Markos 5 - Dakota Wowapi Wakan Kin

¹ Unkan mde kin akasanpa ihunnipi, hehan Gadarene makoce kin en ipi.

² Unkan wata kin etanhan inanpa, hehan ecahankeya wicaśta wan woniya śica yuha wicahnakapi etanhan itkokim hiyu:

³ He wicahnakapi kin en un ece; qa tuwedan kaska okihi śni, mazaicicaḣiḣa hee kaeś on.

⁴ Wanna ota kaśkapi, siha on wicakaśkapi mazaicicaḣiḣa ko on; tuka mazaicicaḣiḣa kin hena yuweḣwega ece, qa siha on wicakaśkapi kin yuksaksa ece; qa tuwedan waḣbadan kaga okihi śni.

⁵ Ohinniyan, hanyetu anpetu koya, wicahnakapi kin ehna, qa ḣe kin ekta śicahowaya un, qa inyan on kiihdaksa ece.

⁶ Tuka Jesus tehan tanhan wanyaka, hehan ekta inyang ye c̣a ohoda.

⁷ Qa hotankakiya hotanin qa heya; Jesus Wakantanka Tehanwankantu Cinhintku kin, taku e unkiyotahedan un he; Taku Wakan cajeyan ceciciya, kakiśmayaye kte śni.

⁸ Wanna, Woniya śapa, wicaśta kin etanhan hinanpa wo, eciya nakaeś.

⁹ Unkan, Token eniciyapi he, eya iwanga. Unkan heciya; Wicota, emakiyapi ce, wiuncotapi nakaeś.

¹⁰ Unkan makoce kin he etanhan hde wicaśi kte śni, nina cekiya.

¹¹ Imnija ḣe kin hen ikiyedan kukuśe optaye wan tanka wo wicaqupi.

¹² Hecen wakan sicapi kin cekiyapi qa heyapi; Kukuśe kin ekta ye unśi po, mahen wicunyanpi kta ce.

¹³ Unkan hecehnana Jesus iyowinwicakiya. Hecen woniya śapapi kin tankan hinanpapi qa kukuśe kin mahen iwicayayapi. Unkan optaye kin ecehna maya ḣince cin en naśdog eyaye c̣a minin iyayapi; owancaya kektopawinge nonpa ecetu, qa minin ṭapi.

¹⁴ Unkan tona kukuśe wo wicaqupi qon hena najicapi, qa otonwe kin en makoce ihdukśan koya he oyakapi. Unkan taku econpi kin he wanyag ipi.

¹⁵ Qa Jesus en hipi, qa wicaśta wakan śica yuhnaśkinyan, qa wicota yuhe ciqon, wanna ogekiton qa tawacin ecetu iyotankehan yanka he wanyakapi; unkan yuśinyayapi.

¹⁶ Unkan tona wanyakapi qon hena, wicaśta wakan śica yuhnaśkinyanpi, kukuśe kin hena ko token ecawicakiconpi qon hena owicakiyakapi.

¹⁷ Hehan makoce tawapi kin etanhan hde kta e icekiyapi.

¹⁸ Unkan wata kin en okipa hehan tuwe wakan śica yuhe ciqon he cekiya, kici un kta heon.

¹⁹ Tuka Jeans iyowinkiye śni, qa heciya; Takuwicayaye cin ekta hda wo, qa taku tona Itancan kin ecanicon qa onśinida, hena owicakiyaka wo.

²⁰ Hecen kihde c̣a Dekapolis en taku tona Jesus ecakicon kin he ohdaka ece. Unkan owasin yuśinyayapi.

²¹ Unkan Jesus ake watom akasanpa ki qehan, oyate ota en mniciyapi; qa mde kin ikiyedan un.

²² Hehan iho, omniciye tipi itancanpi wanji, Jairus eciyapi, he en hi; qa wanyaka hehan siha kin en makata eḣpeic̣iya,

²³ Qa nina cekiye c̣a heya; Micunkśi cistinna wanna ṭe kta wanka; en u qa nape on aputake c̣a asniya ye; hecen ni kta ce.

²⁴ Unkan kici iyaya; qa wicaśta ota ihakam yapi qa aoṭinsyapi.

²⁵ Unkan winoḣinca wan waniyetu ake nom hehanyan we ece iheya;

²⁶ Qa pejihutawicaśta ota on teḣiya kuwapi, qa taku owasin on hdusota, qa etanhan waśte icage śni, tuka sanpa śica aya;

²⁷ He Jesus oyakapi naḣon qehan, ḣeyata tanhan wicota ehna hiyu, qa tawokoyake yutan.

²⁸ Tawokoyake hee kaeś mdutan kinhan, amasni kta ce, eye ciqon.

²⁹ Unkan hecehnana we iheye ciqon anapta; qa tancan mahen he wayazan kin on wanna akisni sdonkiya.

³⁰ Unkan hecehnana woasni etanhan hiyu kin Jesus atayedan sdonkiya, wicota ehna ihduhomni qa heya; Mitawokoyake tuwe yutan he.

³¹ Unkan waonspewicakiye cin heciyapi; Wicaśta ota aoṭinsniyanpi he wandaka, qa, Tuwe mayutan he, eha he.

³² Unkan tuwe hecon kin he wanyake kta e ohomni awica tonwan.

³³ Tuka winoḣinca kin taku ecakiconpi kin sdonkiya, hecen kokipeyahan cancanyan en hi, qa itokam makata eḣpeic̣iye c̣a owasin awicakehan okiyaka.

³⁴ Unkan heciya; Cunś, wacinyaye cin he asniniyan; wookiye hda wo, qa waniyazan qon okizi un wo.

³⁵ Unkan iahan icunhan omniciye tipi itancan ti kin eciyatanhan upi qa heyapi; Nicunkśi wanna ṭa; tokeca sanpa Waonspekiye cin nagiyeyaya he.

³⁶ Tuka Jesus taku eyapi naḣon qehan, hecehnana omniciye tipi itancan kin heciya; Kokipe śni wo, wicada wo ecedan.

³⁷ Unkan tuwedan kici ye kta iyowinkiye śni, Inyan, qa Jakob, qa Johannes Jakob sunkaku, henananpidan.

³⁸ Unkan omniciye tipi itancan ti kin he en hi, qa owodutaton kin he wanyaka, tona ceyapi qa nihinciyapi kin hena koya.

³⁹ Unkan en i qehan hewicakiya; Tokeca owodutaton yakagapi qa yaceyapi he; wicinyanna kin ṭe śni, tuka iśtinma ce.

⁴⁰ Unkan nina iḣapi. Tuka owasin tankan iyewicaya, hehan wicinyanna atkuku qa hunku, qa tona om un kin hena iwicacu, qa wicinyanna wanke cin en i;

⁴¹ Qa wicinyanna kin nape yuze c̣a heciya; Talitha kumi, Wicinyanna najin wo, eciciya, eyapi kin he kapi.

⁴² Unkan ecahankeya wicinyanna kin najin qa mani; wanna waniyetu akenonpa. Unkan nina ḣin yuiśinyayapi.

⁴³ Hehan nina oyake śni wicaśi; qa taku yutapi qupi kta, kewicakiya.