspekiye, wicaśta wan nicaje on taku wakan śica tankan eḣpeya wanunyakapi, he unkihakam u śni; unkan unkihakam u śni kin on etanhan teunḣindapi ce, eya.

³⁹ Tuka Jesus heya; Teḣindapi śni po; wicaśta tuwe micaje on wicoḣan tanka econ kinhan, he ituya mayaśice kta okihi śni.

⁴⁰ Tuwe unkizapi śni kinhan, he unkicipi un ece.

⁴¹ Tuwe micaje on miniyatke ohna mini datkanpi kta nic̣upi kinhan, Messiya niyuhapi kin heon, he wokajuju toki eḣpekiye kte śni, awicakehan eciciyapi.

⁴² Qa tuwe dena cikcistinpidan wacinmayanpi kin wanji waḣtanikiye cinhan, tahu en inyan wiyutpan wan iyakaśkapi qa miniwanca kin en eḣpeyapi unkanś, he waśte kta tuka.

⁴³ Qa ninape waḣtaniniye cinhan hdaksa wo; nape ksa wiconi kin en yai kinhan hee waśte kta, qa nape napin hduha Wakanśica ti, peta icimana kasnipi kte śni kin en iyoḣpeniyanpi kte śni.

⁴⁴ Hen wamduśka tawapi kin ṭe kte śni, qa peta kin kasnipi śni ece.

⁴⁵ Nakun nisiha waḣtaniniye cinhan hdaksa wo; huniśte wiconi kin en yai kinhan, he waśte kta, qa siha nom hduha Wakanśica ti peta icimana kasnipi kte śni kin en iyoḣpeniyanpi kte śni.

⁴⁶ Hen wamduśka tawapi kin ṭe kte śni, qa peta kin kasnipi śni ece.

⁴⁷ Nakun niiśta waḣtaniniye cinhan hduśdoka wo; iśta wanjidan hduha Wakantanka tokiconze kin en de cinhan, hee waśte kta, qa iśta napin hduha Wakanśica ti peta kin en iyoḣpeniyanpi kte śni.

⁴⁸ Hen wamduśka tawapi kin ṭe kte śni, qa peta kin kasnipi śni ece.

⁴⁹ Wicaśta otoiyohi peta on skuyeyapi kta, qa wośnapi otoiyohi miniskuya on skuyeyapi kta.

⁵⁰ Miniskuya kin he waśte; tuka miniskuya kin skuye śni aye cinhan taku e on skuyeyapi kta he. Miniskuya ihduha po, qa wookiye kiciyuha po.