Markos 7 - Dakota Wowapi Wakan Kin

¹ Hehan Pharisee qa wowapi kagapi wanjikji, Jerusalem etanhan upi qa en ahimniciya;

² Qa iye waonspewicakiye cin wanjikji nape śapa, nape hdujajapi śni he kapi, aguyapi yutapi wanyakapi qehan wicabapi.

³ Pharisee kin Juda wicaśta ko owasin tanyan nape hdujajapi śni kinhan wotapi śni ece, qa wicaḣincapi tawoahope kin opapi.

⁴ Qa mazopiye etanhan hiyupi eca ihdujajapi śni ehantanhan wotapi śni. Unkan taku hececa ota opapi kta icupi, miniyatke, qa can koka, qa cega, ohehdepi ko yujajapi ece.

⁵ Hehan Pharisee kin wowapi kagapi ko wiwangapi; Tokeca waonspewicayakiye cin wicaḣincapi tawoahope kin ahopapi śni he, tuka nape hdujaja śni aguyapi yutapi ece.

⁶ Unkan waayupte c̣a hewicakiya; Wananic̣iḣmanpi, niyepi on Isaya tanyan woyake ciqon, hecen wowapi en kagapi; Oyate kin de ihapi kin on mayaonihanpi, tuka cantepi kin mitehanyan un ece.

⁷ Tuka wicaśta akantu tawoahope kin hena woonspe eekiyapi, qa oyakapi ece kin heon ohomadapi kin he taku śni.

⁸ Wakantanka tawoahope kin eḣpeyayapi, qa wicaśta akantu toope kin duhapi, cega qa wakśica yujajapi kin; qa taku hececa ota ecanonpi ece.

⁹ Unkan hewicakiya; Wicaśta akantu toope duhapi kta e heon Wakantanka tawoahope kin eḣpeyayapi, he tanyan ecanonpi he.

¹⁰ Moses hecen eya; Niyate nihun kici wicahduonihan wo. Nakun; Tuwe atkuku, qa iś hunku kin hdaśice cinhan, he wiconṭe on ṭe kta ce.

¹¹ Tuka niye hehapi; Wicaśta wan atkuku, qa iś hunku; He wohduze, tokan wicaqupi he kapi, hecen on ociciye kte śni, eciye cinhan he hecetu ce.

¹² Hecen atkuku qa hunku taku sanpa owicakiye kta iyoyakipi śni;

¹³ Qa niye woope yakagapi qa wicayaqupi kin on Wakantanka tawoahope kin dutakunipi śni: qa taku hececa ota ecanonpi ece.

¹⁴ Unkan oyate kin owasin wicakico, hehan hewicakiya; Owasin anamagoptan po, qa okaḣniga po.

¹⁵ Wicaśta tankan tanhan taku mahen iyaye cin takudan yuśica okihi śni; tuka tona mahen tanhan hinape cin wicaśta yuśice cin hena ee.

¹⁶ Tuwe noge winaḣon yukan hecinhan he naḣon kta.

¹⁷ Unkan wicota wicehna tanhan ti mahen iyaye c̣ehan, waonspewicakiye cin wiyacinpi kin he on wiwangapi.

¹⁸ Unkan hewicakiya; Niś eya oyakaḣnigapi śni he. Taku kaśta tankan tanhan wicaśta mahen iyaye cin he yuśape kta okihi śni e idukcanpi śni he.

¹⁹ Hena cante kin en i śni, tuka tezi mahen, qa hehan tankan eḣpeyapi, hecen woyute owasin yuecetupi.

²⁰ Unkan heya; Taku wicaśta kin etanhan hinanpe cin he wicaśta kin yuśapa ece.

²¹ Mahentanhan, wicacante kin etanhan wicotawacin śica hiyu; wawiciḣaḣapi, wiinaḣmanpi, tinwicaktepi,

²² Wamanonpi, waicucupikte, wośice, wohnaye, wowiḣaḣa, iśtaśica, wayaśicapi, wahanicidapi, witkotkokapi;

²³ Dena taku śice cin owasin mahentanhan hiyu, qa wicaśta yuśape cin hena ee.

²⁴ Unkan hetanhan najin hiyaye c̣a, Turos qa Sidon makoce opapun kin en i, qa tipi wanji timahen iyaya; unkan tuwedan sdonye kte śni cin, tuka anaḣmanpi kta okihipi śni.

²⁵ Winoḣinca wan cunwintku cistinna woniya śapa yuhe cin he naḣon qehan, en hi qa siha kin en makata eḣpeiciya.

²⁶ He Hellenes winoḣinca kin heca, Surophenikiya oyate kin etanhan; unkan taku wakan śica cunwintku kin etanhan hinanpe śi kta e icekiya.

²⁷ Tuka Jesus heciya; Wicacinca kin hena tokaheya wotapi kta; wicacinca aguyapi tawapi kin icupi, qa śunka wicaqupi kta he hecetu śni.

²⁸ Unkan iye waayupte c̣a heciya; Han, Itancan; tuka wahna wotapi kin ihukuya hokśiyopa yuśnapi kin śunka yutapi ece.

²⁹ Unkan heciya; Wicoie kin de on ekta hda wo, taku wakan śica nicunkśi etanhan hinanpa ce.

³⁰ Unkan iye ti kin ekta ki, hehan taku wakan śica tankan iyaye c̣a, cunwintku ohehdepi kin akan wanka e wanhdaka.

³¹ Unkan ake Turos makoce kin eḣpeye c̣a, Sidon opta, Dekapolis makoce kin cokaya omani, qa Galile mde kin ekta ki.

³² Unkan wicaśta wan noge tpa qa ia okitpani he en ahipi, qa nape ahnake kta icekiyapi.

³³ Unkan wicota etanhan iśnana icunonpa aya, qa nape noge ohna iyeye c̣a, tagośa qa on ceji yutan:

³⁴ Hehan maḣpiya ekta etonwe c̣a comnihdazi qa heciya; Ephatha, yuḣdokapi nunwe, eyapi kin he kapi.

³⁵ Unkan ecahankeya noge yuḣdokapi, qa ceji ikan kin yukcapi, qa hdaheya ia.

³⁶ Hehan he tuwedan okiyake śni wicaśi; tuka taku ewicakiye cin on etanhan sanpa nina oyakapi ece.

³⁷ Qa nina yuśinyayapi qa heyapi; Taku owasin tanyan econ ece; noge tpapi kin winaḣonwicakiye c̣a, nakun ia okitpani iewicakiya ece.