Markos 6 - Dakota Wowapi Wakan Kin

¹ Unkan hetanhan iyoopta iyaye c̣a iye tamakoce kin ekta ki; qa waonapewicakiye cin hena opapi.

² Unkan wanna anpetu wakan hehan omniciye tipi kin ohna waonspewicakiya. Qa wicota naḣonpi qehan yuśinyayapi qa heyapi; Tokiyatanhan dena yuha he; qa taku woksape qupi he; qa token iye nape on wicoḣan tanka dececa econpi he.

³ Cankajipe cin, Mary cinhintku, qa Jakob, qa Joses, qa Judas, qa Simon cincu kin he dee śni he; qa tawinoḣtin kin hena owasin den unkicipi unpi śni he. Unkan he on canniyeyapi.

⁴ Tuka Jesus hewicakiya; Wicaśta wokcan iye tamakoce en, qa iye takuwicaye cin ehna, qa iye ti kin ohna, ecedan yuonihanpi śni ece.

⁵ Unkan heciya wicoḣan tanka takudan econ okihi śni; tuka wayazankapi tonana nape on awicaputake c̣a asniwicaya.

⁶ Unkan wicadapi śni kin heon yuśinyaya. Qa otonwe ihdukśan wanke cin ektakta waonspewicakiya iyaya.

⁷ Unkan akenonpapi kin wicakico, qa nom nom yewicaśi; qa woniya śapa on wowaśake wicaqu;

⁸ Qa wahokonwicakiya, icimani yapi kte cin on takudan icupi kte śni, cansagye ecedan; wojuha, qa waneya, qa mazaśa opiye ohna hduhapi kte śni.

⁹ Tuka hanpokihanpi kta; qa onḣdoḣda nom kic̣unpi kte śni.

¹⁰ Unkan hewicakiya; Tukten tipi wanji mahen yaipi kinhan, tohanyan hetanhan iyoopta dapi śni, hehanyau hen yukan po.

¹¹ Qa tona iyowinniciyapi śni qa ananigoptanpi śni kinhan, tohan hetanhan dapi kinhan, owicadakapi kta e heon watuśekśeca siha etanhan yahdatatapi kta. Awicakehan heciciyapi; Woyaco anpetu kin en, otonwe kin he kakije kte cin Sodom qa Gomorrah ahecece kta.

¹² Unkan iyayapi, qa wicaśta ihduecetupi kta e woyakapi.

¹³ Qa taku wakan śica ota napewicayapi, qa wayazankapi kin ota wihdi on sdawicayapi qa asniwicayapi.

¹⁴ Unkan Herod wicaśtayatapi kin hena naḣon; caje kin tankaya oyakapi nakaeś; hehan heya; Johannes baptem wicaqu qon he ṭapi kin etanhan kini, heon etanhan wicoḣan tanka econ ece.

¹⁵ Tuka toktokeca heyapi; Elias hee. Qa toktokeca iś; He wicaśta wokcan, qa iś wicaśta wokcan wanji iyececa ce, eyapi.

¹⁶ Tuka Herod naḣon qehan heya; Johannes pa bawakse ciqon hee, wiconṭe etanhan kini ce.

¹⁷ Herod atayedan yewicaśi, qa Johannes yuze c̣a haśka hnaka, Herodias iye sunkaku Philip tawicu qon heon etanhan; he yuza nakaeś.

¹⁸ Unkan Johannes; Nisunka tawicu duze cin he hecetu śni ce, Herod eciya.

¹⁹ Heon etanhan Herodias canniyekiye c̣a kte kta cin tuka okihi śni.

²⁰ Herod Johannes kokipa, wicaśta owotanna qa waśte sdonya, heon itonpa; qa oie naḣon eca taku ota ecen econ, qa iyuśkinyan naḣon ece.

²¹ Tuka anpetu iyehantu qehan, Herod anpetu en tonpi qon he ehan, wicaśta itancanpi wicayuhe c̣a, akicita tan can tankapi, qa Galile en wicaśta tokaheya kin hena, ḣtayetu wotapi wan wicakicaga.

²² Unkan Herodias cunwintku kin en hi, qa waci, qa Herod tona om un kin hena koya iyokipiwicaya, hehan wicaśtayatapi kin heciya; Taku yacin kinhan makida wo, hecen cic̣u kta.

²³ Nakun taku wakan cajeyan heciya; Taku mayakida kinhan cic̣u kta, mitokiconze hanke hehanyan.

²⁴ Unkan tankan iyaye c̣a hunku heciya; Taku wakida kta he. Unkan iś, Johannes baptem wicaqu ece pa kin, eya.

²⁵ Hehan ecahankeya inaḣniyan wicaśtayatapi ekta tin hiyu qa heya kida; Johannes baptem wicaqu pa kin, wakśica ohna kohanna mayaqu kta wacin ce, eya.

²⁶ Unkan wicaśtayatapi kin nina iyokiśica, tuka taku wakan cajeyan heye cin heon, qa tona om wota iyotanke cin hena on, he ipida kta tawaṭenye śni.

²⁷ Unkan hecehnana wicaśtayatapi kin wicakte wan ekta yeśi, qa pa kin aku śi: Unkan he ekta iyaye c̣a, wicakaśka tipi kin ohna pa baksa;

²⁸ Qa wakśica wan ohna pa kin ahdi, qa wikośka kin qu; unkan wikośka kin iś iyoopta hunku kin qu.

²⁹ Unkan iye waonspewicakiye cin hena, he naḣonpi qehan, en hipi qa tancan ehdakupi, qa ohna hnakapi wan en hnakapi.

³⁰ Unkan tona yewicaśi qon hena Jesus en hdipi, qa taku owasin okiyakapi, taku econpi qa taku oyakapi ko.

³¹ Hehan hewicakiya; Niye ito icunonpa ḣewotahedan ekta u po, qa cistiyedan oziic̣iya po. Wicota upi qa hdapi ece, qa hecen wotapi kta hee kaeś okihipi śni.

³² Unkan heon ḣewoskan makoce wan ekta iśnana watom iyayapi.

³³ Tuka yapi kin wicaśta ota wanyakapi, qa he iye iyekiyapi: qa otonwe owasin etanhan ekta inyang iyayapi, qa kawicapapi, qa en i kte cin hen mniciyapi.

³⁴ Unkan Jesus ekta ihunni, hehan wicota wanwicayaka, qa onśiwicakida, taḣinca wanunyanpi tuwedan wicayuhe śni kin iyececapi heon, qa hecen taku ota onspewicakiya.

³⁵ Unkan wanna wi kucedan hehan, waonspewicakiye cin en hipi qa heciyapi; De ḣewotahedan makoce qa anpetu kin wanna owihanke:

³⁶ Hde wicaśi wo, hecen makoce ihdukśan, qa otonwe kin ektakta yapi, qa woyute opeic̣itonpi kta; taku yutapi takudan yuhapi śni.

³⁷ Tuka iye waayupte c̣a hewicakiya; Niś ito wo wicaqu po. Unkan heciyapi; Unyanpi qa kaśpapi opawinge nonpa aguyapi iyopeunyanpi, qa wo wicunqupi kta he.

³⁸ Aguyapi śpanyanpi kin tona duhapi he; ito wanyaka po, ewicakiya. Unkan sdonyapi hehan; Zaptan qa hogan nonpa, eyapi.

³⁹ Unkan owasin wato kin akan optayetonton iyotangkiye wicaśi.

⁴⁰ Unkan optayeton iyotankapi, opawingege qa wikcemna zaptanptan.

⁴¹ Unkan aguyapi zaptan qa hogan nonpa hena icu, hehan maḣpiya ekta etonwe c̣a yawaśte, qa aguyapi yuśpaśpa, qa waonspewicakiye cin wicaqu, oyate kin wicaqupi kta heon; nakun hogan nonpa kin hena owasin wicakipamni.

⁴² Unkan iyuḣpa wotapi qa imnanpi.

⁴³ Qa oyaptapi kin etanhan makanopiye akenonpa ojudan pahipi, nakun hogan kin etanhan.

⁴⁴ Unkan aguyapi yutapi kin hena kektopawinge zaptan ecetu.

⁴⁵ Hehan ecahankeya waonspewicakiye cin wata kin en okipe wicaśi, qa tokaheya akasanpa Bethseda ekta yapi kta, kewicakiya; icunhan iye wicota kin hde wicaśi kta.

⁴⁶ Unkan hena hde wicaśi, hehan paha wan ekta wocekiye eya iyaya.

⁴⁷ Wanna ḣtayetu hehan, wata kin mde kin cokaya un, qa iye iśnana maka akan un.

⁴⁸ Unkan watopapi iyotanhan iyekiyapi wanwicayaka; tatohekiya yapi nakaeś. Unkan hanyetu en awanyakapi itopa hehan, mini amani ekta wicaya.

⁴⁹ Tuka mde kin amani wanyakapi qehan, he wanagi kecinpi, qa śicahowayapi.

⁵⁰ Owasin wanyakapi qa yuśinyayapi. Unkan hecehnana owicakiye ca hewicakiya; Cante waśte po, he miye, kokipapi śni po.

⁵¹ Unkan ekta wicaya, wata kin en; hehan tate kin ayuśtan. Hecen nina yuśinyayapi qa iḣniyanyanpi.

⁵² Aguyapi econ qon he awacinpi śni; cantepi kin aotpasyapi nakaeś

⁵³ Unkan akasanpatanhan ipi, hehan Gennesaret makoce kin en yapi, qa hutata ihunnipi.

⁵⁴ Unkan wata kin etanhan inanpapi, hehan hecehnana iyekiyapi;

⁵⁵ Qa makoce kin he owancaya inyang yapi, qa tukten un naḣonpi kinhan, wicaśta wayazankapi kin owinja akan wicayuhapi, qa en awicayapi.

⁵⁶ Unkan otonwe ciqadan, qa otonwe tanka, qa ihdukśan makoce wanke cin, tukte en ya eca, canku ohna wayazankapi kin ahiwicahnakapi qa cekiyapi; tawokoyake opapun hee kaeś yutanpi kta; unkan tona yutanpi kin hena asnipi ece.