Markos 8 - Dakota Wowapi Wakan Kin

¹ Unkan anpetu kin hena en nina wicota ḣinca, qa takudan yutapi śni, hehan waonspewicakiye cin wicakico qa hewicakiya

² Wicota kin onśiwicawakida, wanna yamni can mici unpi, qa taku yutapi takudan yuhapi śni.

³ Qa wote śni hde wicawaśi kinhan, okinni tahepi iḣpayapi kta; hunḣ tehan tanhan hipi nakaeś.

⁴ Unkan waonspewicakiye cin ayuptapi; Makoce ḣewotahedan kin den, tokiya tanhan dena aguyapi imnahan yute wicakiyapi kta he.

⁵ Unkan, Aguyapi kagapi tona duhapi he, eya iwicawanga. Unkan iś, Śakowin, eyapi.

⁶ Unkan oyate kin maka akan iyotanke wicaśi; qa hehan aguyapi śakowin qon icu, yawaśte qa yuśpaśpa qa waonspewicakiye cin wicaqu, iyoopta wicaqupi kta; unkan iś oyate kin wicakipamnipi.

⁷ Nakun hogan tonana yuhapi; hena yawaśte qa wicaqupi kta, keya.

⁸ Hecen wotapi qa imnanpi; unkan aguyapi oyaptapi kin etanhan makanopiye śakowin pahipi.

⁹ Tona wotapi kin hena kektopawinge topa ecetu; hehan hde wicaśi.

¹⁰ Hehan ecahankeya wata wan en opa, waonspewicakiye cin om, qa Dalmanutha makoce kin ekta i.

¹¹ Unkan Pharisee kin en hipi, qa iyutanyan wiwangapi, qa maḣpiya eciyatanhan wowapetokeca kida.

¹² Unkan iye cante ekta comnihdazi qa heya; Tokeca wicoicage kin de wowapetokeca akita he. Awicakehan heciciyapi; Wicoicage kin de wowapetokeca takudan qupi kte śni.

¹³ Hehan eḣpewicaye c̣a wata kin en okipe c̣a akasanpa hda.

¹⁴ Unkan aguyapi icupi kta akiktonjapi, qa wata ohna aguyapi wanjidan sanpa yuhapi śni.

¹⁵ Hehan wahokonwicakiye ca heya; Wahyaka po, qa on napoḣyapi Pharisee tawapi qa Herod tawa kin he kokipa po.

¹⁶ Hecen iye iyakitedan hdokinicapi qa heyapi; Aguyapi unhapi śni, heon etanhan heya ce.

¹⁷ Jesus he sdonya hehan hewicakiya; Tokeca aguyapi duhapi śni on ayakinicapi he. Hinaḣin oyakaḣnigapi śni qa widukcanpi śni he. Hinaḣin cante aotpasniyanpi he.

¹⁸ Iśta niyukanpi wandakapi śni, qa noge niyukanpi eśta nayaḣonpi śni, qa yeksuyapi śni he.

¹⁹ Aguyapi zaptan wicaśta kektopawinge zaptan wicawakipamni, hehan oyaptapi kin makanopiye ohnaka tona yapahipi he. Akenonpa, eyapi.

²⁰ Hehan śakowin qa kektopawinge topa, hehan oyaptapi makanopiye ohnaka tona iyacupi he. Unkan, Śakowin, eyapi.

²¹ Hehan hewicakiya; Tokeca oyakaḣnigapi śni he.

²² Unkan Bethseda en hi. Hehan iśtagonga wan en ahipi, qa yutan kta e icekiyapi.

²³ Unkan iśtagonge cin napata yuze c̣a otonwe kin tankan aya; qa iśta kin en atagośa hehan nape kin akan ehnaka, qa taku wanyaka hecinhan he iwanga.

²⁴ Unkan wankan etonwe c̣a heya; Wicaśta wanwicamdaka, mani unpi, can kin iyececa.

²⁵ Hehan ake nape kin iśta akan ehnaka, qa ake wankan etonwekiya; unkan hehan yuecetupi, qa taku owasin tanyan wanyaka.

²⁶ Hehan iye ti ekta hde śi, qa heya; Otonwe kin en ye śni wo, qa otonwe kin en tuwedan okiyake śni wo.

²⁷ Unkan Jesus hetanhan Kesareya Philippi otonwe kin hena ekta iyaya, waonspewicakiye cin om. Unkan tahepi waonspewicakiye cin heya iwicawanga; Matuwe, wicaśta keyapi he.

²⁸ Unkan ayuptapi; Johannes baptem wicaqu kin; qa wanjikji; Elias; qa wanjikji; Wicaśta wokcan wanji he niye, eyapi.

²⁹ Unkan hewicakiya; Qa niye matuwe kehapi he. Unkan Inyan waayupte c̣a heciya; Messiya he niye.

³⁰ Unkan he tuwedan okiyake śni wicaśi.

³¹ Hehan wowicakiyaka, Wicaśta Cinhintku kin taku ota kakije kta; wicaḣincapi qa wośnapi kagapi, wowapi kagapi ko ḣeyata iyeyapi kta, qa ktepi kta; qa anpetu yamni iyohakam kini kta.

³² Unkan hena taninyan ohdaka. Hehan Inyan icu qa iyokiśni.

³³ Tuka ihduhomni qa waonspewicakiye cin awicatonwan, hehan Inyan iyopeye c̣a heya; Satan miḣeyata ya wo; taku Wakantanka tawa kin awacanni śni, tuka wicaśta akantu taku tawa kin.

³⁴ Unkan oyate kin waonspewicakiye cin om wicakico qehan, hewicakiya; Tuwe kaśta omape kta hecinhan, waipiic̣ida kta, qa cansusbeca kic̣in kta, qa mihakam u kta.

³⁵ Tuwe wiconi tawa teḣinda kinhan he toki eḣpekiye kta; tuka tuwe miye on qa wotanin waśte kin on wiconi toki eḣpekiye cinhan, he qe wiconi hduhe kta.

³⁶ Qa wicaśta wan maka kin de ocowasin ohiya eśta, qa iye nagi kin toki eḣpekiye cinhan, taku on iwaśte kta he.

³⁷ Qa taku e wicaśta nagi kin tokiyopekiye kta he.

³⁸ Heon etanhan tuwe, wicoicage wiinaḣman qa waḣtani sa kin de en, miye qa mioie kin on iśtece cinhan, tohan Wicaśta Cinhintku kin iye Atkuku towitan hduha, ohnihde wakan kin om u kinhan, wicaśta kin he on iśtece kta ce.