Markos 3 - Dakota Wowapi Wakan Kin

¹ Hehan ake omniciye tipi kin en iyaya; unkan wicaśta wanji nape śnija hen yanka.

² Unkan anpetu wakan icunhan asniye kta hecinhan he iawanyakapi; taku iyaonpapi kta e heon.

³ Unkan wicaśta nape śnije cin he heciya; Cokata inajin wo.

⁴ Hehan hewicakiya; Anpetu wakan icunhan taku waśte econpi kta iyececa, qa iś taku śica econpi kta, unma tukte he; waniyanpi kta qa iś waṭeyapi kta he. Tuka inina hiyeya.

⁵ Unkan icanksiya awicatonwan, cante teḣipike cin on iyokiśica, hehan wicaśta kin heciya; Nape hdukatin wo. Unkan hduowotanna; hecen nape kin ocowasin yuecetupi, unma kin iyececa.

⁶ Hehan Pharisee kin hena iyaya pi, qa ecahankeya Herodian kin om wohdakapi, token he ihangyapi kta e heon.

⁷ Tuka Jesus mde kin ekta hdicu, waonspewicakiye cin om; qa Galile etanhan qa Juda makoce kin etanhan wicota ḣinca ihakam yapi.

⁸ Nakun Jerusalem etanhan, qa Idumia, qa Jordan akasanpa tanhan; qa Turos qa Sidon ihdukśan tanhan wicota, taku wicoḣan tanka econ naḣonpi, hehan en hipi.

⁹ Unkan wicota aoṭinsyapi kta e heon, wata cistinna wan yuha waonspewicakiye cin akipepi kta, kewicakiya.

¹⁰ Wicaśta ota asniwicaya; heon tona tancan śihtinpi kin hena yutanpi kta e yuotinzapi.

¹¹ Qa tona woniya śapa yuhapi kin hena wanyakapi, hehan itokam makata iḣpayapi qa heya howayapi, Wakantanka Cinhintku kin he niye ye.

¹² Unkan oyakapi kte śni nina kewicakiya.

¹³ Unkan hetanhan paha wan ekta ye c̣a, tona cin kin hena wicakico; unkan en hipi.

¹⁴ Unkan akenonpa wicakaḣniga, ohinniyan kici unpi kta, qa woyaka yewicaśi kta;

¹⁵ Qa wayazankapi kin asniwicayapi kta, qa wakan śica napewicayapi kta, wowaśake yuhapi kta.

¹⁶ Unkan Simon he Inyan eya caśton;

¹⁷ Qa Jakob, Zebede cinhintku, qa Johannes Jakob sunkaku; unkan hena Boanerges ewicakiya, Wakinyan cincapi he kapi:

¹⁸ Qa Andrew, qa Philip, qa Bartholomew, qa Mattheos, qa Thomas, qa Jakob Alpheus cinhintku, qa Thaddeus, qa Simon Kananite;

¹⁹ Qa Judas Iskariot, wiyopeye cin hee. Unkan tipi wan ti mahen iyayapi.

²⁰ Hehan ake wicota en mniciyapi, hecen aguyapi yuta okihipi śni.

²¹ Unkan iye iakuwicaye cin he naḣonpi qehan, yuzapi kta e ekta iyayapi; qa, Wanna wacinhnuni ce, eyapi.

²² Nakun wowapi kagapi Jerusalem etanhan hipi kin hena heyapi; He Beelzebub yuha, qa wakanśica itancan kin on wakan śica napewicaya ece.

²³ Unkan iye hena wicakico qa wiyacinyan hewicakiya; Token Satan Satan napeya okihi kta he.

²⁴ Qa wokiconze wan iye iyakitedan kicize cinhan, wokiconze kin he ecen he kte śni.

²⁵ Qa tipi wanji iye iyakitedan kicize cinhan, tipi kin he ecen he kte śni.

²⁶ Nakun Satan inajin, qa iye iyakitedan kicize c̣a ihdunonpa kinhan, he ecen un kta okihi śni, tuka wanna owihanke kta.

²⁷ Tuwedan wicaśta waśaka ti kin en ye c̣a, tawaḣpaya kin ihangye kte śni; wicaśta waśake cin he tokaheya kaśke cinhan, hehan tipi tawa kin ihangye kta.

²⁸ Awicakehan heciciyapi; Waḣtanipi owasin wicaśta cincapi kin wicakicicajujupi kta, qa iapi śica on wayaśicapi ece kin hena nakun;

²⁹ Tuka tuwe Woniya Wakan kin yaśice cinhan, he icimana kicicajujupi kte śni; tuka woyaco owihanke wanica kicihe kta:

³⁰ Woniya śapa wan yuha ce, eyapi kin heon etanhan heya.

³¹ Unkan hehan iye hunkawanjitkupi qa hunku kin hena en hipi, tankan hinajinpi, wahoyapi qa kicopi.

³² He icunhan wicota ihdukśan iyotankapi; unkan heciyapi; Iho, tankan nihun qa nihunkawanjipi anicitapi ce.

³³ Unkan heya awicayupta; Inawaye cin he tuwe, qa mihunkawanji tuwepi he.

³⁴ Unkan tona okśan iyotankapi kin hena ekta ewicatonwe c̣a heya; Ina qa mihunkawanji, wanwicayaka po.

³⁵ Tuwe Wakantanka tawacin kin ecen econ kinhan, he mihunkawanji ee, mitawinoḣtin qa inawaye cin nakun.