Markos 4 - Dakota Wowapi Wakan Kin

¹ Hehan ake mde kin icahda waonspewicakiya; unkan wicota ḣinca en mniciyapi, hecen wata wan en ope c̣a, mini ekta iyotanka; unkan oyate kin owasin mde icahda maka akan unpi.

² Unkan wiyacinpi on taku ota onspewicakiya; qa waonspewi cakiya icunhan hewicakiya;

³ Naḣon po: Iho, wicaśta woju wan woju iyaya.

⁴ Unkan woju icunhan, apa canku icahda hinḣpaya; unkan zitkatanka en ahiyahe c̣a temyapi.

⁵ Qa apa inyan ehna hinḣpaya, hen maka tonana; unkan maka akantuyedan heon oḣankoya hinanpa.

⁶ Tuka wi hinanpa hehan gu; qa hutkan nice cin heon śniś aya.

⁷ Unkan apa wapepeka hu kin ehna hinḣpaya; unkan wapepeka kin hu uye c̣a aoṭinsya, hecen waskuyeca takudan icage śni.

⁸ Unkan apa maka waśte kin en hinḣpaya, he waskuyeca aicaga; hinanpe c̣a icaga, qa suton, hunḣ wikcemna yamni, hunḣ wikcemna śakpe, qa hunḣ opawinge akihde aicaga ece.

⁹ Hehan hewicakiya; Tuwe noge winaḣon yukan hecinhan, ito naḣon kta.

¹⁰ Unkan iśnana un hehan, akenonpapi qa tona om ihdukśan unpi kin hena wiyacinpi kin he on iwangapi.

¹¹ Unkan hewicakiya; Wakantanka tokiconze woanaḣbe kin hena niye sdonyayapi kta e nic̣upi; tuka tankan unpi kin hena taku owasin wiyacinpi kin on econpi.

¹² Hecen wawanyakapi on wanyakapi kta, tuka iyukcanpi kte śni; qa winaḣonpi on naḣonpi kta tuka okaḣnigapi kte śni; hecece śni kinhan okinni wicayuhomnipi kta, qa woaḣtani wicakicicajujupi kta.

¹³ Unkan hewicakiya; Wiyacinpi kin de sdonyayapi śni he, hecen token ecin wiyacinpi owasin oyakaḣnigapi kta he.

¹⁴ Tuwe woju kin he wicoie kin oju ece.

¹⁵ Tona canku icahda qon, tukten wicoie kin ojupi, tuka he naḣonpi hehan, ecahankeya Wakanśica en hi, qa wicoie cantepi kin en ojupi qon he icu ece, iho, hena eepi.

¹⁶ Qa he iyececa, inyan ota en ojupi qon, tona wicoie kin naḣonpi ec̣a, kohanna iyuśkinyan icupi ece kin hena eepi;

¹⁷ Tuka iyepi mahen hutkan nicapi heon aśkayedan icaga; tohan wicoie kin on śicaya wicakuwapi qa śitkihdawicayapi icaga, hehan hinnahanka śihdapi.

¹⁸ Unkan tona wapepeka hu ehna ojupi qon, tona wicoie kin naḣonpi;

¹⁹ Unkan maka kin de awacinpi, qa wijicapi on wicahnayanpi, qa taku tokeca cantiheyapi kin hena en u, qa wicoie kin yuoṭinza, hecen wasuton śni, hena eepi.

²⁰ Unkan maka waśte kin en ojupi qon, tona wicoie kin naḣonpi eca icupi ece, qa waskuyeca icaḣyapi, wikcemna yamni, wikcemna śakpe, qa opawinge akihde, iho, hena eepi.

²¹ Unkan hewicakiya; Petijanjan koka wan ihukuya, qa iś ohehdepi ihukuya iyeyapi kta, qa petijanjan ihupa en ośtanpi kte śni, aupi he.

²² Taku akaḣpetonpi qa yutaninpi kte śni wanic̣a; qa taku anaḣmanpi qa iyoyanpa en aupi kte śni wanica ce.

²³ Tuwe noge winaḣon yukan hecinhan he naḣon kta.

²⁴ Unkan hewicakiya; Taku nayaḣonpi kin awacin po. Wiyutapi kin tukte on widutapi ece kin, he on ake winiciyutapi kta, qa tona anagoptan dukanpi kin sanpa nic̣upi ece e kta.

²⁵ Tuwe wayuhe cin he sanpa taku qupi kta; qa tuwe takudan yuhe śni, taku yuhe cin hee kaeś kipi kta.

²⁶ Unkan heya; Wakantanka tokiconze kin he wicaśta wan taku su kin maka kin en iyoḣpeya, he iyececa;

²⁷ Qa iśtinma, qa hanyetu anpetu ko inajin; unkan su kin he hinanpe c̣a icage kta, tuka token icaga he sdonye śni.

²⁸ Maka kin he iye cinka waicaḣya ece, ape kin he tokaheya, hehan wahuwapa, qa hehan wahuwapa en tanyan wasuton ece.

²⁹ Unkan wanna suton hehan kohanna isan śkopa kin en iyekiya, wanna kaśdapi kta iyehantu nakaeś.

³⁰ Hehan heya; Taku e Wakantanka tokiconze kin iyececa unyawapi kta he; qa wiyacinpi kin tukte e on unkiyacinpi kta he.

³¹ Sinape su wan iyececa, he maka kin en eḣpeyapi, hehan taku su maka en un kin owasin he iyotan cistinna;

³² Tuka maka kin en ojupi, hehan uye c̣a wato owasin sanpa tanka icaga; adetka tankinyanyan aicaḣya, hecen maḣpiya okinyanpi kin ohanzi ihukuya manpi ece.

³³ Unkan wiyacinpi hecekcen ota on wicoie kin owicakiyaka, token naḣon okihipi kin he iyececa.

³⁴ Qa wiyacinpi codan takudan owicakiyake śni. Unkan iśnana yukanpi, hehan taku owasin waonspewicakiye cin hdaheya owicakiyaka ece.

³⁵ Unkan anpetu kin he en, wanna ḣtayetu hehan, hewicakiya; Akasanpa unyanpi kta.

³⁶ Unkan wicota kin wanna hdewicaśipi, hehan ecehna wata kin en ohnakapi: qa nakun wata cikcistinna toktokeca opapi.

³⁷ Unkan tate tanka wan uya; qa taja wata kin apaspa, hecen wanna mini ojudan.

³⁸ Tuka iye wahektapa tanhan ipahin wan akan iśtinma wanka. Unkan yuḣicapi qa heciyapi; Waonspekiye, unkowihankepi kta he etanhan initokeca śni he.

³⁹ Unkan iyotanka, tate kin kiśice c̣a mde kin heciya; Owanji yanka wo. Unkan tateyanpa ayuśtan qa amdakedan tanka.

⁴⁰ Hehan hewicakiya; Tokeca kopeyahdapi he; tokeca wicayadapi śni he.

⁴¹ Unkan nina kokipapi, qa iyakitedan hekiciyapi; De taku wicaśta hwo, tate kin hee kaeś, mde ko anagoptanpi ece.