Markos 16 - Dakota Wowapi Wakan Kin

¹ Unkan anpetu wakan kin wanna owihanke, hehan Mary Magdalene, qa Mary Jakob hunku, qa Salome hena tancan kin sdayapi kta on pejihuta waśtemna aupi:

² Unkan anpetu tokaheya hanḣanna ḣinca, wicaḣapi oḣdoka kin en hipi, wanna wi hinanpa hehantu.

³ Unkan hekiciyapi; Tuwe wicaḣapi oḣdoka i kin etanhan inyan kin yutokan iyeunkiciciyapi kta he.

⁴ Unkan ekta etonwanpi, hehan inyun, inyan kin wanna yutokan iyeyapi; he tanka ḣinc̣a.

⁵ Unkan wicaḣapi oḣdoka kin mahen ipi, hehan kośka wan etapa eciyatanhan iyotanka, Wokoyake ska hanska koyaka, he wanyakapi; unkan yuśinyayapi.

⁶ Tuka iye hewicakiya; Ihnuhan niyuśinyayapi kinhan; Jesus Nazareth etanhan, icipaweḣ okatanpi qon he oyadepi; wanna ihduekicetu; den wanke śni; tukten hnakapi qon he wanyaka po.

⁷ Tuka niś hda po, qa waonspewicakiye cin, qa Inyan nakun, nitokam Galile ekta ye kta, heciya wanyahdakapi kta, eniciyapi qon iyececa, he owicakiyaka po.

⁸ Unkan hecen koyaḣanna hdicupi, qa wicaḣapi ohdoka kin etanhan najica kihdapi; nina cancanpi qa yuśipyayapi; qa tuwedan takudan eciyapi śni, inihanpi nakaeś.

⁹ Unkan anpetu wakan anpetu tokaheya hanḣanna ḣinc̣a, Jesus ihduekicetu hehan, Mary Magdalene, etanhan taku wakan śica śakowin eḣpekiciye ciqon, he tokaheyaen taninic̣iya.

¹⁰ Hehan iye hde c̣a, tona om un qon iyokiśicapi qa ceya yukanpi kin owicakiyaka.

¹¹ Unkan hena, wanna kini, qa he wanyaka keya ohdaka naḣonpi eśta, wicadapi śni.

¹² Hehan iyohakam etanhan wicaśta nom makoce ekta icimani yapi, hehan icunhan en taninic̣iya.

¹³ Hena unmapi kin hośi wicakakipi, tuka nakun wicadapi śni.

¹⁴ He iyohakam akewanjipi wota iyotankapi icunhan en taninic̣iya, qa waceṭunhdapi qa cante sutapi on iyopewicaya; kini iyohakam tona wanyakapi kin heepi kaeś wicawicadapi śni heon.

¹⁵ Unkan hewicakiya; Maka kin owancaya ya po, qa wicaśta otoiyohi wotanin waśte kin owicakiyaka po.

¹⁶ Tuwe wicada qa baptem qupi kinhan he ni kta; qa tuwe wicada śni kinhan he yacopi kta.

¹⁷ Qa tona wicadapi kin hena wowapetokeca dena yuhapi kta Micaje kin on taku wakan śica tankan eḣpeyapi kta; wicaceji tokeca on iapi kta;

¹⁸ Sinteḣda yuwankan icupi kta; qa pejihuta śica yatkanpi eśta etanhan itokecapi kte śni; wayazankapi kin nape awicahnakapi kta, kinhan asnipi kta ece.

¹⁹ Hecen Itancan kin owicakiya, hehan maḣpiya ekta eyakupi, qa Wakantanka etapa eciyatanhan kiyotanka.

²⁰ Unkan hena iyayapi, qa owancaya woyakapi; qa Itancan kin wicoḣan tanka econwicakiye cin on wicoie kin yuecetu ece. Amen.