Markos 15 - Dakota Wowapi Wakan Kin

¹ Unkan wanna anpao, hehan wośnapi kagapi qa wicaḣincapi, wowapi kagapi ko omniciye ocowasin om he aiapi, qa Jesus kaśkapi, qa ekta ayapi qa Pilate qupi.

² Unkan Pilate wiwanga; Juda oyate Wicaśtayatapi kin he niye he. Unkan Jesus ayupte c̣a, Niye ecen eha ce, eya.

³ Unkan wośnapi kagapi kin taku ota iyaonpapi; tuka takudan ayupte śni.

⁴ Unkan Pilate ake wiwange c̣a; Takudan adupte śni he; iho, taku ota iyanionpapi ce, eya.

⁵ Tuka Jesus takudan ayupte śni; hecen Pilate yuśinyaya.

⁶ Wośnapi kin de ekta wicakaśkapi wanji wicakiciyukca ece, wanji tukte cinpi kinhan.

⁷ Unkan wanji Barabbas eciyapi, he tona om inajin qon kaśkapi yanka, he inajinpi qehan nakun tinwicakte.

⁸ Unkan oyate kin, token econ ece qon he iyecen ecawicakicon kta, panyehan keciyapi.

⁹ Tuka Pilate awicayupte c̣a; Juda Wicaśtayatapi kin he ciciyukcapi kta yacinpi he.

¹⁰ Wosnapi kagapi kin winawizipi on kahipi e sdonya.

¹¹ Tuka wośnapi kagapi kin oyate kin wahokonwicakiyapi, Barabbas he wicakiyukca kta e heon.

¹² Unkan Pilate ake awicayupte c̣a; Hehan tuwe Juda Wicaśtśyatapi eyakiyapi kin he token ecamon kta yacinpi he, ewicakiya.

¹³ Unkan ake panyehan heyapi; Icipaweḣ okatan wo.

¹⁴ Hehan Pilate hewicakiya; Tokec̣a, taku śica econ kin tukte e he. Unkan hehan iyotan nina; Icipaweḣ okatan wo, panyehan eyapi.

¹⁵ Unkan Pilate oyate kin iyokipiwicaye kta cin, heon Barabbas wicakiciyukca, qa Jesus kapsinpsinta hehan icipaweḣ okatanpi kta wicaqu.

¹⁶ Unkan akicita kin tipi wan tanka, Pretorium eciyapi, he ekta ayapi; qa wicobe ocowasin wicakicopi.

¹⁷ Unkan śina duta wan inkiyapi, qa wapaha wan wapepeka on kazontapi qa unkiyapi.

¹⁸ Qa hehan okiyapi, Iho, Juda Wicaśtayatapi kin.

¹⁹ Qa cedi tanka wan on pa kin en apapi, qa atagośapi, qa canpeśka makehde inajinpi, qa ohodapi.

²⁰ Unkan hecen iḣaḣapi, hehan śina duta kin ikicicupi, qa iye tawokoyake qon ake kic̣unkiyapi. Hehan icipaweḣ okatanpi kta e ekta ayapi.

²¹ Unkan Simon, Kurene wicaśta, en hiyaya, he Alexander qa Ruphus atkuku kin, makoce kin etanhan u kin he can susbeca tawa kin kicicinkiyapi.

²² Unkan. Golgotha owanka kin en ahipi, he, Wicapahu makoce, eyapi kin he kapi.

²³ Unkan miniśa pejihuta icahiyapi kin he yatke kta e qupi; tuka wicada śni.

²⁴ Unkan wanna icipaweḣ okatanpi, hehan tawokoyake qon kicipamnipi, qa on oeconna econpi, wicaśta otoiyohi taku icupi kta.

²⁵ Unkan wanna wihiyayedan oape yamni, hehan icipaweḣ okatanpi.

²⁶ Unkan taku iyaonpapi wowapi iwankam owapi kin, JUDA WICAŚTAYATAPI KIN, hee.

²⁷ Unkan kici wamanon sa nom icipaweḣ owicakatanpi, wanji etapa eciyatanhan, qa unma catka eciyatanhan.

²⁸ Hecen wowapi kagapi qon yuecetupi; Qa waḣtanipi sa om yawapi ce, eya.

²⁹ Unkan tona en hiyayapi kin hena yaśicapi, poptanptanpi qa heyapi; Iho, tipi wakan kin ihangyaye kta, qa anpetu yamni ake piya yakage kta:

³⁰ Ito, niic̣iya wo, qa cansusbeca kin etanhan kun ku wo.

³¹ Nakun wośnapi kagapi kin iḣaḣapi, qa wowapi kagapi om iye iyakitedan hekiciyapi; Wicaśta tokeca niwicaya ece, tuka iye atayedan niic̣iye kta okihi śni.

³² Messiya Israel Wicaśtayatapi kin, ito cansusbeca kin etanhan kun hdicu kta, hecen wanunyakapi qa wicaundapi kta. Unkan tona kici icipaweḣ owicakatanpi qon iś eya iḣaḣapi.

³³ Unkan wihiyayedan oape iśakpe, hehan maka kin owancaya otpaza, oape inapcinwanka hehanyan.

³⁴ Qa wihiyayedan oape inapcinwanka, hehan Jesus hotankakiya panyehan; Eloi, Eloi, lama sabakthani, eya: Wakantanka mitawa, Wakantanka mitawa, tokeca eḣpemayaya he, eyapi kin he kapi.

³⁵ Unkan en najinpi wanjikji he naḣonpi qehan heyapi; Iho, Elias kipan.

³⁶ Unkan wanji inyang ye c̣a, mini iyuḣepe wan miniskuya en oputkan, qa can icam yatkekiye kta, qa heya; Hinnakahan po, Elias kun eyaku kta on hi kinhan wanunyakapi kta.

³⁷ Unkan Jesus hotankakiya hotanin, qa taniya hiyuya.

³⁸ Unkan tipi wakan cokaya ozanpi qon he owangya okinaḣdece c̣a, wankan tanhan qa kun ihanke kin aiyahdeya.

³⁹ Unkan akicita opawinge wicayuhe cin iyotakons najin, he hecen pan qa taniya hiyuya wanyaka, hehan heya; Awicakehan wicaśta kin de Wakantanka Cinhintku kin hee.

⁴⁰ Nakun winoḣinca itehan tanhan wanyag yukanpi; Mary Magdalene, qa Mary, Jakob cistinna qa Joses hunku kin, qa Salome, hena opapi.

⁴¹ Galile en un qon he ehan ihakam unpi qa okiyapi ece kin hena eepi, qa nakun winoḣinca toktokeca kici Jerusalem en hipi qon.

⁴² Unkan wanna ḣtayetu, Ihduwiyeyapi kta anpetu, anpetu wakan kin itokam anpetu kin hee, heon,

⁴³ Joseph, Arimathea etanhan, woope aiekiyapi owotanna, qa nakun Wakantanka tokiconze kin ohinniyan ape un kin he u, a waditagya Pilate en ye c̣a, Jesus tancan kin kida.

⁴⁴ Unkan wanna ṭa hecinhan Pilate yuśinyaya; heon akicita opawinge wicayuhe cin he kico, qa wanna wanakaja tanhan ṭa hecinhan he iwanga.

⁴⁵ Unkan akicita opawinge wicayuhe cin he ecen okiyaka, hehan tancan kin Joseph qu.

⁴⁶ Unkan he miniḣuha ska waśte opeton, qa tancan kin kun eyaku, qa miniḣuha ska kin iyapemni, qa wicaḣapi oḣdoka wan imnija en kagapi, he en ohnaka, qa inyan tanka wan wicaḣapi oḣdoka i kin en eonpa.

⁴⁷ Unkan Mary Magdalene qa Mary Joses hunku kin hena tukten hnakapi kin he wanyakapi.